الموضوع: بالصور : جولة داخل اماكن التخزين العديدة لكورولا 2014

بسم الله الرحمن الرحيم

احنا زهقنا من المواضيع العامة المتكررة , متيجي ندخل بعمق مع بعض في تفاصيل الكورولا و نشوف جمال تصميم الاماكن التخزينية للعربية.

* دي صورة بتوضح جميع اماكن التخزين في العربية :



ناخدهم واحدة واحدة

1. كنسول بوكس امامي تحت التكييف :

به فتحات للشاحن ووصلات USB & AUX عن طريق باب صغير شيك به حليه نيكل كروم تستطيع فتحها ووضع الموبايل بها او غلقها تماما حتي لو مركب الولاعة ولو نسيت الموبايل جوة متقلقش كدة كدة مش هتحتاجه لو حد اتصل بيك هيوصلك برضو و هتلاقي سماعات العربية بترنلك و بتقولك اتفضل اتعب نفسك و دوس علي زرار السماعة اللي في المالتي فانكشن و طبعا اسم المتصل ورقمه هيظهرلك علي شاشة الكاسيت.




2. جراب نضارة علوي :

الصيف دخل والنضارات الجامدة تطلع بقا , كل اللي عليك ترفع صباعك فوق تلمس جراب النضارة تلقيه نزلك لتحت و بيقولك اتفضل ياباشا , الجميل بقا في الجراب ده البطانة بتاعته عشان تحمي عدسات نضارتك . مش ناقص غير انها تلمعلق العدسات.




3. كنسول بوكس امامي شمال :

جنب الباب بتاع السواق وتحت زراير المرايات والاوتوبارك وال ESP هتلاقي درج ظريف ممكن تشيل فيه اوراق او فلوس فكة متعدد الاستخدام , بتشد اللسان لتحت هيفتح معاك بسهولة.




4. حامل اكواب امامي :

به مكان لكبايتين و مكانه مبين الفتيس و مسند اليد , المكانين دول علي عمقين مختلفين يعني واحد غويط ياخد طفاية السجاير مثلا او كباية عادية و التاني اغوط ياخد ماج او بيبسي حجم كبير من ماكدونالدز , اه سامع واحد بيقول ان ممكن بيبسي ماكدونالدز ميدخلش في الفتحة بتاعة الحامل اقوله اه انا نسيت اقولك انا النقطة دي مفاتتش علي اخوانا اليابانيين و عملولك البلاستكة اللي في النص دي تقدر تشيلها و تغير مكانها بحيث تكبر حجم حامل من الاكواب علي حساب التاني و تشرب البيبسي من غير متوقع علي نفسك و لا تعمل حادثة .



5. طفاية سجاير :

انا عن نفسي مش بدخن , فمخصصها لاخوانا المناديين لزوم الفكة و كدة , بس خدو بالكم يا اخوانا الموسوسين ان الفكة دي ممكن تشخلل و تعملك هسهس و ربنا يكفينا شر التزييق .

6. مسند يد امامي :

مسند يد متنجد لراحة ايدك و به فرش نفس لون الفرش الاصلي سواء بيج او اسود, المسند طبعا به سلايد يعني ممكن تجيبه لقدام و لورا حسب راحتك, و الاجمل انك ممكن تفتحه علي درجتين.
الدرحة الاولي مكان تخزين عشان المحفظة او اوراق , والدرجة التانية مخرن جمييل ممكن تحط فيه برفان او اي حاجة حجمها كبير, فعلا عملي جدا و حجمه مناسب .





7. اماكن تخزين بالابواب :

عندك اربع ابواب في العربية , نسيبهم منغير منخزن فيهم حاجة !! اكيد لأ .
حضرتك هتلاقي في كل باب مكان طويل للتخزين منقسم لجزئين مكان تحط فيه ازازة مياه و مكان بالطول ممكن تحط فيه اوراق او كتب.



8. درج تخزين امامي Glove Box :

درج جميل و تصميمه رائع , و مكان اللسان اللي بتفتحه بيه علي الشمال يعني قريب منك وانت سايق منتاش محتاج تميل او تشب عشان تفتح الدرج.



9. اماكن خلفية لتخزين الموبايل :

في البابين الخلفيين مكانين لوضع الموبايل بجانب زرار الزجاج



10. مكان تخزين خلفي :

مكانه في ضهر مسند اليد الامامي و ممكن طبعا تحط موبايل اومفاتيح



11. مسند يد في الكنبة الخلفية بحامل اكواب :

اشمعني انت يعني يبقي عندك مسند يد و تشرب بيبسي لوحدك , كل اللي عليك هتشد اللسان بتاع المسند هينزلك مسند مبطن مريح هتسند عليه ايدك و تحط مشروبين فيهم.



12. شنطة العربية :

طبعا شنطة العربية بحر عميق يقدر ب 470 لتر و الميزة بتاعته انه مش ماثر علي حجم العربية ولا القاعدة الداخلية المريحة جدا . الشنطة مزودة بدراع داخلي لسهولة الغلق و عشان تقفل من غير متوسخ ايدك و فيها هولدر او علاقة عشان لو معاك كيس او شنطة و عاوز تعلقه .
طبعا الشنطة شغالة مع السنتر و فيه زرار بتدوس عليه من برة لو عاوز تفتحها بدوسة خفيفة جدا عشان لو معاك حاجات كتيرو شايلها و مش عارف تتحكم فتفتح بمنتي السهولة



اهم حاجة بقا في كل ده , هو المساحة الداخلية و القاعدة جوة العربية اللي زادت 10 سم طول داخلي تخيلو 10 سم ! يعني حضرتك تقعد و تبرطع جوة .
بصراحة المساحات متناسقة و اماكن التخزين متعددة و متنوعة في المساحات و موزعة بطريقة لا تضر المساحة المتاحة للركاب و راحتهم .

ودمتم فى امان الله.