الموضوع: المساعده في الاختيار بين Accent RB , Gen 2 , Aveo , 301

السلام عليكم جميعا

مقبل علي شراء عربية جديده و محتار و مش قادر اقرر او اختار مين الافضل

Accent RB

Proton Gen 2

Aveo

301

العربيات كلها في ميزانيه من 100 الي 130 الف جنيه

شخصيا حابب جدا الـGen 2 و شايفها عربيه شبابية و ممتازه بس خايف جدا من قطع الغيار و الصيانة و الوكيل عز العرب , برضه معنديش فكره علي شنطتها واسعه و تشيل و لا ضيقه زي ما شكلها ما بيقول ,, ممكن برضه اختها الـPersona علي حسب القرار النهائي بس مش هتفرق كتير اللي يمشي علي الـGen 2 يمشي علي الـPersona

الـAccent واطيه علي الارض و بتحك و اكتر من حد قاللي زي الورق و مش بتستحمل الخبطات بس طبعا ميزتها انها هيونداي و وراها وكيل كويس الي حد ما بناءا علي تجارب سابقه مع غبور في النترا

Aveo مش عجباني و مش حاببها و ميزتها انها عالية عن الارض و وكيلها منصور و قطع الغيار متوافره ,, الشكل الجديد زود كرهي فيها اكتر لأنه حسيت انهم بينصبوا علينا لما يغير نص العربيه اللي قدام و باقي العربية زي ما هو ما اتلمسش ف ضحك علي الدقون بالبلدي

بيجو 301 ماكانتش في حساباتي ولا كنت اعرف سعرها ولا اي حاجه عنها و عرفت عنها بالصدفه ,, لكن طبعا الواحد هيسمع نفس الكلام بتاع الفرنساوي قطع غياره غاليه و الوكيل و مش الوكيل و الكلام ده كله

يهمني في العربيه انها تكون عالية عن الارض و استهلاك البنزين معقول ,, توافر قطع الغيار و الصياننة و وكيل محترم

يا تري تنصحوني بأيه ؟!

شكرا جزيلا لجميع مشاركاتكم

كالعاده الناس كلها بتنصحني اخليني في الهيونداي لتوافر قطع الغيار و سهوله الشغل فيها و الكلام اللي كلنا عارفينه ده ,,, لكن كله بيقول ان الاكسنت ار بي واطية جدا علي الارض

بالنسبه للبيجو برضه نفس الكلام اللي بيتقال كل مع كل الفرنساوي ,, قطع غيار غاليه و صعب الصيانه و اسعار التوكيل غالية في كل حاجه و نفس الكلام علي الستروين

بالنسبة للجين 2 مع انها اكتر واحده انا مقتنع بيها لكن صعوبه اعاده البيع و برضه عدم توافر قطع الغيار و الوكيل عز العرب خلاني اشيلها خالص من حساباتي

الافيو , خساره يندفع فيها 102 الف

ظهرت في الصورة الكيا ريو سيدان ,, واحد صحبي بيقوللي خليجي اعلي حاجه و ندخلها التوكيل و ندفع 2000 جنية ,, الله اعلم مدي صحة الكلام ده

طبعا كل اراء الناس اللي حواليا بتقوللي خليك في المضمون و المعروف اللي هو الاكسنت الار بي

يا تري ايه رأيكم ؟؟!!