شكر للأعضاء , كشف c4 , صيانة الستين

**SAWA1SAWA** · 08-03-2014 09:37 AM

الحمد لله اشتريت c4 2007 وربنا جعل المنتدى هو السبب فإلى كل من استفدت من مشاركاتهم " جزاكم الله خيرا " وبالأخص الباشمهندس أحمد عادل ربنا يباركله لأنه أفدنى كتير .

أنا بصراحه شارى من حوالى شهرين واشتريت بالغالى لأنها كيلومترات قليلة , بس كان نقل خبط العربية من ورا وجت بسيطة الحمد لله لكن ضيع فرحتى بالعربية شوية علشان كده بقالى فترة بعيد عن المنتدى .

وأنا حابب برضوا أفيدكم زى ما أفدتونى بمركز صيانة محترم كشفت عنده - هو مهندس فى الهرم كان أقرب واحد لمالك العربية السابق وكان شغال فى التوكيل وراجل مهذب وعنده ناس فاهمه وفنيين شاطرين وفيهم دارسين ميكانيكا سيارات ومعاملتهم فوق الممتازة , والأهم إنه متخصص بيجو وشفت عنده عربيتين ستروين c4 غير بتاعتى وأسعاره على حد وصفه بينافس بيها.
السلبية الوحيدة إنه معندوش سمكرة وعربيتى كان فيها خبطات جامدة فى الصاج عرفتها من بره والمالك للأسف كدب طبعا بس هيه الحمد لله فبريكه دواخل - لكن ميكانيكا أو كهربه أو عفشة شغل المركز كويس والظاهر إن إيده فى العربية على طول .

وعلشان مشاركتى تبقى فى موضوع واحد هكتبلكم صيانة الستين وأى حد عايز مركز الصيانة ده يبعتلى على الخاص وهكتبله تليفونه علشان ما حدش يقول إن ليه مصلحه أو بعمل دعاية ( أول مرة أشوفه لما رحتله أكشف على العربية ) وأنا لاحظت إن الكل بيكتب عن المهندس المحترم إيهاب جلال والأفضل يكون فيه بدائل , وبكرر شكرى ليكم جميعا

**SAWA1SAWA** · 08-03-2014 10:20 AM

صيانة الستين

وطبعا الأسعار كلها للقطع الأصلية

-- (سير الكاتينة وبلية السير والشداد) 800
-- سير الدينامو 90 وبلية السير 150
-- تيل + طنابير فرامل أمامى 900
وكنت سأله قبلها عن التيل الأصلى لوحده قالى 325 يعنى الطنابير بــ 575
-- تيل + طنابير فرامل خلفى ( فى الصيانة القادمة ومكتبليش سعرهم )
-- بوجيهات 130
-- بلف فتيس 450 , وزيت فتيس 3 ك = 360
-- زيت موبيل ون 10000ك 310
-- فلتر زيت 60
-- فلتر بنزين 60
-- فلتر هواء 95
-- فلتر تكييف 125
-- المصفحة السفلى الفبر 350
-- كارتيرة رفرف أمامى يمين + شمال 300 أصلى 125 تايوانى
-- مقاومة مروحة تبريد بــ 275

**J A G U A R** · 08-03-2014 07:15 PM

الف مبروك ..
بس بعض قطع غيارها غاليه

**hamaka** · 09-03-2014 11:20 AM

أسعار ممتازة بالنسبة للتيل و الديسكات و قطع الفيبر ، بس الباقى مقاربة جداً للتوكيل و الفلاتر مماثلة للتوكيل...بس بشكل عام فى توفير كويس و أكيد المصنعية أقل من التوكيل بكتير ، هو ده ممكن يكون قريب من أمير و جوزيف فى التكلفة و يكون بديل للناس اللى ساكنة فى الهرم و مستغليين التوكيل و مشوار أمير و جوزيف بالنسبة ليهم علقة...عموماً يا باشا ألف مبروك و ربنا يباركلك فيها...