الموضوع: بعد عشره 3 سنين ونص و 83 الف كيلو رأيي فى البريلليانس fsv الأنثى الوحيده فى حياتى

3 سنين ونص.....
83 الف كيلو.....
زكرايات اول يوم اشتريتها فيه ليه فاكرها كانها امبارح لانها اول عربيه ليا
كان اول تعليق اختو على العربيه لما دخلنا البنزينه وقولت لبتاع البنزين يفول واتملت ب 105 جنيه ساعتها منوب المعرض استغرب وقاللى دى الكارينز معملتهاش
العربيه دى شافت معايا ايام حلوه اوى وايام صعبه اوى زفيت بيها ناس كتير وشفت معاها مواقف صعبه وحوادث وعمرها ما خذلتنى حتى الحادثتين اللى عملتهم مكنش زمبها
اول حادثه يو تيرن على سرعه عاليه فى وجود حصى وظلط صغير وخبطط فى الرصيف
وتانى حادثه اسفلت متكسر فى نص الطريق خدناه وطيرنا سوا
انقذتنى فى مواقف كتير وانا اهتميت بيها كتير
انها حقا الانثى الوحيده فى حياتى
طول عمرى نفسى اتجوز واحده زى عربيتى تسمع كلامى ومتسبنيش وتمشى ولما اكون بعيد عنها اى حد غيرى يقرب ليها تصوت وتلم عليه الناس... ايه يا عم هو فى عربيه بتصوت؟؟؟ ايوه لما يكون فيها جهاز انزار
نيجى بقى للجزء والسوال اللى خلاكو تخشو الموضوع عامله ايه معاك العربيه
انا هحاول اعمل تقيم او مقارنه على قد وا اقدر وبناء على تجاربى مع العربيه فى خلال الفتره دى والفئه السعريه ليها
الشكل:
تعتبر اجمل شكل فى فئتها ورغم انى عارف انو ازواق بس مش انا بس اللى رائي كده لان كل اصحابى حبو يتزفو فى عربيتى مع ان فى افيو ولانوس و فيرنا ولوجان
السحب والتجميع:
طبعا العربيه 1260 كيلو فاضيه مقارنه بباقى العربيات اللى فى فئتها 900 تقريبا للفيرنا والافيو و 1100 للانوس بس طبعا الفيرنا الاولى بجداره بسبب متور 1600 وخفه وزنها ودى ملناش دعوة بيها بعدها اللانوس والافيو لحد 60 كيلو والبريلليانس فى الاخر انا عارف بس بعد سررعه 60 هتودع الالانوس و الافيو باى باى وتسد شويه مع الفيرنا بس بردو صعب تطلع منها لو متور الفيرنا فايق واللى سايق بيعرف ينقل امتى
الثبات:
دى بقى النقطه اللى بتعوضلك فرق السحب حتى مع الفيرنا وتخليك تطلع منها
ثبات رهيب لدرجه انها اعلى من السيراتو بكتير لان طبعا لا الفيرنا ولا اللانوس ولا الافيو فيهم ثبات اصلا الا لو معدل
الملفات اللى بعد بوابه القاهره اسكندريه الصحراوى 180-190 عادى جدا وبردو طريق السخنه مبنزلش عن 180
قطع الغيار:
غاليه ومش متوفره اوى بس معمره
الصالون:
اوسع عربيه فى فئتها تقريبا وشنطه كبيره
الفرامل:
طبعا abs & ebd خلوها خارج المنافسه
استهلاك البنزين:
اقل استهلاك فيهم رغم ان القدره الحصانيه ليها قريبه من الفيرنا واعلى من اللانوس و الافيو
وكيلها:
سىء وغالى بس بردو لا يزال افضل توكيل فى مصر
التصليح فى الخارج:
مقرفه لان محدش عارف اولها من اخرها لسه
انا الحمد لله كل اللى غيرتو من ساعت ما جت باستثناء الحادثه
فلاتر و سيور و بطاريه و متور مساحات و كاوتش ولمبات وريش مساحات وتيل وطنابير قدام لانى مشيت على التيل بتاعها 60 الف كيلو فبوظ الطنابير وترموستات كوعهولسه عاوز اجيب بكرتين بتوع التكيف
الاضاءه:
طبعا بالعدسات بتفرش النور وتعتبر احسن اضاءه
الصاج:
محمل وتقيل وبشهاده كل اللى شاف العربيه ويعتبر احسن صاج فى فئتها
العفشه:
ناشفه ومش مريحه جو البلد لكن على طرق السفر مريحه وتحسسكش بتعب
التكيف:
مش زى الفيرنا او الافيو الصراحه بس ده راجع ان مساحه الصالون اكبر
فى النهايه هيا صفقه كويسه اوى
وبنصح بيها اللى بيسافر كتير اكتر من اللى مشواويرو قصيره وفيها تكسير كتير
وللعلم اللى ركب بس العربيه هو اللى هيفهمنى... العربيه دى يوم ما تبيعها مفيش حاجه هتكيفك زيها الا اوكتافيا او فورد فوكاس وانت طالع
يا رب اكون قدرت اشارككم باى معلومه لانى ياما استفدت منكم