الموضوع: تجربتى مع حساس الأيدل فلتر البنزين تنظيف البوابه تنظيف التانك تنظيف الرشاشات بالكلينر

السلام عليكم جميعا




من فتره وأنا حاسس أن سحب العربيه مش تمام(تقيله فى الطلعه) وصوتها مش عاجبنى فقلت لازم أعمل تنظيف كامل لدورة الوقود


بدأت بتغيير فلتر الهوا وطبعا البوجيهات ما عملتش لسه حوالى 3000 كم فمش محتاجه تغيير ولا تنظيف



بدأت بأول مرحله



1 - فلتر البنزين



قلت هاغيره خصوصا أنى شارى العربيه من حوالى سنتين ونص ونظفته مره واحده بس من حوالى سنه ونص المهم رحت محل قطع الغيار وصاحبه راجل محترم جدا فقالى عندى بدايه من 80 جنيه لغاية 160 جنيه بس ليه هوا الفلتر عندك فىيه حاجه قلتله لأ أنا بس عاوز أعمل صيانه فقاللى أنا طبعا عاوز أبيع بس طالما اللى فى العربيه سليم ما أنصحكش وكل اللى هاتعمله أنك هاتنظف الفلتر وأنا كان معايا عربيات لانسر قبل كده وصلت لل 300000 وماغيرتش فلتر نظفته بس وما أشتكيتش من حاجه مع العلم أنه تاجر عربيات وشغال قطع غيار جديد وتقطيع



طب مين ينظفه قاللى على نفس الميكانيكى اللى كنت منظفه عنده قبل كده المهم روحتله لقيته عنده شغل كتير وأدانى ميعاد تانى يوم فأنا بصراحه كان مزاجى وحش ولما يبقى مزاجى وحش بحب أشغل نفسى فى أى حاجه



فقلت أنا هنظفه بنفسى المهم أشتريت عده وأنا طبعا شايفه وهو بيتنظف قبل كده بس برده عملت سيرش فى نايل موتورز وفهمت كويس و توكلت على الله وفكيت وكله تمام ببص فى التنك لقيت تحت الطلمبه رواسب كربون كتير ورمل والتنك فيه تقريبا صفيحة بنزين فقلت ما بدهاش جبت خرطوم وفضيت التانك وخلصت على اللى فيه بكوبايه و كملت بسفنجه نظيفه وخليت المربع اللى الطلمبه بتاخد منه البنزين بيلمع بعد ما شيلت منه كل حاجه



خدت الفلتر والطلمبه بعد ما فكيتها من الفلتر وروحت لبتاع الكاوتش خليته يننظف الفلتر بالهوا عكس الأتجاه طبعا الفلتر نزل بلاوى سوده (رواسب كربون) ونظفت المصفه بتاع الطلمبه ورجعت ركبت الفلتر وقفلت عليه كويس وصفيت البنزين بقماشه نظيفه وحطيته فى العربيه تانى وتمام دورت الحمد لله كله تمام قلت أدخل فى تانى مرحله



2 - تنظيف الرشاشات بالكلينر



أشتريت منظف رشاشات أسمه apro سعره تقريبا 20 أو 25 جنيه مش فاكرروطلعت على وطنيه حطيت المنظف وحطيت عليه 15 لتر بنزين دا غير أن العربيه كان فيها كمان حوالى 12 لتر غير الأحتياطى وقلت أنا لازم أحرق البنزين ده النهارده علشان ما يباتش فى العربيه ويبوظ حاجه فى الوصلات أو الخراطيم (خصوصا انه مكتوب عليه أنه بيتحط على فول تانك وأنا حطيته مركز علشان ما يباتش ) للأسف ما لحقتش أحرق غير حوالى 10 لتر



تانى يوم قولت لازم أحرق البنزين اللى فاضل سافرت وبدات أحرق وأقرص على العربيه والسحب الحمد لله بعد تنظيف الفلتر اتحسن كويس جدا لدرجه أنى كنت ماشى على سرعه 170 على rpm 4,75

مع العلم ان العربيه 1300 أوتوماتيك وطبعا عندى مسمار تحت الدواسه أنا متاكد لو شلته ممكن أقفل العداد المهم فعلا حرقت وقرصت على العربيه ورجعت والمؤشر ما فضلش غير الأحتياطى فولت وتمام وأتبسطت من أداء العربيه جدا



بس طبعا بعد الكلينر أكيد فى كربون ورواسب أتحللت ودخلت تانى فلتر البنزين فلازم يتنظف تانى فروحت المغسله فكيته وفكيت الطلمبه منه وجبت بنزين ومنظف كاربراتير وفضلت أنا وصاحب المغسله نملى اللفلتر بنزين وبعدين نديله هوا بالكمبروسر عكس مسار البنزين وبعد البنزين نفس الحركه بمنظف الكاربراتير لغاية ما نظف تماما بعد أكتر من 20 مره ونل منه بلوى أكتر من المره اللى فاتت العربيه أتغسلت وغيرت فلتر الزيت وغيرت زيت وقلت أدخل على تالت مرحله



3 -تنظيف البوابه وحساس الأيدل



الموضوع ده أنا عملته قبل كده مرتين بس ما فكيتش الحساس جبت قماشه نظيفه ومنظف كاربراتير مع أنى عارف أنه غلط على الحساس تحديدا بس جازفت لأنى شفت كهربائى قبل كده بينظفه بالبنزين



فصلت الكابل السالب بتاع البطاريه و فكيت العمه و فكيت ال 3 مسامير بتوع الحساس وشديت الفيشه بتاعته وطلعت الحساس رشيت عليه منظف الكاربراتير ونظفته بالقماشه وسبته ينشف وبعدين جبت القماشه لفيها على المفك وأبتديت أنظف البوابه أرش المنظف وأنظف بالقماشه وهى ملفوفه على المكف نظفت الجزء اللى قبل البوابه تمام وبعديت ابتديت أعشق مفك تانى بره علشان يفتح البوابه وأبتديت أرش وأنظف بالقماشه الجزء اللى بعد البوابه على أد المفك اللى ملفوف عليه القماشه ما يجيب معايا وطلعت بلاوى من جوه



وبعدين سبت البوابه حوالى نص ساعه لغاية مايطير المنظف وأستغليت النص ساعه دى فى تنظيف العمه برده بالأسبراى وفلتر الهوا طبعا جديد فماكانشى فيه أى حاجه محتاجه تتنظف بالهوا أستنيت شويه برده لغاية ما كل حاجه نشفت وأبتديت أجمع كل حاجه وأركبها مكانها وركبت فلتر الهوا (بأحكام) وقفلت العمه ووصلت البطاريه ودورت الحمد لله دارت



بعد 5 دقايق مع أنى المفروض كنت أستنى أكتر من كده بدأت أعمل أيدل ليرن وأحمل كل حاجه على العربيه واحده واحده المهم شغلت التكييف وزودت بنزين لغاية rpm 5 حصل اللى ما كنتش عامل حسابه العربيه وطيت جدا علىrpm ,4 وأبتدى المؤشر يتحرك لفوق ولتحت والعربيه هاتبطل قلت يمكن أمر غلط ولا حاجه فكيت الكابل السالب 15 دقيقه وبعدين وصلته ودورت بقت كويسه شغلت التكييف ودوست بنزين تانى نفس المشكله




طبعا انا عارف ان تنظيف الحساس بمنظف الكاربراتير غلط علشان بيسيب طبقه على الحساس ممكن تدى أوامر غلط والصح هو منظف الألكترونيات فروحت أشتريت منظف من ده أسمه akai ب 10 جنيه وفكيت الحساس تانى ونظفنته بيه ونشفته وكويس ودورت لكن للأسف نفس المشكله العربيه بتدور بس لو ما زودتش بنزين تبطل فكيت حساس الماب ونظفته برده مفيش فايده ونفس المشكله




قلت حتى لو الحساس أشتغل لازم أغيره لأنى ما أضمنش ممكن يعملها تانى وفين




روحت محل قطع الغيار فبيقولى غالبا الحساس سليم ونادرا لما بيبوظ من التنظيف قلتله مش مشكله كده أو كده هغيره فقاللى نجربه قلتله لأ هات حساس أستعمال قاللى مفيش أستعمال فى جديد قلتله ماشى ركبناه ودورت العربيه وعملنا أيدل ليرن كله تمام مشيت بالعربيه أبتدى ال rpm يظبط





أول مره أشوف ال rpm على 8, والعربيه صوتها هدى جدا والسحب ما شاء الله أتحسن فوق الوصف يعنى الحمد لله أنا حسيت أنى راكب عربيه زيرو





أه أنا تعبت لأنى تقريبا أول مره أشتغل بأيدى فى العربيه




وبوظت الحساس



وكسرت مسمار من مسامير الطبه اللى بتربط على فلتر البنزين



بس الحمد لله النتيجه الحمد لله ممتازه فعلا كأن العربيه رجعت زيرو

المشاركة الأصلية كتبت بواسطة hhhhhm

متشكر جدا على الرد


العربيه عامله 185000 كم


فعلا الفلتر الأصلى فى التوكيل ب 700 جنيه ده تقريبا غير الضريبه أما الفلاتر اللى كانت موجوده فى محل قطع الغيار كانت صينى وتايوانى وتايلندى تقريبا


موضوع الطبه ده أول مره أعرفه ومتشكر على المعلومه القيمه


أما فك البوابه كامله فده كان هيبقى صعب عليا جدا لأن أنا تقريبا أول مره أشتغل بأيديا فى العربيه بس طبعا وارد أن ده يحصل أن شاء الله فى الصيانه اللى جايه


على فكره موضوع فك الفلتر والطلمبه ده سهل جدا لاحظ أنى فكيته مرتين بس فيه حاجتين لازم تاخد باللم منهم
أول حاجه تتعامل بعقل مع المسامير علشان مفيش مسمار منهم يقطم منك زى ما حصل معايا والفلتر ليه وضع معين وأنت بتسقطه فى التانك بيديك فرصه أن المسامير تكون سهله معاك وانت بتربط أو وأنت بتفك بعد كده وأنا طبعا لقيت تحت الكنبه رمل كتير جدا بعد ما قفلت الفلتر جبت المكنسه الكهربا ولميته كله


تانى حاجه فى جلده مدوره سوده كده بين الفلتر والطلمبه بيركب فيها راس الطلمبه فى الفلتر لازم تفكها قبل التنظيف بالهوا لأنها وقعت منى فى المغسله ودودورنا عليها كتير جدا والحمد لله لقيناها

فعلا محدش بيتعلم ببلاش بس حقيقى أنا مبسوط جدا من اللى عملته وفاكر أول مره نضفت فيها فلتر البنزين عند الميكانيكى كان محسسنى أنه كبير مهندسى شركة ميتسوبيشى هههههههههههههههههههههه




حقيقى الشغل بالأيد مع أن غلطاته كتير وممكن تيجى تعمل حاجه تبوظ جنبها حاجتين تلاته وتغرم بس متعه

ربنا يباركلك فيها ...
رايى الشخصى ..... الحاجات الداخلية الى مش بتتغير كتير ... من المستحسن انك تركبها اصلية ... زى فلتر البنزين و فلتر الزيت و قواعد الموتور

تيل الفرامل و فلتر الهوا و فلتر التكييف ... ممكن حضرتك تجيبهم تقليد

معلومة الطبة لسة عارفها جديد :)

فك حساس الايدل هو الاصعب .... فك البوابة اسهل كتير ...4 مسامير تفكهم و البوابة تكون برة .... و تخلى بالك من الجوان

المرة الجاية ان شاء الله حتشجع و اشربلى 2 بيريل ا فتح التانك و انظفه

الشغل بالايد ليه متعة خاصة ...
ربنا يوفقك