الموضوع: الى كل مالكي نيسان.... احذرو الصيانه في فرع الضراسة..

السلام عليكم ورحمة الله وبركاته.... بصو يا جماعة .. اقسم بالله كل اللي هكتبو حصل بالفعل... علشان دي امانة وربنا هيحاسبني...
انا حجزت صيانة الالف في فرع الضراسة... المهم رحت وكان معادي 9:30 اول مارحت خدت الضمان ودخلت الاستقبال لشاب كده بنضاره وقصير شوية المهم قولتلو على كل ملاحظاتي ومنها ان العربية بتحدف يمين على خفيف وانو يفعلي الانذار واني حاسس ان الباور تقيل سنه.... المهم استلم العربية مني وطلعت في الاستراحة شوية لاقيت المسؤول وهوا شاب طويل كده ورفيع وبنضارة واعتقد انو الريس بتاعهم ... هوا شبه خالد ابو النجا... لاقيتهم ندهولي وقالي اركب حضرتك مع المهندس هيجربلك العربية المهم اول ما ركبت وكان المهندس ده اسمو احمد فوزي..بعد ما اتعرفت عليه طبعا.... لاقيتو بيقولي الف مبروك يافندم على العربية المهم قعد يجربلي كل حاجة وقالي انا ظبتلك كل حاجة وشدتلك العفشة بص روقتلك العربية ..حسيت اني بكلم صنيعي في الحرفيين وكل شوية كان بيقولي واللي حضرتك تؤمر بيه... المهم عملت نفسي من المريخ.. لاقيتو قالي انت مش هتعمل معايا واجب ولا ايه يا باشا لحسن الواحد هنا 7 صنايع والبخت ضايع والمرتبات مش اد كده... مكنش معايا فكه ساعتها... قلتلو اقف هنا فوقفني عند كشك .. ونزلت فكيت 100 جنيه واديتو في جيب البلطو اللي كان لابسو غ 50 جنيه... وقالي ياباشا انا تحت امرك في اي حاجة جوه... وانا هنا هظبطك بس انت تكلمني وتقولي انك جي قبلها ولو فيه اي حاجة في العربية كلمني وانا هظبطهالك بدون ما افتح جوووب... المهم انا اساسا مش عارف يعني ايه يفتح جوب.. ووصاني وقالي ارجوك ياباشا محدش يعرف اني اديتك رقمي انا جربتلك العربية بس لحسن لو حد عرف هيمشوني علطول.... المهم يا جماعه انا طبعا كنت على اخري وفضلت افكر اخش اقلب عليه الدنيا ولا اسكت... وخصوصا اني اديتو فلوس... وبصراحة انا مكنتش عايز اديلو ولا جنيه بس قولت العربية هتخش معاه تاني فممكن يبوظلي فيها اي حاجة ... وثانيا استحرمت اضرو خفت لحسن يقطعو عيشو.... المهم تفعيل الانذار بي 150 ومعرفش اذا كان اتفعل ولا ﻷ... وانا حطيت زيت موبيل 5000 .. زي ما الاخوة نصحوني ... واجمالي الفاتورة 370 جنيه بتفعيل الانذار.... ولافيه غسيل للعربية ولا هم يحزنون...

يا كبير انت ال دفعت - خلاص الفلوس اندفعت و ربنا يسهل للاخذها . سواء كان يستحق الحسنه او لاء .
انت طلعتها ليه لانه اشتكي لك ظروفه وان راتبه ضعيف وكلام من ده
فعتبرهم لله بدون مقابل وروق بالك .
بس خلي بالك من اي حاجه تكون في السياره ( موبيل - فلوس - مفتاح ) لما تكون ف التوكيل او اي مكان