الموضوع: صيانة 60 ألف كم خارج التوكيل

اشكرك يا باشا على المعلومه، انا دخلت فعلا على الصفحه و لفيت فيها شويه لقيت تكلفة صيانة ال 60 الف عند برازيلي 1300 جم، بس بصراحة قلقان من موضوع تركيب السيور ديه ناس كتير مخوفاني ان الموضوع مش سهل في الرينو و ممكن تبقى فيها مشاكل كتير لو اتركبت غلط خاصة الكاتينه ، سالت انا على تكلفة تركيب السيور فقط في التوكيل لقيتها ب 1600 جم، بصراحه محتار و عاوز مشورتكوا

هى العربيه للوجان صيانتها غاليه ممكن اعرف سعر صيانات اللوجان لحد 100 الف كيلو

لو مكانك مش هاخاطر بصيانة فيها سير كاتينة ممكن تجيب موتور بسببها لو اتعملت غلط علشان اوفر 500 جنيه

عايز تجرب اي ميكانيكي او مركز خدمه جربه فى اي صيانة تانية ميكونش فيها سير كاتينة

انت شاري رينو وعايز تصلحها عند ميكانيكي فى الشارع!!!

المشاركة الأصلية كتبت بواسطة a_nbm

تصدق بالله ...؟ برازيلي عاملي صيانه الستين الف دي وهو مغمض ... هههههههه
بجد والله مش بهزر ... برازيلي دا الوحيد اللي بأمن ع العربيه معاه بعد التوكيل
طبعا لما سألت ع سعر الصيانه في التوكيل قالولي 2700
قلت مفيش غير النجم برازيلي والحمد لله العربيه زي الفل

ربنا يباركلك فيها، و فعلا في ناس كتير بتشكر فيه و بيقول انه كان شغال في توكيل رينو فرع العامريه، مش عارف اذا كان صح و لا لا، بس لما كلمته في التليفون حسيته فاهم، ربنا يقدم اللي فيه الخير، و شكراً لرد حضرتك

المشاركة الأصلية كتبت بواسطة walidzakzok

لو مكانك مش هاخاطر بصيانة فيها سير كاتينة ممكن تجيب موتور بسببها لو اتعملت غلط علشان اوفر 500 جنيه

عايز تجرب اي ميكانيكي او مركز خدمه جربه فى اي صيانة تانية ميكونش فيها سير كاتينة

انت شاري رينو وعايز تصلحها عند ميكانيكي فى الشارع!!!

بص يا باشا اللي حضرتك بتقوله ده كلام سليم 100 % و كان بيدور في بالي بالملي، لكن عرفت مؤخرا ان مشكلة تركيب سير الكاتينه بتكون بسبب ان لما بتشيل سير الكاتينه القديم التروس بتتحرك و بتخلف تقسيمه الموتور لما بتركب السير الجديد لا قدر الله و ديه بتؤدي لكسر الصبابات، لحد اما عرفت المعلومه ديه قولت هعملها في التوكيل لكن عرفت برضه ان موضوع التروس اللي بتتحرك ديه في الاوتوماتيك مش المانيوال و برازيلي لما كلمته فهمت من كلامه انه فاهم المواضيع ديه خصوصا انه بيقول انه كان شغال في توكيل رينو فرع العامريه يعني فاهم هو بيعمل ايه مش اي واحد و خلاص و اللي بيطمني ان ناس كتير اتعاملت معاه و بتشكر فيه، شكرا لرد حضرتك

المشاركة الأصلية كتبت بواسطة islamaaa

توكل علي الله وروح لبرازيلي كل الناس بتشكر فيه
انا متعاملتش معاه عشان انا لسه ف الضمان بس ناوي ان شاء الله بعد ما اخلص الضمان اتعامل معاه هوه
وعلي فكره صيانه الستين دي مش حاجه صعبه قوي زي ما الناس متخيله طالما الميكانيكي فاهم شغله

بالظبط المعيار هنا زي ما حضرتك بتقول ان الميكانيكي يكون فاهم شغله، شكرا لرد حضرتك و النصيحه

احب اوضح اني لما كلمت برازيلي قالي ان تكلفة صيانة ال 60 الف 1300 جم، و طقم الكاتينه بنجيبه من التوكيل و ده شئ طمني اكتر في البرازيلي، لانه لو كان قالي نجيب السير من عند عم ابو علي( اي محل يعني ) كنت هعملها في التوكيل عشان كنت هبقى شاكك، عموما اناقرت اني اتعامل مع البرازيلي في الصيانه و ربنا يقدم اللي فيه الخير، و هبقى اقولكوا ايه اللي حصل لما اخلص ان شاء الله