الموضوع: احذروا من التعامل مع مركز وهدان للصيانة

الشكوى دي في مركز صيانة السيارات " المراكز الإلكترونية لخدمة السيارات" اللي معروف باسم مركز وهدان.
القصة بدأت من شهر وأنا كنت بدور على عربية سكودا فبريكة مستعملة استعمال بسيط على الانترنت, ولقيت واحدة عجبتني جدا شكلها انها نضيفة جدا وماشية حاجة بسيطة.
المهم زي أي حد في الدنيا بيكون عاوز يشتري عربية مستعملة نضيفة, بيروح بيها التوكيل أو مركز صيانة رسمي للماركة بتاعة العربية علشان يكشف عليها ويفحصها فحص كلي.
صاحب السيارة كان قاضي في المحكمة وأصر إنه يروح مركز وهدان ده للكشف بحجة إن العربية على طول بيتعملها الصيانة الدورية فيها. المهم وصلنا هناك وكان واضح جدا إن الناس كلها هناك أصحاب القاضي ومدير الفرع ووهدان نفسه صاحب المكان أصحابه جدا.
المهم التقرير طلع إن العربية فبريكة بالكامل ومية مية وملهاش أخت, فقولت أتوكل على الله واشتريت العربية مع ان صاحب العربية بالغ جدا في ثمنها بس قولت تستاهل.
وبردو زي أي حد رحت لشركة تأمين علشان الأيام السودة اللي احنا فيها دي, وفوجئت بالوثيقة مكتوب عليها إن لا يجوز التأمين, ولما سألت عن السبب, طلعت العربية كانت عاملة حادثة كبيرة قوي واتباعت في مزاد من وحدة الهلاك الكلي في شركة التأمين!!!
رحت تأكدت من الكلام ده من المرور ورفعت العربية في بنزينة وقاللي نفس الكلام, إنها عاملة حادثة كبيرة وراشة برة في كل حتة!!
المهم قمت راجع لمركز وهدان النصابين دول, ودخلت عليهم دخلة أنا عاوز أفحص السيارة من غير ما أقولهم أنا مين ولا ايه مشكلتي. جالي مهندس, وبصباعه لف على العربية كلها في دقيقتين وقاللي دي كلها راشة برة!!! طبعا اتخانقت وعملت كل حاجة وجالي مدير الفرع وبكل برود يقولي اشتكي!! قمت كلمت رقم الشكاوى ووصلت لصاحب المكان اللي بكل برود يقولي, معنديش حاجة أعملهالك ونظام ملكش حاجة عندي وارجع للراجل اللي باعلك العربية!
رحت بعدها اشتكيت لشركة Artoc Auto اللي ماسكة التوكيل في مصر, واعترفوا ان في نصب حصل في الموضوع, ومع ذلك محدش جابلي حقي اللي اتاكل من شركة النصابين وهدان دول. طب ايه الفرق بين اني اكشف عند سمكري ولا بنزينة ولا أروح التوكيل وادفعلي 400 جنيه ثمن التعرض لنصب؟!
قولت ساعتها مفيش إلا اللجوء لحماية المستهلك, وفعلا قدمت شكوى والناس مشكورين بعتوا لشركة وهدان إستعلام. وطبعا صاحب مركز الصيانة المحترم بدلا من إنه يقول أي كلمة اعتذار, اتصل بي يهددني ويقولي انه هيرفع علي قضية تشهير!!
دول عالم نصابين لا عندهم ذمة ولا ضمير والله أعلم خدوا رشوة ولا اتكوست ولا ايه اللي حصل!
أنا حاطط أهو التقرير بتاع وهدان بختمهم وكل حاجة وتقرير شركة التأمين اللي بيقول ان العربية دي مكهنة ولا يجوز التأمين! أنا بس شلت أرقام العربية والشاسيه وسبت الحروف علشان الناس تطابق وتشوف