الموضوع: عندي شوية ملاحظان علي 301

هو اكيد انتى تقصدى motor brake مش كيك داون و لو كده يبقى اعذرينى و تقريبا كنت فاهم الكيك داون غلط :)

اما بالنسبة للتجميع حضرتك فكل الاوروبى تقريبا فيه نفس الموضوع تجميع معتدل فى السرعات الاولى و دى احد عوامل الامان اما لو عايز تجميع سريع ممكن حضرتك تعمل كيك داون :) هتلاقى العربية زئيرها يعلن عن انطلاقة قوية.

اما من ناحية الدواسة فده يختلف من شخص لشخص و اسلوب قيادة حضرتك مثلا لو بتحب تضم اوى على الدركسيون هتلاقى الموضوع ده مسببلك ازمة اما لو بتحب ترجع الكرسى لورا اوى فوضع رجلك ممكن يكون اريح و يمكن بعض الناس تعتبر ده ميزة لو ليهم فى الشد و الجذب و الغرز و الحاجات دى لان ده معناه وصول اسرع للفرامل و العكس.

شكرا لردكم انا بس عاوز اوضح نقطة اللي بتقولي عليها انه هيبقي غلطان المشكلة ان احنا بنمشي ومش بنسيب مسافات كبيرة بين العربيات والدائري ما يعلم بيه الا ربنا وربنا يستر طريقنا جميعا فلما الموتور بعمل motor breake زي مانتم قولوتوا بتبقي مشكلة فبحاول ساعتها اني اعمل كيك دوان علشان الحق نفسي

المشاركة الأصلية كتبت بواسطة ashraf fawzy

أنا عندى نفس النوع و الموديل - بيجو 301 هاى لاين

بالنسبة لرقم (1) عندى نفس الإحساس, و بصراحة هو شبه مؤكد مش إحساس, و خصوصاً لو مشغل التكييف, فببقى مضطر اقرص على دواسة البنزين خصوصاً لو فى ملفات اليو تيرن أو طالع من شارع جانبى لشارع رئيسى و العربية كانت فى وضع الوقوف التام.

بالنسبه لرقم (2) مجربتهاش فى مطلع, بس هى فعلاً سرعتها بتنخفض بطريقة ملحوظة لما اشيل رجلى من على دواسة البنزين و من غير ما أدوس فرامل, بس مش متذكر مدى سرعة الإنخفاض, هاجرب بكره و انا راجع ان شاء الله.

بالنسبة لرقم (2) أظن ده ممكن يكون عامل أمان فى السيارة لسرعة الفرملة, فبمجرد ما أشيل رجلى من على دواسة البنزين الكمبيوتر فى العربية بيحاول يستفيد من الوقت - خلينا نقول نصف ثانية - لتهدئة السرعة و إعدادها للفرملة (ده لو انا هادوس فرامل).


* ملاحظة: واحد معرفة لما جيبت العربية قالى فى الأتوماتيك عموماً يفضل إن رجليك إما تبقى على دواسة البنزين أو الفرامل عشان كمبيوتر العربية يبقى فاهم انت عايز إيه و يظبط إعدادات العربية وفقاً ليها. دلوقت العربية مش زى زمان مجرد أجزاء ميكانيكيه بتتحرك وفقاً لمعطيات سائق السيارة, دلوقت فى برامج معده مسبقة للتدخل و التعديل فى الإجزاء الميكانيكيه للحفاظ على توازن السيارة بالإضافة لمعطيات سائق السيارة.


بالنسبة لرقم (3) ماعنديش فيها مشكله, دى بتبقى حاجه تقديريه و تختلف من واحد للتانى.



الحاجات اللى فعلاً مضايقانى فى العربية:

- مافيش قراءة - مقياس - حرارة الماتور, لما حرارة الماتور توصل لدرجة الخطر, لمبة فى التابلوه هاتنور و كمبيوتر العربية هايقلك وقف العربية (وده اللى حصل معايا لما خرطوم ميه الردياتير إتقطع عند عمل ترخيص العربية), الحمد لله لما حصل معايا كنت لسه بركن العربية و ماكنتش ماشى على الطريق.

* المفروض الشركة تعمل تحديث سوفتوير - على الاقل فى الهاى لاين - بحيث يبان درجة حرارة الماتور على شاشة الكاسيت (المالتى فنكشن سكرين) طول الوقت.


- التوكيل مش بيركب نظام الإنذار - الصوتى - ضد السرقة, ولما سألتهم قالوا مالهوش لازمه لان العربيه فيها إموبليزر, تبرير سخيف لان الموديل اللى بينزل أوروبا بيكون فيه نظام التنبيه الصوتى.


- الكبوت ملهوش أى حماية لإنه طالع فى نفس مستوى الإكصدام, فلو عربية راجعه و ريحت على عربيتى - و ده لسه حاصل معايا من كام يوم - الكبوت هو اللى بياخد الضربه مش الإكصدام. وعشان كده هاتلاحظ فى المنتدى إن كل اللى عربيتهم إتخبطت إتخبطت فى الكبوت مش فى الإكصدام, وده مصدر تساؤل للناس اللى لسه ماجابتش العربيه و مش فاهمين ده بيحصل إزاى.

- مافيش شبكة تحمى خرطوم مية الردياتير من إنه يتقطع - و ده حصل مع العديد و منهم أنا - من مروحة الردياتير لما فنى الترخيص ياخد نمرة الماتور, وللأسف الشركة مابتكلفش نفسها تنبه على العملاء من خلال موقعها و صفحتها الإجتماعية (فالحين بس يقولك طلع الفرق ما بين الصورتين, او خمن إيه نوع العربيه من الكشاف بتاعها و كلام فاضى).

- مافيش مساحات زجاج خلفيه, فلو الدنيا مطرت مع تراب و إنت راكن, لازم تنزل تمسح الإزاز الخلفى بنفسك, وده حصل معايا من حوالى إسبوع, و كان شئ مستفز إن البروتون اللى سعرها أقل بـ 30000 جنيه فيها مساحات خلفيه.

* أنا هنا مابعملش مقارنه ما بين السيارات, دى مجرد ملاحظة.


- مافيش مكان تحط فيه الموبايل قريب منك غير المسند - الكونسول - و مافيش اماكن تخزين فى الأبواب غير عند اسفل الأبواب الأربعة. أعتقد إن فى إعتماد على خاصية البلوتوث فى السيارة من حيث الإتصال و استقبال المكالمات و تشغيل و تغيير ملفات الصوت.


- ذراع التحكم فى الكاسيت و الموبايل ورا الدريكسيون, و ده تصميم عجيب جداً و لا يكاد يكون ليه قيمه بالنسبه لى و بالنسبه لكل اللى جربوا عربيتى, انا عن نفسى باستخدم الزراير اللى فى مكان الكاسيت لأنها اسهل. المفترض تكون فى عجلة القيادة كما هو معتاد.


- كل زراير التحكم فى زجاج العربية تحت جهاز الكاسيت - هو اكثر تطور من إنى اقول عليه كاسيت, بس أنت فاهم قصدى - و قدام مكان الطفاية, وده مش معتاد, المعتاد يكون فى باب السائق عشان سهولة التحكم و عشان عينك تكون دائماً على الطريق.


- مافيش غير مكان طفاية السجاير - او بمعنى ادق كوباية السجاير - اللى ممكن تحط فيه كوبايه شاى أو علبة عصير أو تحط فيها الموبايل (على شرط يكون 4 بوصه او اقل).


- الكرسى مفيهوش مجال كبير للحركة العمودية لدعم فقرات الظهر, و ده مخلينى بفكر أشترى مخده لدعم الظهر عشان السواقة لمسافات طويله.


- لاقيت العديد من الأعضاء هنا فى المنتدى بيشتكو من عدم توافر الإطارت بالمقاس و الصناعة الخاص بالسيارة (ميشلان المانى), وإنه هايكون متوفر على نهاية العام.


- مافيش مسند ذراع للمقعد الخلفى و لا حامل كوبايات (ده مش فارق معايا قوى لأنى انا اللى بسوق).

دى تعتبر أهم الملاحظات اللى لاحظتها فى اول اسبوعين جبت فيه العربية (انا استلمتها فى أخر يوم من شهر فبراير اللى فات), و اللى كان من السهوله تجنبها من شركه بيجو, بس خلينا نتكلم بصراحة, لو الملاحظات دى مش موجوده, ممكن سوق العربيات البيجو العالية يقف او على الاقل هاتقل مبيعاته.


بعض الإيجابيات:

لكن كتقييم عام, العربية جميلة فى التصميم, فيها ثبات على الطريق, انا جربتها لغاية سرعة 130 مش اكتر. التصميم الخارجى يجمع ما بين الشبابيه (الشكل الهجومى للإكصدام الأمامى) و الكلاسيكيه الحديثة المتمثله فى الكشافات الأماميه و الخلفيه بدون المبالغة اللى إنتشرت فى الاعوام الأخيرة (عين النمر , عين التنين , و عين الحسود ).


الفرامل بسم الله ما شاء الله قوية و العربية مش بتعوم او تفقد السيطره لو فرملت من على سرعة عالية - بس مش كبس فرامل. انا جربتها على سرعة 100 ووقفت فى مدى قصير جداً بثبات و بدون ما أحس بأى فقد للإتزان فى العربية.

* التجربه بتاعة الفرملة انا عملتها يوم الجمعة الساعة 6 صباحاً على طريق مستوى و على مدد البصر من قدام و من الخلف مافيش عربيات على الإطلاق و حتى على الطريق المقابل ما كنش فى عربيات. بأكد على إن الفرمله ماكنتش كبس.


الحمد لله صوت المحرك ناعم و مش ملحوظ وغير مؤثر على متعة القيادة و انا ماشى على السرعات الهاديه او العالية.

لما بقرص على دواسة البنزين دفعة واحده و خصوصاً من وضع الحركة البطيئة او الوقوف, صوت المحرك بيخلينى احس إن الإدرينالين بيترمى فى دمى بكميات زياده عن اللزوم, وكأن العربيه هاتطير و تقفز عن الأرض و تنقض على العربيات اللى قدامى. ودى بحس إنها حاجه فيها نكهة العربيات الرياضيه زى البورشا (ربنا يوعدنا كلنا).


* يظل عندى نوع من القلق المستمر من بطء سحب العربية من وضع الوقوف - لو ماقرصتش جامد على دواسة البنزين - فى ملفات اليو تيرن و الخروج من شارع جانبى لشارع رئيسى. و لو قرصت على الدواسة بحس إنها بترمى سرعات ورا بعض بسرعة و بخاف مالحقش اتحكم فيه و اخبط فى اللى طالع قدامى. ممكن اكون محتاج خبره اكتر فى التعود عليها, او تكون محتاجه تظبيط سوفت وير.


عزل العربيه جميل جداً, لما بقفل الزجاج كله و من غير ما أشغل التكييف لا أكاد اكون سامع صوت العربيات اللى ماشيه جنبى - حتى لو ترله / مقطوره - و معظم الوقت بفتح الشباك شويه عشان اسمع الكلكسات و خصوصاً فى المناطق و الطرق الزحمة.


ظبط و تعديل المرايات الكهرباء مريح جداً عن إنك تفضل تعدلها بإيدك من بره.


فى الهاى لاين نظام المالتى فنكشن سكرين سهل الإستخدام و فى مميزات كتيرة و خصوصاً لما توصل موبايلك بالعربية عن طريق البلوتوث, تقدر تضرب رقم المتصل, او تتصفح أخر قوائم الإتصال على موبايلك من شاشة المالتى فنكشن, و تغير ملفات الصوت.


صوت التكييف بيكون عالى شويه بالنسبه ليا - لما بشغله على فوق الوسط وصولاً للماكس - و غالباً باضطر اقفله و إلا مش هاسمع اى حاجه على الطريق و ده ممكن يكون فى خطر عليا و على الناس اللى سايقه جنبى و خصوصاً لما أجى انقل من حاره لحاره و فى الميادين و الملفات اليو تيرن. زى ما قلت العزل بتاع العربيه جميل و انت قافل الشبابيك.


نصيحة: استخدم غطا جلد خفيف للدريكسيون لإنى لاحظت تأثير كبير فى سرعة حركة إرتداد الدريكسيون فى الملفات اليو تيرن لما شلت الغطا الجلد المعفن - معذرة على اللفظ - اللى جبته بأربعين جنيه (مش إستخصار, لكن واحد معرفه هو اللى إختاره).


اتمنى إن الأعضاء يستفيدوا من الملاحظات اللى كتبتها, ولو فى خطأ من جانبى أرجو الإشارة إليه, و إبداء النصيحة فى جوانب الإستفسار (زى بطء سحب العربية).

تقييم روعة تسلم ايديك وياريت لو تعمله فى موضوع منفصل عشان الناس تشوفه وتستفاد اكتر

تقرير ممتاز فى الإنجاز ....
ملاحظ معظم العيبوب تقريبا الى حضرتك شايفها و ذكرتها فى حجات تصميمة فى العربية و ديه شىء كويس لانها بتبقى مسألة نسبية من شخص للتانى و مش عامل مؤثر فى شراء العربية من عدمه :) باأستثناء موضوع موئشر الحرارة ,للأسف معظم فئة السيارات ديه بالشكل ده.....
ليا ملاحظة واحد على العيوب لو تسمحلى .....مافبش عربية سيدان بتنزل بمساحة للزجاج الخلفى (الاوكتافيا و الجين دول مش سيدان) و البيرسونا اخت الجين السيدان مافيهاش :)
شكراً