الموضوع: دليل اختيار قطع الغيار - الاستيراد

استكمالا لمواضيع قطع الغيار الاصلية و البديلة اللى اتكلمنا فيها قبل كدة... النهارة ان شاء الله هنتكلم عن القطع الاستيراد

http://www.nilemotors.net/Nile/405150-a.html

http://www.nilemotors.net/Nile/405871-a.html

كتير مننا بيشترى قطع غيار استيراد لعربيتة... اما توفيرا للفلوس او نوع من انواع الثقة فى قطعة الغيار الاستيراد عن الجديد... القرار دة مش سهل و له ابعاد كتير محتاجة نقاش و توضيح... هل دة كويس ولا وحش؟... هل هو صح ولا غلط؟... ايه الحاجات اللى ناخد بالنا منها و احنا بنشترى و ايه اللى ينفع نشترية و ايه اللى مينفعش نشترية... و امتى نجيب استيراد و امتى نجيب جديد

الاول نعرف ايه هى قطعة الغيار الاستيراد: قطعة الغيار الاستيراد هى قطعة مفكوكة من عربية مستعملة كانت بتستخدم برة مصر

اذا معنى كدة اننا معترفين ان قطعة الغيار الاستيراد "مستعملة" بالتالى الاختيار المنطقى هيبقى دايما انى اجيب القطعة جديدة لان ببساطة شديدة الجديد افضل من المستعمل... دا صحيح بس الموضوع مش بالبساطة دى

الجملة السابقة تسرى على المستهلكات و بالتالى محدش يشترى مستهلكات استيراد... طيب هو يعنى ايه مستهلكات؟؟... المستهلكات هى القطع اللى بتقل كفائتها و عمرها الافتراضى بشكل واضح مع استخدام السيارة

ايوة برضة مفهمناش حاجة....

بشكل مبسط القطعة المستهلكة و الغير مستهلكة زى المسطرة و القلم الرصاص... لو انا اديتك كشكول 80 صفحة و مسطرة 20 سنتى جديدة و قلم رصاص جديد و طلبت منك تسطر ال80 صفحة بتوع الكشكول... بعد ما تخلص تسطير هتبقى ايه حالة المسطرة و ايه حالة القلم الرصاص؟؟؟

المسطرة هتكون زى ما هى... يمكن اتوسخت شوية من القلم يمكن حاجة من الكتابة اللى عليها اتمسحت من كتر استخدامك انها هى هتفضل مسطرة 20 سنتى و شغالة زى الفل

القلم الرصاص طبعا هيكون قصر من الاستخدام و البرى و ممكن يكون اتقصف منك 3 او 4 مرات فا بريتة 3 او 4 مرات زيادة عن الاستهلاك الطبيعى للتسطير

هنا المسطرة تعتبر قطعة غير مستهلكة لانها فى حالة الاستخدام العادى لم تتاثر بالسلب بالشكل اللى يقصر عمرها الافتراضى او يخل باداءها... انما القلم الرصاص مستهلك لانك خلصت منة كمية كبيرة و انت بتستعملة و مش هيبقى فاصل فيه كتير عشان تعيد استخدامة مرة تانية

طبعا لو استعملنا قلم جاف بدل الرصاص القلم مش هيقصر بعد الاستخدام... انما مش هنبقى عارفين فاصل فيه حبر قد ايه قبل ما يخلص (افتكروا المثال دة عشان هيبقى له دور مهم بعد كدة فى الموضوع)

نفهم من الكلام دة ان محدش يشترى تيل فرامل او بوجيهات او سيور او اسطوانة دبرياج او اويل سيلات او جوانات استيراد... دى واضحة و بديهية و مش محتاجة توضيح

يضاف على كدة البلى (عجل او دبرياج و كاتينة) و المساعدين و الجلب و البيض (كل مكونات العفشة بشكل عام) و الطنابير و المساطر العمومية و الدسك و الخراطيم الكاوتش (فرامل او تبريد)... كل الحاجات دى عمرها الافتراضى بيقل مع الاستخدام المباشر للعربية و كفائتها بتقل كل ما العربية قطعت كيلومترات اكتر بالتالى القطعة اللى هتشتريها هتكون كفائها قليلة بشكل اكيد و مش هتقدر تعرف هتعيش معاك قد ايه

و للعلم "الشكل الخارجى" للقطعة ليس له ادنى علاقة بحالتها... انا بشوف صور عربيات برة فى مواضيع خدمة و صيانة و العربيات بتبقى نضيفة بشكل مستفز.. اكنها اصلا زيرو و مبتمشيش... دا لان برة البلاد مفيهاش تراب زى عندنا و بالتالى مفيش طين لما الدنيا تمطر و بالتالى العربيات بتبقى نضيفة جدا جدا جدا... عشان كدة خدوا بالكم من قصة ان حد يشوف نص امامى مثلا نضيف اوى اوى فا ياخد كل مكونات العفشة يركبها عندة... كون العفشة نضيفة لا يعنى انها جديدة او بحالة جيدة... دا فرق نضافة بلد مش اكتر

المكونات الكهربائية كمان تدخل فى المجموعة دى زى البوبينة و طلمبة البنزين... الحاجات دى حتى لو اشتريتها على التجربة و كانت شغالة زى الفل ممكن بعد يومبن تقطع منك... زى القلم الجاف المستعمل كدة... النهاردة شكلة لطيف و بيكتب زى الفل و فى لحظة يفضى منك و شكرا على كدة... اللحظة دى ممكن تبقى بكرة الصبح و ممكن تكون كمان سنتين... انت و حظك

طيب احنا كدة اتعقدنا... يبقى مفيش حاجة تنفع تتجاب استيراد ولا ايه؟

لا طبعا ينفع... الحاجات الغير مستهلكة تتجاب استيراد عادى....

خد عندك كل مكونات جسم العربية... كابوت و شنطة و اربع ابواب و جوز اكصدامات سواء كامل او قشرة فقط... طبعا بشرط ان يكون سعرة معقول... انا فاكر فى مرة كان الكابوت الGM الاصلى ب 885 جنية و الاستيراد فى الحرفيين ب1000 جنية... صباح العبط

و محدش يقوللى عشان بيبقى نفس اللون و مش هترش... عمر ما القطعة الاستيراد بتبقى نفس اللون.. الكلام دة لو عربيتك و العربية الاستيراد لسة خارجين من المصنع امبارح... انما بعد سنين شغل و اختلاف ظروف جوية و عوامل تعرية و خلافة... اللون بيفرق و العربية بتبقى باينة جدا جدا ان فيها باب او كابوت مش نفس لون العربية... يبقى طالما كدة كدة هرش يبقى اجيب الكابوت الاصلى و اوفر فلوسى

ممكن كمان تجيب الفوانيس امامى و خلفى و التابلوة سواء كامل او تاخد منة مكونات... طقم عدادات - طارة - كونسولة - مفاتيح زجاج كهرباء... الخ

طيب معنى الكلام دة كدة اننا منقدرش نجيب اى مكونات ميكانيكية استيراد... صح؟

لا نقدر بس بشروط...

1- لازم يبقى مكون تمنة جديد غالى جدا او مش موجود جديد...

يعنى مثلا موتور كامل ... الموتور الجديد ب25 الف جنية يبقى اكيد الموتور الاستيراد ابو 3500 فرصة هايلة... و لو قسمنا المكنة ممكن نتكلم فى وش سلندر فقط او هيد او وش + هيد او شورت بلوك... كل دى اختيارات متاحة فى الاستيراد و ارخص بكتير من الجديد

نفس القصة للفيتيس... انا معرفش هو زيرو بكام بس اكيد اغلى بكتير جدا من 700 جنية... طبعا الافتيس الاستيراد اغلى و اغلى

علبة الدركسيون جديدة ب 1850 و استيراد ب600 او حاجة كدة... فرق سعر كبير بين الاتنين يصل الى 3 اضعاف

لو جينا مثلا للديفرنسية الخلفى فى اللانوس... صحيح هو جزء من العفشة (قصة المستهلكات و كدة) بس هو شخصيا مفيش فية اى حاجة بتستهلك مع الاستخدام لانة قطعة حديد لا اكثر ولا اقل و الاجزاء المستهلكة فى العفشة الخلفية اجزاء منفصلة تماما عن الدفرنسية... الدفرنسية مش موجود جديد و بالتالى لو لا قدر الله اتعوج فى حادثة بيتجاب استيراد

نفس القصة للدينامو و المارش... صحيح دول مكونات كهربائية انما لما يبقى الدينامو استيراد ب200 و جديد ب1200 يبقى الاستيراد احسن.. الحكمة هنا ان فرق السعر ضخم جدا و بالتالى بالمبلغ اللى دفعتة المفروض بالورقة و القلم الدينامو يعمر معاك سنة و نص او اتنين فقط (بفرض ان الدينامو الجديد ابو 1200 جنية بيعيش 10 سنين) بس فى الغالب بيعيش اكتر من كدة و دة مكسب ليك

طيب ليه مش بنطبق الكلام دة على طلمبة البنزين و البوبينة؟؟... لانهم بيتباعوا استيراد غاليين مقارنة بالجديد و بحسبة فرق السعر المفروض البوبينة و الطلمبة الاستيراد يعمروا 5 سنين بالتقريب و دى مدة معتقدش ان حد عمرة وصل ليها و اذا كان حد وصل ليها بتبقى حالات فردية نادرة مش هى الاساس...

2- لازم يبقى المكون قابل للاختبار بشكل يحدد حالتة

يعنى مثلا المكنة ممكن اعملها اختبار كبس او اجربها اسبوع او اتنين اشوفها بتدخن بتخبط بتاكل زيت فيها اى مشكلة او حاجة تدعو للقلق عشان اتاكد من حالتهاو اتطمن و انا بشتريها انها كويسة

نفس القصة للفتيس بياخد تجربة و جرى و كل النقلات و بيتكشف على الزيت اذا كان فيه رايش و صوتة بيبين فيه بلى وحش ولا لا

انما ماستر عمومى هختبرة ازاى؟... مهو ممكن بكرة يفوت... انا اعرف منين ان حالتة تسمح باستخدامة سنتين تلاتة قدام ولا هبيوظ بكرة الصبح؟؟

بوبينة او طلمبة بنزين... ممكن تبقى شغالة حلاوة و على ما توصل بيتكم تقطع

المساعدين... ممكن تمشى شهر و تضرب زيت بعد كدة

خرطوم مية مثلا او خرطوم فرامل...

3- ان المكون ميكنش مصدر خطورة

يعنى متجيش عند الفرامل مثلا و تجيب استيراد... الغلطة فيها بفورة و الماستر العمومى بيفوت فى لحظة و بدون اى مقدمات... يبقى ليه اخد مخاطرة بحياتى و حياه عائلتى عشان اوفر 200 ولا 300 جنية؟

المكونات الكهربائية زى ما احنا عارفين اما بتشتغل او بتقطع... يعنى البوبينة و الطلمبة ممكن فى لحظة تتوقف عن العمل... انت و حظك بقى تبقى على الدائرى او طريق العلمين... حسب ما تيجى معاك... و الوضع بيبقى اسواء لو عيلتك معاك طبعا

صحيح نفس السيناريو ممكن يحصل و انت مركب المكونات الجديدة لانها فى النهاية مكونات كهربائية بس على الاقل و انت جايبها جديد بتبقى عارف ان لسة قدامها سنين و سنين من الخدمة و مش متوقع ان دة يحصل معاك فى اى لحظة

اخيرا فية كام نقطة كدة احب اضيفهم

- بالنسبة لدورة التبريد... اى مكون فبر فى الدورة متجيبوش استيراد... المكونات الفبر بتنشف مع الاستخدام و بتبقى عرضة للكسر بسهولة بالتالى لازم تجيبها جديد... دة يشمل ماسورة الشجرة و المشترك الصغير و القربة و الغطا بتاعها... بالنسبة للرادياتير هو جزء معدن و جزء فبر بالتالى مش منطقى انك تشترى رادياتير استيراد عشان رادياتيرك الفبرة بتاعتة اتكسرت

اولا الفبرة موجودة جديدة و ثانيا فبرة الرادياتير الاستيراد مش هتعمر معاك اصلا... الرادياتير يتجاب استيراد لو اتخبط او اتخرم فى الجزء المعدن... و هنا يفضل تغير الخزان الفبر قبل ما تركبة

- بالنسبة لكومبريسور التكييف... متجيبش كومبريسور استيراد الا لو الكومبريسور بتاعك تالف تماما و مش نافع... لو روحت لبتاع تكييفات و قالك الكومبريسور محتاج طقم اصلاح و شافت سيل بتكلفة 400 صلحة و متجيبش استيراد مع ان الكومبريسور الاستيراد بنفس السعر دة

الحكمة هنا ان الكومبريسور الاستيراد بيبقى مركون... بالتالى جواناتة و اويل سيلاتة بتنشف و لما تركبة و تستعملة بعد فترة بسيطة هتلاقية سرب و محتاج طقم اصلاح برضة... هنا هتدفع علية مصاريف اصلاح (مش هتعرف ترجعة لانك استخدمتة) و هتصلح الكومبريسور القديم بالمرة... يبقى كدة دفعت 1200 جنية مع انك كان ممكن تدفع 400 جنية فقط فى الاول خالص

- بالنسبة للكاوتش لو بتجيب طقم جنوط استيراد بكاوتشة خللى بالك ان فى الغالب هيبقى تاريخ انتاج الفرد قديم جدا و الفردة ممكن تفرقع منك فى اى لحظة على الطريق السريع

- يفضل انك تشترى من تاجر تعرفة او معروف و سمعتة كويسة عشان يديك قطعة "استيراد" فعلا مش "خلع"...

ايه هى القطعة الخلع؟

هى قطعة غيار مستعملة مفكوكة من عربية استخدمن داخل مصر... من الاخر قطعة غيار بايظة مفكوكة من عربية عادية

انا عارف ان الموضوع مثير للجدل شوية لانة متحفظ بشكل كبير من ناحية القطع الاستيراد بس دة لانى ببص دايما لجانب الامن و السلامة و التوفير على المدى البعيد... انا مش هفرح لما اشترى قطعة غيار تجيبلى مصيبة بعد كدة او انى اشترى نفس القطعة 4 او 5 مرات متتالية عشان مصر اشتريها استيراد مش جديدة...

قد يكون للبعض وجهات نظر اخرى فى الموضوع دة... لوجهات نظركم كامل الاحترام

MMamdouh