أول تجربتى فى توكيل بريليانس حصلتلى حاجة غريبة جدا جدا

**توتو** · 19-03-2014 12:25 AM

يا جماعة انا حصلتلى حاجة غريبة أوى ..أنا اشتريت العربية من شهر ونص تقريبا كروس 2014 مانيوال ومن اسبوعين لاحظت ان حوض الموتور فيه ترشيح زيت بس مش عارف منين المهم صبرت عليها لحد ما بدأت أسمع صوت سير صوته عالى اتصلت بالتوكيل وحجزت معاد السبت اللى فات الساعة 11:20ص فى جسر السويس أول صدمة لما روحت بتدلع على مهلى وبضيع وقت فى الطريق الساعة 10:45ص وطلع انه بأسبقية الحضور مش بالحجز ..المهم المهندس عاين وأخد ملاحظاتى كلها وقالى دة زيت تكييف تقريبا وعموما هيبان بعد الكشف وقاللى الاستلام بعد الساعة 4 انا مشيت واتصل بيا الساع 2 وقالى لازم نغير سير المجموعة ودة ب130 جنيه + 50 تركيب + 18 جنيه 10% لأن السير باظ من الزيت والعربية مش مرشحة زيت من أى حته وكل الزيوت سليمة والزيت دة مدلوق من برة على السير وقاللى احنا حسبنا التركيب 50 جنيه بس عشان العربية مكملتش 1000 كيلو المهم أنا روحتلهم الساعة 5 كانت خلصت وقولتله حللى اللغز يا بشمهندس مين دلق الزيت أكيد مش أنا .. طيب هم ممكن الكبوت يتفتح من برة ؟؟ قاللى مستحيل أنا اتجننت وقولت يبقى مش هدفع حاجة والعيب من عندكم قالى السيور والزيوت برة الضمان وكل زيوتك سليمة والعيب من عندك !!!!!! المهم انا دفعت طبعا 200 جنيه وأنا شاكك فى زيت الفتيس انه كان السبب وزودوه ودفعونى ال200 جنيه لأن الفتيس كان فيه عضة وقلت بس ما راحيتش ... يا ترى حل اللغز دة ايه علما بأنى محدش بيستعمل عربيتى غيرى ومفتاحها معايا أنا بس ممكن أكون بمشى وأنا نايم ودلقت زيت على السير؟؟؟؟؟؟؟؟؟؟؟

**insurancebroke** · 19-03-2014 02:05 AM

انت غلطان انك دفعت فلوس العربية لسه زيرو وده عيب منهم
كنت ترفض تدفع وتقولهم هعمل شكوى في حماية المستهلك
وعوما اعمل شكوى فيهم دلوقتى انك رحت ودفعوك فلوس والعيب من عندهم

**hugan** · 19-03-2014 02:12 AM

ماكنتش دفعت طبعا

**Mostafa Hessen** · 19-03-2014 08:59 PM

بصراحه موقف غريب جدا
لا تعليق

**Mostafa Hessen** · 20-03-2014 12:41 AM

الأخ الكريم
طبقا لكلامك العربية مكملتش 1000 يعنى ممشيتش
وطبعا انت بتقول زيت كتير وده شئ غريب لأن طبقا لكلامهم العربية كل زيوتها وسوائلها زى ما هى
وده غريب يبقى الزيت منين؟؟؟
ححكيلك بس موقف صغير حصل معايا فى يوم الصبح لقيت زيت مالى الكارتيرة اليمين قدام ومسيل على العتب من تحت العربيه وبدرجه تخوف وانا اتخضيت فعلا وبصيت فى الحوض من تحت لقيت زيت تحت الكرتيرة اللى تحت الموتور بصراحه مبقتش عارف جاى منين وزيت الموتور سليم وزيت الباور وزيت الباكم وكنت رايح الشغل طلعت على بنزينه ورفعت العربيه والفنى ملقاش اى اثر من العربيه وغسلى العربيه من تحت وغسل الكرتيره وقالى غالبا وانت راجع من شغلك دست على بقعه زيت او جيركن زيت فطرطش على العربيه والزيت عيبه ان بيفرش وفعلا لما افتكرت لقيت ان ده حصل فعلا وانا راجع من شغلى وانا مدتش ده اى اهميه..!
الخلاصه ان ده وارد فعلا طالما سوائل العربيه سليمه طيب النتيجه
ان ده لو حصل حيقع تحت باب اهمالك انت وما ترتب عليه فمسئوليتك يعنى معنى كلامى ان لو سير الكاتينه باظ على حد قولهم فده بسبب خطأ منك حتى ولو مش مقصود سامحنى بس انت لو مكانهم حتقول كده .
فبالمنطق كده انا مبقتش عارف اوصف الموضوع :
يا ترى الموضوع كان فى سائل اتسرب من العربيه وسبب المشكله ولا فعلا هو شئ قدرى زي بقعه زيت مشيت انت عليها ومحدش يقدر يقول ايه اللى حصل وبناءا عليه فأنا مش عارف اقول تعليق؟؟
فهمت وجهه نظرى ...
ولكن انا فاكر ان كان ليك موضوع قولت فيه ان العربيه مفيهاش زيت باور وانت تعمل ايه...
طيب ممكن انت بس توضح منين انت مستغرب رغم معرفتك ان العربيه كانت مفضيه زيت الباور طيب مه كده يبقى انت مكنتش تدفع ...
وبرضك ده خلانى اقول لا تعليق ...