الموضوع: تقرير عن اول استخدام ل 301 هاى لاين

المشاركة الأصلية كتبت بواسطة hema_basha

تقرير جميل والف مبروك علي العربية وربنا يديك خيرها وبكفيك شرها

الله يبارك فيك :) ده بس من ذوقك

المشاركة الأصلية كتبت بواسطة raventennes

الف مبروووووووك يا باشا على العربية وربنا يديك خيرها ويكفيك شرهاا وتقريير جميل ماشاء الله
وربنا يحفظهالك :))
بس سؤال كدة
حاسس ان العربية عريضه اووى من قدام ولا انا اللى بيتهيقلى عشان شوفتها مره واحده بس :d

الله يبارك فيك و عقبالك ان شاء الله :)
انا فعلا بحس ان العربيه عريضه من حاجتين:
اولا اشتريتلها غطا فى البدايه مقاس لارج جه عليها صغير و كان مرفوع من الجانبين و حتى لما غيرته بمقاس اكس لارج بقى مغطى قدام وورا كويس لكن مرفوع شويه من الجانبين
ثانيا مش بعرف اطول الدرج بتاع التابلوه كويس من كرسى السواق علما بان طولى 180 سم

يا باشا مبروك عليك العربية و صدقنى حتى الأن و ما قيل من عيوب فهى صفقة رابحة بإذن الله

المشاركة الأصلية كتبت بواسطة ahmedghanem

انا كنت حاجز يوم 11-1 من فرع صلاح سالم و استلمت يوم 15-3 بعد تاخير ثلاث ايام من جانبى لانى كنت مسافر, و حاسس انهم سلمونى بسرعه الحمدلله مش عارف ليه او جايز لانى قريت كتير هنا عن التاخير فى الاستلام فكنت مهيئ نفسيا انى استلم متاخر عن كده

اولابالنسبه لموضوع الفتيس و سرعة التجميع لانه كان فى كلام كتير عليه هنا فى المنتدي:
انا كنت بسوق قبل كده اوبل كورسا 94 مانيوال و لانسر بومه مانيوال برضه المهم اول ما استلمت العربيه و كنت ماشى بيها على مهلى و الدنيا حلوه بس و انا خارج من النفق الى فى مدينة نصر فى صلاح سالم كنت عاوز ازود سرعة العربيه شويه فدست بنزين و فجاه حسيت الدنيا اتقلبت الار بى ام على بشكل جامد و حسيت العربيه عاوزه تطير المهم روحت يومها و بفتح المنتدى بالليل لقيت الموضوع بتاع استاذ سمسم و كان بيتكلم فيه عن موضوع تجميع السرعه ده و حسيت كان الموضوع ده معمول عشانى و اتضايقت بصراحه و حسيت ان العربيه فيها عيب للدرجة انى كان المفروض ارخص تانى يوم الصبح صحيت بدرى و قعدت شويه افكر قبل مانزل ارخص و الا لاء.
المهم عشان ما طولش عليكم بعد قرايه شويه عالنت و نصايح من الزملاء و تطبيق الكلام ده اكتشفت ان المشكله فى اسلوب سواقتى لانى تعاملت معاها و هيا طالعه من النفق زى ما بتعامل مع المانيوال الى كنت راكبهم قبل كده و اعتقد ان ده نفس الى حصل مع استاذ سمسم زودت بنزين صحيح ما عصرتش الدواسه بس زودت زياده كبيره وده الى خلاها تسقط نقله بمعنى ان العربيه بتحاول تستنتج انت عاوز تعمل ايه و تساعدك عليه يعنى انت لو عاوز تجميع سرعه و فى وقت مش كبير زود بنزين بس بضغطه مش كبيره هتجمع معاك سرعه بشكل كويس اما لو ضغطت دوسه كبيره عالبنزين فده برضه هيكون على حسب الدوسه قد ايه يعنى لو مش كبيره اوى هتسقط نقله و هتجرى و تنقل على ار بى ام مش عالى اوى اما لو كبيره هى كده هتفهم انك عاوزها تطير كانك بتشد مع حد مثلا فهتحرق بشكل اكبر على النقلات عشان تديك احساس المانيوال فى الشد و بالتدريج بدات اتعود عليها و احس ان تجميع السرعه و السحب هو اكبر ميزه فيها و اعتقد ان الى ركب اتوماتيك قبل كده هتكون مهمته اسهل من الى كان راكب مانيوال
ثانيا الصالون الداخلى و التقفيل:
الصالون قعدته مريحه و شكل التابلوه جميل و البلوتوث و المالتى فنكشن عاملين شغل عالى بس فرش الارضيه بتاعها تقفيله مش عاجبنى الحتت الى عند العتب بحس انها ممكن تطلع من مكانها و فى حتت فى فرش الارضيه لما بضغط عليها بتنزل لتحت يعنى تحتها فراغ كنت متوقع الاقيها محكمه اكتر من كده, مسند الايد بتاع السواق اكتر من ممتاز خاصة فى المشاوير الطويله او السفر حزام الامان حسيت انه رقيق شويه او خفيف مش عارف ليه العزل بتاعها انا راضى عنه بشكل كبير
ثالثا الشكل الخارجى
موضوع مقدمة العربيه و الكبوت انا كنت عارفه من قبل ماشترى و حليته مع نفسى
الشبكه الاماميه فعلا بتقع بسرعه لدرجة انى و انا بركب النمر الراجل الى بيركبها ضغط شويه على المسمار فاتحركت من مكانها و قعد يتريق على العربيه بشكل مستفز لما كنت عاوز اكله نص اوقعه على الارض و هو بيركب النمر
و اخيرا عندى امل كبير ان مع الانتشار الكبير نسبيا للعربيه حتى الان ان مقاس الكوتش بتاع الهاى لاين يبقى اكثر انتشارا و اقل سعرا

مبروك يا أحمد، ربنا يديك خيرها و يكفيك شرها و يحفظهالك من العين

انا كنت رديت على سمسم فى موضوعة و قولتلة انك بتعيب فى احسن حاجة فى العربية اللى هى سرعة التجميع و شدتها، انا كان معايا مانوال قبل دى برضة و عمرى ما اشتكيت من تجميع العربية دى رغم ان اللى بينزل من مانوال و هو حابة مبيبقاش مبسوط مع الاتو فى الاول عشان بيحسها بطيئة و مبيعرفش يسقط غيارات زى المانوال و يشد، فى ال301 الفتيس ذكى و بيقدر دوستك و على اساسها بيحدد هيعمل اية، يسقط غيار و لا يشد على نفس الغيار دة و لا يكمل فى الزيادة الطبيعية براحة، ساعات مثلا ببقى على ال4 و على rpm عالى 3 او 3.25 و مع ذلك لما ادوس جامد العربية بتسقط لل3 على rpm 4 او 4.5 و تكمل معاة لاكتر من كدة و بعدين تجيب ال4 تانى، و دة طبعا بيخلى العربية فعلا بتطير و بشد بيها مع عربيات اعلى منى بكتير اوى و بعلم عليهم بصراحة، اخرهم bmw 320 2000cc من يومين بس

الصالون فعلا مريح و انا شخصيا محستش بأى مشكلة مع الفرش و نفس الكلام مع الحزام اللى بيشد نفسة مع الفرامل و دى حاجة كويسة و بتحسسنى بالامان، جرب و انت بتفرمل تشدة من البكرة بتعتة هتلاقية مش هيمشى معاك غير بعد ما تريح رجلك و العربية تحس ان كلة فى الامان

الشبكة فى التوكيل و انت بتعمل الصيانة قولهم عليها و هما هيثبتوها بكلبسات