الموضوع: الملف الكامل عن مولد الكهرباء القدره الشراء التليين التشغيل

بسم الله الرحمن الرحيم

هذا الموضوع اهداء منى لاعضاء نايل موتورز اللى كتير استفدت منهم وارجو ان يستفاد منه الجميع واللى يعجبه الموضوع يدعيلى دعوه حلوه انا وزوجتى وابنى ولو فيه افاده ممكن يتثبت فتره لو امكن واسف لو مكانه غير صحيح بس قولت الاجتماعى افضل مكان يتشاف فيه بكثره واتمنى اكون غطيت الموضوع بالكامل ومنستش اى جزء وياريت لو حد نقله يقول منقول لروتانا

1- القدره المطلوبه
حساب القوه المطلوبه للمكان سواء محل او شقه
تشغيل كل ما تملك من اجهزه يحتاج قدره اكبر فيجب عليك اختيار الاحمال المهمه والاحمال الغير مهمه تفصل عند التشغيل حسب اولوياتك
القدره تقاس بالواط ومضاعفها كيلو واط=1000 واط ولن نتطرق لوحدات اعلى
قدره الجهاز شقين قدره تشغيل وقدره بدء(دى اللى فيها كل لعب الصينى)
اى جهاز كاللمبات والشاشات قدره البدء ضعيفه ولا تحسب يعنى لمبه25 واط تحسب 25 واط
اى جهاز زو محرك له قدرتان تشغيل وبدء
مثال مروحه قدره 100 واط تحسب 150 لان عند بدايه التشغيل نضيف 50% بدء يعنى تصبح 150 واط وعند تمام التشغيل تصبح قدرتها 100
مثال شقه او محل احمال طبيعيه
يحتوى على 4 نايلون سم120 و10 موفره و2 مروحه عاديه وشاشه ورسيفر وكمبيوتر
نايلون4*40=160w
موفره10*25=250w
مراوح2*100=200*1.5=300w(مع حساب 50% قدره بدء تشغيل)
الشاشه 150 كحساب انها ممكن توصل ل52 بوصه والعادى متوسط100
كمبيوتر عادى بشاشته300-500 كمبيوتر جيمز بفيجا 500-1000 واط
الرسيفر 50 كاعلى تقدير
الاجمالى 1210 واط (بكمبيوتر عادى)بالتقريب 1.2 كيلو واط
ده نظام عادى
الاحمال الكبيره (يجب تجنبها او اختيار مولد يناسب تشغيلها)
سخان متوسط 1200 واط 1.2كيلو واط
تكييف 3 حصان=3*750=2250 بدء تشغيل=2250*1.5=3375 واط او3.4 كيلو واط
مكوه قد تصل ل2كيلو واط
بوتجاز كهرباء يصل ل3كيلو واط
غلايه شاى 2 كيلو واط
غساله اوتوماتك قد تصل ل3 كيلو مع تشغيل سخنها
2-قدره المولد
عند اختيار مولد للنظام العادى القدره1.2 كيلو
نختار مولد يعطى 1.5 تحميل و3 كيلو بدء تشغيل(الدارج صينى3 كيلو)ويفضل ال2.5كيلو تحميل و5 بدء تشغيل (صينى دارج5 كيلو)لعمر طويل وراحه فى الاحمال وامكانيه اضافه احمال مستقبليا
عند اختيار النظام العادى ومكيف 3 حصان=1.2+3.4=4.6كيلو نختار مولد5 تشغيل و10 بدء تشغيل (صينى دارج 10 كيلو)
3- الشراء
طبعا مع اقتراب فصل الصيف يقترب موعدنا مع ازمه انقطاع التيار(مع انها مبقتش تفرق وبيقطع فى الشتا)
اولا افضل وقت للشراء هو وقت ركود السلعه يعنى تروح تسئل فى عز الشتاء وتسئل كذا مره وتتاكد انك وصلت لافضل سعر ليك اللى هو الاقل طبعا يعنى يفضل من شهر12لشهر3 مننساش ان الغش موجود وفى ملفات نحاس وفى الومنيوم والنحاس افضل وفى ملفات الومنيوم مطليه زى النحاس عشان الغش وعايزه تاجر امين (هو فين)عشان يتعرف وفيه اوبشن زى مارش وشد وشد فقط تختار المناسب ليك
المولدات الصغيره ملهاش لزمه لا قطع غيار ولا اداء ولا عمر وخساره فيها الفلوس
الافضل بلا شك الموديل ال5 كيلو كل قطع غياره موجوده
الموديل اللى اشتريته ماركيز وكان ب1100 لانى اخترت افضل وقت للشراء(وصل فى عز الازمه فى الصيف ل2500)وفى موديل تانى بيشكرو فيه اسمه سويس كرافت بطلع تحميل3.5 كيلو و8 بدء تشغيل

4-التليين
طبعا النقطه دى مفيش حد بيعملها وكل الناس بتدور وتشغل على طول لاكن لازم الاول نلين الدينمو زى العربيه لانه لسه طالع من المصنع والصينيين مش فاضيين اصلا يلينوه
حنحط زيت شيل احمر خفيف 0.5 لتر ونملى التانك بنزين ونفتح المحبس ونفتح الهوا ونشد وندور وبعد الاداره نغلق الهوا نتاكد انه بيطلع 220 بحمل بسيط لمبه مثلا وندوره 10 سعات ممكن ساعه كل يوم او ساعتين المهم تقفل 10 سعات بدون احمال
نبدء نحمل ونا هنا حملت بدفايه 1200 واط اول شمعه 400 لمده ساعه و800 شمعتين ساعتين و1200 3شمعات ستعتين بمجموع 5سعات تحميل
بعديها حمل كامل 2.5 للتجربه 10 دقائق
كده 15 ساعه توزعهم براحتك ونكون انتهينا من التليين ونغير زيت ونملى تانك البنزين ونكون جاهزين لانقطاع النور(ونجهز مجموعه جراكن نملاها بنزين عشان لو فى ازمه بنزين نكون جاهزين)
هو متوسط تشغيله 1 الى 1.5 لتر لكل ساعه حسب الحمل يعنى 50 لتر يشغلونا متوسط 45 ساعه


5-التشغيل
اكبر العيوب هى الضجيج وفيه مولدات كاتم وكله بتمنه
يوضع فى مكان جيد التهويه لانه تبريد هوا
يمكن تشغيل لمبات ومراوح واى اجهزه غير دقيقه مباشره
الاجهزه الحساسه الاليكترونيه بالنسبالى لا امان اطلاقا مع مولد بدون استبلايزر لان لحظات بدء التشغيل للمراوح او اى محرك بتعمل اوفر لود وبتخلى الفولت ينط نطه لحظيه ممكن تدمر اى جهاز حساس
شخصيا اشتريت استبلايزر 1 كيلو للاجهزه الحساسه(الاستبلايزر هو جهاز منظم فولت ومثبته عند 220)
6-التحويل الاوتوماتك
لانى غاوى اليكترونيات قمت بعمل دائره اليكترونيه تتحكم فى الدينمو اوتوماتك بدون تدخل بعد الاداره
بمعنى النور اتقطع دورت وشغلت حتلاقى المكان وصله كهرباء بدون تدخل وعند عوده التيار ينتظر النظام 10 ثوانى للتاكد من ثباته ثم يحول على كهرباء الشبكه فى 4 ملى ثانيه(لن يفصل اى كمبيوتر او شاشه او جهاز من سرعه التحويل ولن تشعر بالتحويل من الاصل)ثم ينتظر دقيقتان ويقوم بفصل ادراه المولد تلقائى
يعنى بالمختصر الدينمو شغال حتلاقيه طفى تعرف ان النور جه من 2قيقتين و10 ثوانى
وده مخطط الدائره