الموضوع: ايهما افضل نيو افيو ام لوجن ؟

أستاذ رأيي نيو أفيو ... وقلي ليه ؟
هقولك أولاً الافيو بتتصنع من قبل عملاق العربيات العالمي جنيرال موترز وتحت أشرافهم والعربية من شركة عريقة أسمها دايو الكورية (حمالت الأسية ) وتصميم مهندسين أوروبين ومتور من مصممين ألمانين ... وعربية مصممة للاجواء الاسياوية الحااااااااااااارة .

لكن العربية اللوجن بالاسم رينو لكن هيا من أصول شركة داتشااا الرومانية وحتى روسيا واخده التصميم بتنزلها باسم لادا وفي المكسيك بتنزل باسم نيسان مش عارف ايه كده .

عامة ً الكوري أثبت نجاحوا في الشرق الاوسـط والرينو ربنا يعينوا كويس منقدرش نقول عليه وحش بس بتبقى فيه عيوب صناعه كتير التوكيل بيبتدي يعالج فيها بس أنتا في غنى عن مثل هذه العيوب .... بس ميزة الافيو بعد فترة هتلاقي قطع غيار صيني نازلة منو مغرقة السوق برخص التراب يعني مثلاً شوف الانوس الي هيا هيا الموديل القديم من الافيو ... الانوس دي كانت معايا تقريباً سنة 2004 جبتلها فانوس خلفي ب تقريباً 550 يمكن أو450 مش فاكر أنهرده الفنوس بتعها ب 120 جنية يعني ملالييم فخليك في الكوري اجوائهم زي أجوائنا البلد بتاعتنا دي مش بتاعت العربيات الاوروبية

وفي النهاية برضوا شوف انتا مرتاح لمين أكتر كشكل يعني أنتا شايف نفسك ورى أنهي عربية
أه نقطة مهم اللوجن انا كنت أحد مالكيهااا من ضمن عيوب مثلاً المسحات الامامية ضعيفه وصغيرة وبطيئةبخلاف الافيوو ... شبابيك الكهربا بطيييييييييييييييييئة جداً بخلاف العربيات الكوري سريعه .... كان في حرارة بتخش من تحت التابلوة في اللوجن بخلاف الافيو ... ارتفاع السقف مبالغ فيييييييييه في اللوجن وبيعتبر عائق للثبات والتسارع بخلاف الافيو الي شكلها اقرب للصابونة وانسيابي ... عيب في اللوجن مكان الكلكس ومكان زراير الكهرباااا وحتى أكرة أرجاع الكرسي بخلاف الافيوو شياكةوسرعه ... التكيف بتاع اللوجن كان تلاجه يعني رقم 1 فريزر كان عندي بس التكيف في الافيو طبيعي وعادي وحلو .

فتحت الشنطة والتنك من الداخل في الافيوو بس في اللوجن من بره ولازم تطفي العربية علشان تفتح التنك

عضم اللوجن ضعيف مقارنةً بالافيو وبرضو الخامات الداخلية في الافيو عمليه لكن في اللوجن خامات فقيرة جداً وضعيفة ...

في نقطة تحسب للوجن أو نقطتين وسع الشنطة في اللوجن اكبر + عندك فرامل اللوجن رائعه ومقبولة بس كتسارع لا الافيو يكسب ... اي خدمة يا زعيم وبالتوفيق .

العفو يا فندم كلنا تحت أمرك ... بص حضرتك بالنسبة للتكيف ... التكيف بتاع اللوجن عملاه شركة نيسان وعملاه بشكل غبي بحيث أنو يجمد أي حد قاعد قدامواااا ويمكن الحاجة الوحيدة الي عدله فيها تكيف اللوجن بيفكرني بتكييف عربية تويوتا كراسيدا بتاعت زمان بس مش ميزة ده عيب لأنك مش هتبقى عارف تشغلوا على نمرة واحد ولا تطفيه ... بينما تكيف الافيو هو تكيف عادي زيوا زي أي عربية مكيفة بياخد وقتوا ويبرد العربية بشكل معقول

وفي كلى العربيتين انا بقول الي عندوا العربية دي أو دي ياريت يركب فامية أمريكي شفاف الي بيمنع دخول الحرارة وبيسمح وبمرور الضوء للعربية وكده تقدر تستفيد بالتكيف أما العك الي بيعملوه الشباب بفامية أسود وأستيكر والكلام الفاضي ده ويقلك لا علشان التكيف والدنيا شمس ... شمس ايه يا بيه انتا كده خليتها ؤوضت نوم مش عربية .

حتت بقه المتور 1500 صدقني في عربيات 1200 و 1000 سي سي ومع ذلك مكيفاتها زي الفل الدنيا اتقدمت ... الكلام ده لو في الخليج والطرق الطوالي والكبيرة أقولك أه هات مواتير كبيرة لكن مصر كلها على بعضها متور 1200 يكفيها ويوفيها كمان من أسكندرية لحد أصوان ... طيب كويس فكرتني هو بعيب بس في الافيو - الأولاني بتاعها بطيئ شوية في الاستجابة يعني لغايت عشرين بس ولازم تنقل على طول (ده في حالت عاوز تجمع سرعه او تسارع في ظرف ما ) لكن بمجرد ما تنقل على التاني والتالت وكده ياجبل ما يهزك ريح .

وهتلاقي ناس بتشتكي من الأفيو ... بس لو دورنا كويس هنلاقي كل 100 عربية لازم تلاقي فيهم عربية فيها مشكلة عيب صناعه مثلا بتاعه بتعلق بتاعه بتزن .

بينما اللوجن كل 100 عربية هتلاقي فيهم 100 عربية بس فيهم نفس العيب هههههههههههههه . وبص من الاخر كده العربية اللوجن عربية اتعملت علشان تسوق محلياً في رومانيا ... ايام شلنسيسكوو ولا مش عارف اسمو ايه وبعد ما اسقط حكموا ابتدو يصدروا علشان يحسنو اقتصادهم المهم هيا عربية معمولة شعبي كده علشان المواطنين ميجبوش عربيات مستورده من بره ويطلعوا العملة الاجنبية بره رومانيا ... بس مع الوقت ابتدو يصدروا ... لكن كوريا لمن صنعت دايو ولا هونداي ولا كيا هما كانوا بيستهدفوا انهم يقدموا منتج للتصدير ومش مهم الكورين قووي يركبوا موصلات مش مهم المهم ان المنتجات الكورية توصل للعالمية وبسبب الخلاف بين كوريا الشمالية والجنوبية ومشاكل بحر الصين وجزر اليابان ... والنفوذ الامريكي او الهيمنة في منطقة شرق اسياااا فامريكا والتكنولوجيا الامريكية بتدعم الشركات الكورية الجنوبية بكل طاقتها ومن هنا
أتولدت نيو أفيووو ... بس سيبك من كل كلامي ده خالص واركنوا على جنب شووووف أنتا مرتاح لأنهي عربية أكتر غمض عنيك كده وتخيل نفسك شكلك هيبقى أحلى ورى أنهي دريكسيون ... وأستفتي قلبك وكمان خلي بالك متكنش راكب عربية فخمة مثلاً الان وتيجي تروح تسمع كلامي وتجيب الافيو كده انتا هتدعي عليااا ... وكاني انا الي وزيتك تركبها ... انتا حضرتك طرحت مقارنه بين عربيتين يا واحد يا عربية نمرة أتنين .

هيا الافيو مش فاخمة قوي بس لزيززة وكيوت خالص وهتحس فيها بمتعه بس مش متعت القيادة متعت القيادة دي بتبقى في عربيات تانيه وفئات أعلى وأعلى بينما اللوجن هتحس بأحساس شغل وروح مشوارك وأركنها على جنب بالصلى على النبي .هيا دي كده .

من حيث الثبات اللوجن 120 ومعايا أبتدت تعوم بس في ناس تانيه شافتها ممتازة وحتى في فيديو لشبابا أنتحارين مشيوبيها على 180 معرفش جابوها أزاي بس كل شيء جايز ووراد بينما الانوس او الافيو لأ أنتا ممكن تسرح بيها تلاقي نفسك ناسي نفسك وماشي على 140 ومتدراش بنفسك غير لمن تلاقي الي جمبك بيقلك هدي شوية بس برضومش الثبات والغرز الي بالك فيه أحنا بنتكلم عن أفيو اولوجن مش هوندا ولانسر وكده وربنا يوفقك . الي هيحسم الامر أقرأ سورة ياسين وصلي ركعتني أستخارة وأركب دي وأركب دي وتوكل على الله . وبالتوفيق .