تقرير عن السوبر صالون بعد يومين من الاستلام .. الكاوتش والتكييف والثبات

**amirali** · 23-03-2014 04:39 PM

بسم الله الرحمن الرحيم:

بعد يومين من استلام العربية لسة طبعا الواحد مايقدرش يقول احكام اوى لكن فى انطباعات وهبقى

محايد فى كلامى .. العربية بشكل عام مريحانى الحمدلله ..1- الكاوتش انا مش شايفه بالسوء اللى

الناس بتتكلم فيه لم زلطة كدة صغيرة فى يومين وسمعت صوتها بس بصراحة ماركزتش اوى يمكن

لأن كاوتش الافيو كان انقح منه! لكن انا بشكل عام مش بحب اروش نفسى بكل حاجة يعنى سمعت

صوت زلطة فى الكاوتش بكمل الاغنية اللى كنت بسمعها وانفض وعامة الكاوتش عادى مش سىء

زى ما الناس بتتكلم يعنى ..

2- الثبات لسة انا ماطلعتش بيها على طريق سريع بس فى كل الاحوال هتبقى احسن اكيد من

الافيو لكن لسة برده هشوف وهقارنها مع الافيو ومع كل العربيات اللى ركبتها ..3- الفرامل كويسة

مش وحشة ومش باللمس يعنى تقريبا هى وفرامل الافيو واحد عكس مثلا فرامل الهيونداى اللى

من لمسة خفيفة اوى بتوقف العربية لكن هى كويسة مش وحشة ومش وااو برده عشان نكون

منصفين لكن ممكن اديها مثلا 10 - 7 ... 4 - العفشة ناعمة بذات بعد تظبيط ضغط الكاوتش

العربية نعمت وبقت احسن وفى المطبات طبعا الحمدلله العربية مريحة جدا ومش بتحك لانها عالية

عن الارض .. 5 - استهلاك البنزين لسة ولو انى حاسس ان العداد بيقرا غلط وحاسس انه بيقرا

الكيلوات غلط ويعنى بمشى شوية الاقيه زود كيلو العربية مشيته وانا حاسس ان المسافة دى

ماتجيبش كيلو! .... 6 - الصالون واسع والعربية اوسع من اغلب العربيات فى افئتها تقريبا

او كلها وشكل التكييف التاتش شيك وحلو والعدادات شكلها شيك برده وفتحة التكييف ورا حاجة

كويسة من نيسان وميزة كويسة للعربية ... 7 - التكييف شغلته وطفيته بسرعة بس حاسس انه

كويس من خلال التجربة السريعة ولكن لسة ممكن نقول لم يختبر ... 8 - السحب كويس برغم

انى لسة ماشدتش عليها بس كأنطباع اول السحب كويس والعربية بتطلع بسرعة لكن لسة برده

ماقرصتش عليها ... 9 - السماعات ماعنديش تعليق عليها صوتها كويس ... 10 - العربية

الانذار والامبولايزر مش متفعلين فيها هضطر اروح التوكيل افعلهم .. 11- ريموت مفتاح العربية

شكله عاجبنى وهى اراء عامة.... لحد دلوقتى العربية مريحانى الحمدلله ربنا يحفظنا ويبعد عننا

العين ويسترها معانا ومع كل جديد ان شاء الله هبلغكم.

**amirali** · 23-03-2014 04:40 PM

اه نسيت اقول انى احيانا لما ببقى واقف خالص وبحود الدركسيون للاخر عشان اطلع بسمع صوت كدة زى زرزرة

كدة فى العربية ماعرفش بصراحة ده سببه ايه لكن هو مش بشكل دائم احيانا بسمعه واحيانا لأ

**amirali** · 23-03-2014 04:43 PM

برده نسيت اذكر ان من اهم العيوب فى العربية عدم وجود اماكن فى الامام للتخزين ودى مشكلة انا بحط موبايلى

مكان الاكواب ولما بيبقى معايا اى حاجة تانية عايز احطها بحتاس للأسف دى نقطة سلبية بصراحة

**iamin911** · 23-03-2014 04:50 PM

الف مبروك يا باشا و يكفيك شرها ( انا عربيتي وصلت بس لسة مسافر فمستلمتش)
ممكن اعرف نوع البطارية عندك ايه و كام امبير
المالتي فنكشن جربته و لا لسة ( لو جربته عملت ايه)
العربية سخونتها بتوصل لحد كام في مؤشر الحرارة.
و عرفت منين ان الامبيوليزر مش متفعل
و شكرا على الرد

**J A G U A R** · 23-03-2014 05:13 PM

شكرا لنقل التجربه وفى انتظار باقى التقييم

**Mostafa Hessen** · 23-03-2014 05:25 PM

الف مبروووووك ربنا يباركلك فيها

**insurancebroke** · 23-03-2014 06:38 PM

مبروك

**Dr M.Noaman** · 24-03-2014 12:08 PM

ألف ألف ألف مليووووون مبروووك .. أخييييرا يا راجل العربية وصلت .. ربنا يرزقك خيرها و يكفيك شرها يا رب آمين ..

هو فعلا الإنذار مش متفعل ولا الايمبوليزر بس هيتفعلوا في صيانة ال1000 كيلو بأمر الله ومعاهم السينتر لوك كمان ...

موضوع الموبايل عندك مكان جمب فرامل اليد أو مكان الأكواب أو الباب اللي جمبك فيه مكان من تحت كبيييير جدا