مبروك الضمير مات

**hinrey_2** · 25-03-2014 05:27 PM

النهاردة كنت باحود يمين ولقيت واحدة راكنة ركنة زى الزفت وسدة الشارع وقدامى عربية الوش فى الوش فى تقاطع وورايا عربية والحيوان اللى قدامى يقولى حود ما يهمكش واللى ورايا مش عايز يرجع وانا باحود ومش شايف جنب العربية فى المراية ولقيت واحد ابن حلال بيقولى وقف يا استاذ العربية اتخربشت وفعلا لقيت الجنب اليمين اتخربش المهم رفعنا العربية وبعدناها عن الاحتكاك .
المهم مكنتش اعرف ان فيه ناس سفلة همهم انه يعدي حتى لو اللى قدامه اتحرق بجاز .
المهم ان الخدوش كتير بس سطحية يعنى معدتش المعجون والحمد لله ومفيش معايا فلوس ارشها ممكن حد يقولى اداريها ازاى لان العربية اتبهدلت وشكلها بقى وحش جدا وانا نفسيتى تعبانة
الحمد لله وحسبي الله ونعم الوكيل فى اللى يأذي الناس علشان مصلحته
عندنا ازمة اخـــــــــــــــــــــــ ـــــــــــــــــــلاق

**shiko85** · 25-03-2014 06:03 PM

اللى بعمله بنزين او تنر علشان التنظيف
اوقات كتير بيكون الخدش او الأحتكاك من لون العربيه التانيه و لما بتمسحه بتطلع عربيتك سليمه
لو لسه فيه خدوش ممكن بعد كده تجيب كمبوند وتحطه على الخدوش و بفوطه نظيفه تمسح الكمبوند بشكل دائرى لحد ما الخدش يروح او ممكن تروح مكان تعمل سحق للخدوش دى

**lanos2004** · 25-03-2014 06:06 PM

شوف انا عمرى ما بسمع كلام حد يقولى خش ولا حود--

**Ahmed.Essam** · 25-03-2014 06:07 PM

هات wd-40 رش منه على فوطة حبة بسيطة نضف بيه الخدوش
وبعديت هات كومباوند وبحركة دائرية على الخدوش وانت ضاغظ عليها شوية
وان شاء الله بسيطة

**S O P H O S** · 25-03-2014 06:35 PM

معلش يا باشا في وفي بردوا

**mostafa 3fifi** · 25-03-2014 06:43 PM

Wd او بنزين علشان تشيل اي اثر للون العربيه اللي حكتك ... و بعدين حط كمباوند على اماكن اللي متحربشه و يفضل استخدام قطن مع الكمباوند احسن كتير من الفوطه .... و خد بالك ان الكمباوند ممكن يشيل لون العربيه الاساسي و يبين البطانه (بالاخص في اي سوكه ) بعد الكمباوند يفضل استخدام بولش كريم ب نفس طريقة الكمباوند ... و ان شاء الله ترجع زي الاول

**ibrahimsaad** · 25-03-2014 07:16 PM

المشاركة الأصلية كتبت بواسطة lanos2004

شوف انا عمرى ما بسمع كلام حد يقولى خش ولا حود--

فعلا والله انا اتبهدلت بسبب النوعيه دى من البشر كل همهم انهم يعدوا حتى لو على حساب غيرهم

**hinrey_2** · 25-03-2014 11:51 PM

جزاكم الله كل خير والله هونتوا عليا كفاكم الله شر كل مؤذي معدوم الضمير

**hinrey_2** · 26-03-2014 01:05 AM

**mostafa magdy** · 26-03-2014 01:39 AM

زي ما الاخوه قالوا لحضرتك ..
مفيش كلام طبعا بعد كلامهم .. لأن كلهم أقدر مني
و علي حسب عمق الخدش اللي فاهمه من حضرتك .. من الوصف يعني .. شويه واكس يخلصوك منها تماما ..
و إحنا في البلد دي وصلنا لمرحله لا تطاق ..
معلش يا كبير ..