الموضوع: بكل موضوعية.. ما هو تقييمك لليارس 2014..

كيا ريو هاي لاين برقبة اليارس

شوف يا باشا أنا لاني الفتره دي بشتري عربيه في نفس الفئه السعريه دي عشان كده انا طحنت الفئه دي بحث ووصلت للاتي
الياريس بـ 140.000 جنيه بالسعر ده حرام جداً الواحد يشتريها 1300 سي سي 84 حصان يعنى الاداء في الضياع ضيف على ده انها كمان مش عربيه أقتصاديه لان اللي ممكن توفره في استهلاك البنزين هتدفع اضعافه في اسعار قطع الغيار اللي مش رخيصة بالمره

طيب ايه البدائل ؟؟؟

شوف ياسيدي
في رنج السعر ده أحسن حاجه تجيب لانسر شارك الفئه التانية 145.000 جنيه
فيها كل الاوبشنز الاساسيه بالاضافه للجنوط الاسبور و 2 ايرباج و abs و ebd

ولو فرق الـ 5.000 جنيه ده هيعمل مشكله يبقى خليك في الفئه الاولي حلوه برضوا وانضف من الياريس وبـ 136.000 جنيه

الاختيار التاني من وجهة نظري كيا ريو الفئه التانية بـ 137.000 جنيه الماتور 1400 سي سي بس خد بالك الـ الهورس باور 109 مش 84 زي الياريس وده هينعكس على اداء افضل كتير جداً عن الياريس وعربيه شيك جداً وخاماتها وتقفيلها في منتهى النظافه ولا يعيبها غير ضيق الكنبه الخلفيه بالمقارنه بالياريس والشارك غير كده عربيه 10/10

في اختيار ثالث وهو البيجو 301 حلوه برضوا بس بالنسبه ليا أنا استبعته لعده اسباب خاصه ممكن تكون غير مهمه بالنسبه ليك زي عدم وجود مؤشر حراره وطول فتره الحجز وعدم تعامل الوكيل مع بنك ناصر والاوفر برايس المبالغ فيه جداً في المعارض وسعر اعاده البيع وشويه حاجات تانيه رفيعه مش هتهمك اوي

يبقى أنا كده حصرت الاختيار ما بين الشارك والريو
طبعاً بلا نقاش الشارك تكسب بس ......

لازم تاخد بالك من نقطه في منتهى الاهميه ودي اللي خلتني سحبت حجز الشارك وحجزت الريو ومنتظر الاستلام على خير ان شاء الله وهي أسعار قطع الغيار
لما سألت على قطع غيار الشارك لاقيتها مبالغ فيها جداً واعتقد ان الياريس فيها نفس المشكله دي بس ممكن تتاكد بنفسك عنها
ودي عينه من فروق الاسعار بين الريو والشارك (وطبعاً انا مجبتش اسعار الياريس عشان كنت استبعتها من البدايه بسبب قوه الماتور زي موضحتلك بس للوحابب ممكن تسأل بنفسك عليها وتقارنها بالاسعار التاليه)

فلتر زيت
ريو 33 جنيه
شارك 85 جنيه

فلتر هواء
ريو 105 جنيه
شارك 310 جنيه

فلتر بنزين
ريو 175 جنيه
شارك 780 جنيه (780 جنيه فلتر بنزين )

بوجيهات بلاتين
ريو 505 جنيه
شارك 505 جنيه

سير المجموعه
ريو 220 جنيه
شارك 550 جنيه

تيل فرامل امامي
ريو 550 جنيه
شارك 545 جنيه

طنابير
ريو 1430 جنيه
شارك 1365 جنيه

مقصات
ريو 1560 جنيه
شارك 2125 جنيه

مساعد امامي
ريو 1540 جنيه
شارك 2595 جنيه

علبه دركسيون
ريو 2705 جنيه
شارك 13.000 جنيه (ايوه 13.000 جنيه انت قريتها صح)

فانوس امامي
ريو 1740 جنيه
شارك 2750 جنيه

أكصدام امامي
ريو 1075 جنيه
شارك 3080 جنيه

دي اسعار قطع الغيار وكيل للعربيتين شامله الضريبه الـ 10%
كفايه كده ولا اكمل

طبعاً القلب كان ميال جداً للشارك بصراحه كان نفسي أجبها من زمان من اول مانزلت 2008 (كنت بتقطع وانا بسحب فلوس الحجز) بس العقل بيقول اني لو عملت كده هبقى بلبس نفسي في حيط والفرق كبير أوي في أسعار قطع الغيار وعشان اركب عربيه اقدر أحافظ عليها واهتم بيها وبصياناتها تبقى الريو طبعاً افضل

عشان كده المفروض تحبها الاول لو اسعار قطع غيار الشارك تناسبك يبقى توكل على الله وعربيه هي الافضل في لفئه السعريه دي
لو شايفها مبالغ فيها بزياده زي ما انا شايفها كده تبقى الريو هي أفضل اختيار بالنسبه ليك او الـ 301 لو كانت عجباك بس اتاكد انت برضوا من اسعار قطع غيارها بنفسك عشان انا مسألتش عليها بصراحه

بس نصيحه متخدش اسعار قطع غيارها من المبيعات روح مراكز الصيانه واسأل عليها بنفسك من قسم قطع الغيار في مركز الصيانه واعرف السعر اللي هيقولهولك ده قبل الضريبه ولا بعده عشان بتفرق برضوا

أتمنى أكون قدرت اساعدك بالتفكير وربنا يوفقك للخير