الموضوع: المصرية للسيارات فرع الميرغني أسوء معرض سيارات اتعاملت معاه

السلام عليكم

أنا كاتب الموضوع ده لرجاء السيد المحترم مدير فرع المصرية في الميرغني انهم يزودوا المرتب شوية للناس اللي عندهم في قسم الـ sales لأنهم أكيد مش بياخدوا حقهم، و ده بيبقي واضح في طريقة التعامل بينهم و بين الزباين، تعامل لا يوصف الا بأنهم قرفانين من عيشتهم.

أنا اشتريت من عندهم الكورولا بتاعتي من سنة، و الموضوع خلص بخناقة تقريبا عشان مش عاوز أدي اللي شغال في الـ sales حلاوته، و اكتفيت اني اديت فلوس للي مسحلي العربية و روقهالي لأني اشتغل بضمير، قولولي ليه أدي واحد sales فلوس و هو اصلا مكشر في وشي و مصمم يقل ذوقه! (قالي بالحرف كدة: "انت مش بتشتري مرسيدس يا بشمهندس")

و الغريب اني امبارح اتهبلت في عقلي و قلت عفا الله عما سلف و روحت اشوف عندهم الكورولا الجديدة (و انا بفكر جديا اشتريها) و معرفش ايه اللي صورلي ان ممكن يكون مثلا حظي المرة اللي فاتت اني لبست في Agent مش محترم او مش فاهم شغله كويس، قعدت مع Agent افهم منه التفاصيل و خلاص اتفقنا علي سعر و كل شيء تمام لحد ما طلعت و ركبت العربية، لا يمكن وصف قلة الذوق في التعامل، واقفلي علي الباب بيقولي خلصت يا فندم!! و بعد ما قلتله "لا لسه ماخلصتش يا فندم" كنت بتفرج لسه علي العربية و مساحتها من جوة و بقارن بينها و بين عربيتي، راح بعت واحد يجيب مفتاح العربية عشان يقفلها!! أنا حقا أعترض! هو ده معرض سيارات و لا انا شايف غلط؟!

نصيحة لله للي عاوز يحافظ علي كرامته ميشتريش من المصرية فرع الميرغني، اللهم بلغت اللهم فاشهد.