الموضوع: جددت الرخصة...بالتفصيل الممل

أحلى سلام لأجدع ناس فى الدنيا...ويارب دايما بصحة وخير
لسة مخلص تجديد الرخصة وحبيت أعرفكم الخطوات للإفادة
السيارة: هيونداى أكسنت
مو: 2000
السعة: 1300 سى سى
تاريخ انتهاء الرخصة:07/04/2014
المرور: فيصل
المطلوب: أنا اشتريت العربية بعقد مسجل من توكيل فى شهر ديسمبر2013 ...وطبعا هاجدد وأنقل ملكية وطالما هانقل ملكية يبقى لازم أفحص
اليوم الأول:
روحت المرور الساعة 08:00 الصبح دخلت على النيابة عايز اطلع شهادة مخالفات
الورق المطلوب:
صورة الرخصة
صورة البطاقة
صورة أى توكيلات أوعقود
لو موديل العربية قبل 2010 يبقى مطلوب شهادة بيانات
خمسة جنيهات مصرية
فتحوا الساعة 09:00 كان قدامى حوالى 6 أفراد..دخلت على الشباك وخد منى كل الورق والخمسة جند ...وطلعت استنى برة لحد ما نده على اسم المالك القديم (الحمد لله مفيش مخالفات )
طلعت من النيابة دخلت على المرور .... فى أكشاك كتير جوة المرور دخلت على كشك منهم بتاع شركة تأمين اجبارى ... خد الرخصة ونقل بياناتها ... قولتله أنا هانقل ملكية فكتب اسمى مش اسم المالك القديم...وقولتله كمان أنا هارخص 3 سنين ...دفعنى 282 جنيه
دخلت على شباك تانى بيبع الملفات قولتله هانقل ملكية وأرخص 3 سنين وطبعا هافحص...قالى 59 جنيه والملف فيه 10 ورقات
خدت كل الورق ده وطلعت أبص على طابور الفحص طبعا ما اتصدمتش قوى لأن كل الناس قالتلى عشان تفحص لازم تروح بدرى فخدت بعضى ومشيت كانت الساعة حوالى 10:30
وفى نفس اليوم بالليل روحت البنزينة غسلت العروسة كويس وظبطتها عشان الفحص
اليوم الثانى:
سمعت كلام الناس عن الذهاب بدرى جدا للفحص
كنت هناك الساعة 06:45 صباحا ولقيت قدامى 11 عربية (فى ناس بتاخد 50 جنيه وتدخلك فى الصف.. بس طبعا طالما واقف بدرى مش هايدخل حد قدامك... وبعد ده كله جاى يقولى هات الشاى بتاعنا!!!!!!!!!) .....ابتدوا حوالى 08:30 لقيت كام واحد بيعدوا على العربيات وبياخدوا بصمة وروحت اشترى الطفاية (140 جنيه) والمثلث وشنطة الاسعافات (75 جنيه)
دخلت على الظابط شاف الأوراق والعربية وكتب نقل ملكية وختم ... طلعت ركنت برة (فى ناس بتقولك لو عايز تركن وبياخدوا 5 جنيه فى الساعة.. أنا روحت بعيد عنهم)
وبعد كده رجعت بالملف على مهندس الفحص (اللى مش بيعمل أكتر من إنه بيملا الورق ويبص على البصمة المرفوعة هل مطابقة للمكتوب فى الرخصة ولا لأ...فضلوا يرمونى لبعض لحد ما خدت بالى انهم بياخدوا 10 جنيه عشان يختمولك غير كده بيدوخووووووووووووووووووك .. دفعت العشرة جند وأمرى لله)...وبعدين دخلت على اظابط تانى عشان يختم ختم النسر...كده الفحص خلص
روحت على شبابيك الترخيص اديت الورق للموظف قدرلى الضريبة طلعت على الخزينة دفعت 582 جنيه ورجعت تانى على شباك التراخيص سلمت الورق واستنيت اسمع اسمى واستلمت الرخصة بحمد الله
المصاريف:
شهادة مخالفات : 5 جنيه + المخالفات إن وجدت
تأمين اجبارى: 282 جنيه 3 سنين
ورق : 59 جنيه
طفاية : 140 جنيه
مثلث&شنطة اسعافات: 75 جنيه
ضريبة : 582 جنيه
الاجمالى : 1143 جنيه (لو حبينا نضيف الغسيل 55 والاكرامية 10 يبقى كله 1208 جند)