الموضوع: استفسار

وعليكم السلام ورحمة الله وبركاته
الف مبروك لحضرتك وان شاء الله تستلم علي خير
انا زي حضرتك بالظبط خبرتي ضعفية (تكاد تكون منعدمة) - وحاجز 301 هاي لاين
احب اضيف ايضاً (بعد إذن صاحب الموضوع ) العربية مفيش فيها مؤشر حرارة ازاي اعرف ان العربية اتمت تسخينها وابدا اتحرك؟
سمعت ان مفيس اكصدام يتحمل الصدمات (عايز افهم الجزئية دي)
ياريت الإفادة وشكراً

المشاركة الأصلية كتبت بواسطة egypt0

السلام عليكم

الحمد لله التوكيل كلمنى النهارده عشان اكمل الفلوس واستلم بكره هايلاين شامبين رغبة اولى
انا طبعا استغربت من التبدير فى التسليم لانى المفروض كنت استلم الدفعه الجاية لسه كمان اسبوعين
بس المندوب قالى انه صاحب العربية هياجل الاستلام وانا هستلم مكانه

المهم عايز اعرف هل فى اكراميات بدفعها هناك للمندوب وفى حدود قد ايه؟
ايه اللى اخد بالى منه كويس هناك واشيك عليه؟
بعد الاستلام ايه المطلوب اعمله غير ضبط الكاوتش والتفويل؟
مع العلم ان دى اول عربية ليا ومش ليا خبرة فى العربيات

أولاً الف مبروك عليك العربية, وربنا يرزقك خيرها و يكفيك شرها, عربية جميلة و إعتمادية, واللون الشامبين مميز جداً.

اللى تدفعه للمندوب دى حاجه ترجعلك, أنا أشتريت من معرض, ولما سألت واحد معرفة - أكبر سناً و خبرة فى الحياة - قالى تدفع للمندوب اللى واقف فى المعرض 50 جنيه و انت بتاخد منه مفتاح العربية, ولو دفعت 100 جنيه تبقى كرمته.

بما انى من مستخدمى البيجو 301 هاى لاين هاضيف ليك مجموعة نصائح من تجربتى:

1- عند ترخيص العربية فى المرور نبه على الفنى اللى بياخد بصمة الماتور إنه مايزحش خرطوم مية الردياتير عند مروحة الردياتير, لإن ده هايتسبب فى قطع الخرطوم.

2- خد معاك واحد يكون عنده عربية عشان يبقى عارف مكان خرطوم مية الردياتير ولو الفنى زاحه من مكانه يبقى واخد باله و يبعده تانى عن المروحه.

3- لما فنى البصمة يجى عشان ياخد البصمة, أتأكد إنه ياخد باله إنك طلعت عشرة جنيه و ماسكها فى إيدك عشان تديهاله لما يخلص.

4- اعمل حسابك على فكه على جنب عشرات و خمسات وانت رايح المرور, خمسة جنيه للى بيساعدك تركن العربية فى اخر اليوم لما تيجى تركب النمر, عشرة جنيه للى هايركبلك لوح النمرة (طلعها من جيبك قدامه و أمسكها فى إيديك عشان يركبهالك صح من اول مرة و بنضافه), عشرة جنيه للى هاتستلم منه لوح النمرة فى المكتب.

5- اعمل حسابك انك تاخد معاك فكه للتصوير(جنيهات و انصاص), وفلوس فكه (ميات - خمسينات - عشرينات - عشرات - خمسات) عشان الخزنة (مصاريف الترخيص), وعشان شباك شراء الطفاية و المثلث و الإسعافات الأولية و الكلام ده كله.

6- هايبقى معاك مفتاح الريموت و المفتاح العادى و معاهم ورقة فيها الباركود اللى بيستخدم عشان لو حبيت تعمل نسخ من المفتاح, حافظ جداً على الورقة دى.

7- خد وقتك فى مراجعة كل حاجة فى العربية (الكشافات - البلوتوث - السى دى - اليو إس بى - مفتاح الريموت إنه بيشتغل فى قفل و فتح العربية و الشنطة الخلفية - عمل مفاتيح الزجاج - الكراسى), خد معاك حد و إنت بتستلم عشان تبقى إنت و هو بتراجعوا و ماتحسك إنك لوحدك.

8- الكاوتش الإحتياطى و الكوريك و مفتاح ربط حلية المسامير و حلية المسامير و السرر و طفاية السجائر, كل ده غالباً هايكون فى شنطة العربية.

9- راجع على رقم الشاسيه واتأكد إنه هو المكتوب فى العقد (افتح الكبوت الناحية الشمال من فوق داخل غرفة المحرك).

10- العربية بيجى معاها 2 كتالوج واحد عربى و التانى إنجليزى, مهم جداً عشان تعرف كل حاجه عن العربية (إزاى تسخن الإزاز الخلفى, التنبيهات اللى بتظهر فى التابلوه معناها إيه).

11- الإريال بتاع الراديو (ومتنساش تشيله جوه العربية لما تركن عشان مافيش حد يلطشه).

12- العربية مالهاش إكصدام امامى (نفس الحكايه فى الشارك و ماركات تانيه, الموضة الجديدة) أركن عربيتك عمودى أو إتأكد انك تسيب مسافة امان كفاية عشان ماحدش يريح على الكبوت وهو راجع, حتى لو إنت واقف فى إشارة أو زحمة سيب مسافة امان كفاية.

و ده تقرير وافى للعضو الكريم abohend

301 من الحجز إلى الإستخدام..تقرير وافي

301 من الحجز إلى الإستخدام..تقرير وافي (الجزء الثانى)


ايه الحاجات اللى تراجع عليها عند إستلام العربية بصورة عامة:


http://www.nilemotors.net/Nile/212403-a.html (نصائـح .. الاسـتلام الجيد والتليين السـليم لسياراتك الجديدة)

http://www.nilemotors.net/Nile/308039-a.html (نقاط الاستلام الجيد لاى عربيه جديدة من المعرض ...)


دى كل الخطوات الأساسية اللى إنت محتاج تعرفها, وإن شاء الله ربنا يباركلك فى العربية و يحفظك و يحفظها, ومتنساش تطلع حاجه لله - على قد مقدرتك - عشان تحس بالراحة و إنك مطمئن.

لو فى حاجه محتاج تسأل عليها, المنتدى مليان بالأخوة و الأخوات الأفاضل على أتم إستعداد لتقديم النصيحة و المساعدة.

المشاركة الأصلية كتبت بواسطة egypt0

ردك بصراحة جميل جدا مش عارف اشكرك ازاى
بصراحة كفيت ووفيت وجزاك الله كل خير
وربنا يجعلها فى ميزان حسناتك ان شاء الله

ربنا يبارك فيك وفى دعوتك الجميلة, ولا شكر على واجب, انا كنت و مازلت باستفيد من تجارب الاخوة الأعضاء فى المنتىدى (انا لسه جايب العربية من حوالى شهر).

1- لما تفتح الكبوت راجع على مستوى مية الردياتير فى القربه (خزان بلاستيك ابيض على الشمال).

2- بقدر الإمكان اتبع قواعد التليين المذكورة فى اللينك اللى فوق عشان تحافظ على العربية.

3- اشترى كشاف ليد صغيرو حطه فى تابلوه العربية (بحوالى 25 جنيه), اشتريته فى اول يوم جبت العربية و سبحان الله إحتجته اكتر من مرة فى حاجات كتيرة.

* قرآن كريم, أدعيه عشان لو راكن بالعربية فى إنتظار حد.

4- اعتبر العربية زى بيتك, اى حاجه تحس إنك ممكن تحتجها جيبها و حطها فى شنطة العربية (ازازتين ميه معدنيه - مناديل معطره - شريط مورفين - أسبرين - وكل حاجه ممكن تيجى فى بالك ممكن تحتجها و إنت على الطريق و مافيش سوبر ماركت او صيدليه قريبه).

* إزازة ميه معدنيه و مناديل معطره و كام باكو بسكويت فى التابلوه او فى الباب عشان تبقى قريبه منك (عشان لو حد معاك عنده سكر منخفض).

5- جراب نظارة او علبه عشان تحط فيها فلوس فكه جنيهات و انصاص عشان لما تدخل البنزينه وتدى اللى بينظف الزجاج و اللى بيظبطلك ضغط الكاوتشات.

6- اشترى عواكس شمس عشان تركبها على الإزاز من جوه لو بتركن العربية فى الشمس فترات طويله.

7- عشان تحافظ على التكييف, لو الشمس ضربت فى العربية فترة طويله, شغل المرواح و افتح الإزاز لمده دقائق, بعد كده اقفل الإزاز و شغل التكييف.

8- عزل العربية للصوت الخارجى جميل, فلو قفلت الإزاز و شغلت التكييف و كمان معاها الكاسيت, غالباً مش هاتسمع لو حد بينبهك من خلال الكلاكس, فخد بالك وخصوصاً فى الملفات و المناطق الزحمة.

9- خد بالك من ضغطة رجلك على دواسة البنزين, لو العربية ماشية و مرة واحدة قرصت جامد على دواسة البنزين لمدة حوالى ثانيتين, كمبيوتر العربية هايرمى غيارات ورا بعض و هاتلاقى العربية إنطلقت بقوة.

* إتاكد من إنك تقراً كتيب التعليمات, انا مازلت بقرأ فيه و كل يوم بستفيد حاجه جديدة, وبرده موضوعات الأعضاء الملاك لنفس الموديل.

بالتوفيق, و إن شاء الله ربنا يباركلك فى العربية, ومتنساش تشاركنا فى تجربتك للعربية و رأيك فيها.

المشاركة الأصلية كتبت بواسطة egypt0

اتفضل ياريس ضيف براحتك الموضوع موضوعك :)

شكراً جزيلاً لحضرتك
وياريت حد من الاخوة الافاضل يفيدنا في موضوع تسخين العربية قبل التحرك
نعرف ازاي ان العربية اتسخنت ونبدا نتحرك؟