الموضوع: فضيحة جديدة لتوكيل عز العرب

من الأول كدا الموضوع منقول .. و مش عارف اذا كان حد عمل بيه موضوع قبلي ولا لأ

الموضوع

كل اللي ليه مشكله مع توكيل عز العرب حاجه والمشكله دي حاجه تانيه خاااااااااااااااااااااااا ااااااااااالص
ممكن الكتير مننا سمع من واحد صاحبه او زميله في الشغل عن حد يعرفه انه اشترى عربيه زيرو وطلعت مرشوشه
انا هحكي موقف زي ده بس ده لا سمعته من واحد صحبي ولا من زميلي ده حصل معايا شخصيا
روحت اشتريت عربيه من توكيل عز العرب الفرع الرئيسي زيرو كاش
الغريب في العربيه ان من ساعت ما اشترتها وفي فترة الضمان العربيه غيرت قطع غيار كتير داخل الضمان زي:
1- سنسور بارك خلفي
2- فبرة دركسيون
3- زراير Multi
4- عدادات تابلوه
5- ساكاكات ابواب
6- ماكينة زجاج امامي (مرتين)
7- علبة دريكسيون
8- مساعدين امامي
9- مساعدين خلفي
10- مسمسار سينترك مقص خلفي
11- بلية شداد كاتينه
زي ما موضح في تقرير التوكيل اللي في الصورة
مع اني بحافظ جدا على العربية بس قلت عادي ممكن يكون الطرق اللي عندنا هي اللي بتعمل كده في العربيه
وانا ماشي مره بالعربيه جه واحد بعربيه نقل خبطني خبطه خفيفه في الجنب الشمال هي الخبطه مش جامده قوي بس حك الرفرف الامامي الشمال والمرايا الشمال
من اثار الخبطه ان البويه اللي على الرفرف والمرايا اتقشرت افاجأ ان لون البطانه اللي تحت لون المرايا احمر مع العلم ان لون عربيتي اسود زي ما هو باين في الصور ه كده
انا شكيت فبصيت على المرايا اليمين والاكصدام الامامي والاكصدام الخلفي لقيت ان المرايا اليمين والاكصدام الامامي التجاريح اللي فيهم مبينه بطانه لونها ابيض اما الاكصدام الخلفي والمرايا الشمال مبينه بطانه لونها احمر
تاني يوم روحت التوكيل عشان استفسر عن الموضوع ده قابلت المهندس المسئول عن الدهانات جه بص على المرايا الشمال والاكصدام قالي دول مرشوشين قبل كده فا طلبت اني اقابل مدير التوكيل كان اجازه فا ادوني رقمه عشان اكلمه واحدد معاه ميعاد كلمته وحكتله على اللي حصل قالي انا هرجع لملفات العربيه واشوف ان كان فيها اصلاحات ودهان قبل كده
كلمته تاني قالي انا ملقتش حاجه في الملفات فا لو كده ابعتلى ميل رسمي عشان نجيب العربيه ونفحصها في التوكيل (لتاني مره)
بعتله الميل وحددت معاه معاد وروحت التوكيل قابلت نفس المهندس اللي قابلني اول مره عشان يفحص العربيه تاني (اللي كان قايل اول مره انها مرشوشه) بص على العربيه قالي لا دي بطانه عاديه مفهاش حاجه طلبت منه انه يديني تقرير فني بالكلام اللي هوا بيقوله ده مرضيش
دخلت لمدير التوكيل حكتله على اللي المهندس قاله وانه مرضيش يعمل تقرير وانه هوا اللي قالي اصلا اول مره ان العربيه مرشوشه قالي لا ازاي الكلام ده اللي هيبص على العربيه مدير الصيانه جه مدير الصيانه بص على العربيه قال اه دي مرشوشه
خدني ودخلنا لمدير التوكيل وقاله على ان العربيه مرشوشه
فا مدير التوكيل قالي طلباتك قلتله انا شاري من عندكوا عربيه زيرو يبقى اخد عربيه زيرو مش مرشوشه
فا مدير الصيانه رد عليا رد غريب جدااااااااااااااااااااااا ااا باسلوب اغرب قالي عندك جهاز حماية المستهلك روح قلهم الكلام ده وابقى تعالى قلى قالولك ايه (على فكرة الكلام ده اتقلى كده بظبط من مدير الصيانه بس انا عرفت بعد كده هو قالي كده ليه)
مدير التوكيل عشان يهدي الموقف قالي انا هعرض الموضوع على مجلس الادارة وارد عليك بعدها بفترة رد عليا وقلي انهم رفضوا
قبل مااقدم شكوى قلت لازم اتاكد ان العربيه مرشوشه بعت ايميل للشركه الام اسالها عن لون البطانه اللي المفترض انه يكون في المرايا والاكصدام ردوا عليا بان البطانه لون موحد هوا اللون الابيض
نسترجع بقى موقف العربيه من الاول عربيه مغيرة كل قطع الغيار الي قلت عليها قبل كده وكمان يطلع المرايا والاكصدام مرشوشين يبقى مفيش غير استنتاج واحد ان العربيه دي عمله حادثه ومتصلحه ومتباعه على انها جديد
المهم روحت عملت شكوى في جهاز حماية المستهلك وحددوا معاد لجلسه لمناقشة الشكوى
حضر في الجلسه مدير الصيانه نيابة عن التوكيل وعرفت مدير الصيانه قلي روح جهاز حماية المستهلك ليه لاني اكتشفت انه هوا ومدير الجلسه اساسا على معرفه جامده جدااااااا ببعض وفوجئت في الجلسه ان رئيس الجلسه عايز يحفظ الشكوى قلتله ازاي من غير ماتفحص العربيه قلى ماعندناش الامكانيات والاجهزه اللى نعرف نثبت بيها ان الرش ده كان من التوكيل والتوكيل مقدم ورق بكل الصيانات اللي في العربيه بتقول ان العربيه مفهاش حاجه
اخدت نسخه من الورق اللي التوكيل مقدمه لقيت الكارثه اللي رئيس الجهاز اتغاضى عنها
ان العربيه قبل مااستلمها بيوم كان بيتعملها صيانه في التوكيل وكانت ماشيه 340 كيلو ( زي ماهو موضح في الصور تاريخ عقد البيع واول تاريخ صيانة)
سبت الجلسه ودخلت لرئيس الجهاز وحكتله على اللي حصل قلى ازاي يقول كده لا طبعا ما ينفعش لازم العربيه تتفحص و طلب ان يتحدد معاد جلسه تاني يتفحص فيها العربيه
في الجلسه اللي رئيس الجهاز حددها حضر نفس رئيس الجلسه ومدير الصيانه وعمل نفس الموقف انه عايز يحفظ الشكوى قلتله لا رئيس الجهاز قال العربيه تتفحص قبل اي قرار المهم وبعد كلام كتير انتهت الجلسه بفحص العربيه في كلية الهندسه جامعة عين شمس
وفعلا روحت في المعاد اللي اتحدد لفحص العربيه وبردوا حضر الفحص مدير الصيانه (اللي العربيه بتتفحص على ايده لتاني مره) وكان بيفحص العربيه دكتور من كلية الهندسه ومعاه اتنين فنين وكان نتيجه الفحص اللي اتاكد منها مدير الصيانه ان الرش على العربيه ده رش التوكيل وان المرايا والاكصدام متفكوش اصلا من ساعة ما اشتريت العربيه زي ما موضح في صورة التقرير
واتحدد جلسه في جهاز حماية المستهلك لمناقشة التقرير ولتالت مره رئيس الجلسه بعد ما اقرا التقرير يصمم انه يحفظ الشكوى مع وجود دليل قاطع بان العربيه مرشوشه
روحت عملت محضر في القسم وقلت لنفسي طالما كل الاوراق دي تثبت حقي يبقى اجيب حقي بالقضاء المصري العادل واتحددلي جلسه في المحكمة الاقتصادية بس للاسف ان المحكمة مخدتش بالورق اخدت بحكم جهاز حماية المستهلك اللي مبيحميش حد
لمل انا اخد عربية زيرو وفيها كل العيوب دي اللي اكتشفتها والله اعلم فيها ايه تاني وكان ممكن اعمل حادثه ويحصلي حاجه والمسئولين دول كلهم مش فارق معاهم حياة الناس انها تروح هدر يبقى ده اسمه ايه وشغلانتهم اصلا ايه
ده اللي حصل معايا وحسبنا الله ونعم الوكيل في كل من شارك في ضياع حقي










و دا أكونت صاحب العربية

https://www.facebook.com/alaaslama