الموضوع: الملصقة الأوروبية - European Label

سلام عليكم

الEU label هو معيار اوروبي حديث لتقييم الاطارات فيما يخص الاستخدام العادي بالنسبة لسيارات الركوب و الSUV و الشاحنات و العربات الفان





و تم تطبيقه على هيئة ملصق عليه 3 معايير بيتم ارفاقه بكل نوع كاوتش او بكل فردة




هو متعارف عليه فيما يخص الاستعمال العادي بمعنى انه اختص في 3 نقط



1- توفير الوقود (Fuel efficiency)
و ده بيقيس مدى مقاومة الكاوتش للدوران , و بالطبع الاقل مقاومة بيبقى اقل استهلاكا للبنزين , و المقياس بتاعه من A (الافضل) لحد G (الأسوأ)
و المعلن ان فرق الاستهلاك بين الA و الG ممكن يوصل لحد 7.5%




2- التماسك على الأرض المبتلة (Wet grip)
مقياس لقابلية الكاوتش للفرملة على الطرق المبتلة , من A لحد F
و المثال المعلن ان لو عندنا عربيتين زي بعض ماشيين بسرعة 80 كيلو في الساعة , واحد فيها كاوتش A و التانية فيها كاوتش F , و الاتنين فرملوا فرامل كاملة , صاحبة الكاوتش A هاتقف في مسافة اقل 18 متر ....




3- صوت الكاوتش على الارض (external noise)
و دي مش محتاجة شرح , بيتقاس بالديسيبل , و له 3 كلاسات (1, 2, 3) , و على الملصق كل شرطة في الموجة الدائرية دي بتتقفل بكلاس
و فرق الضوضاء المعلن في المثال بصراحة كبير بين ال3 كلاسات
من كلاس للي بعده الضوضاء بتبقى الضعف



و للعلم , قانونا العربيات اللي بتعمل صوت عالي في اوروبا بقى يتحسب عليها ضرايب اكتر :(

اخر حاجة , ان ال3 معايير القياسية اللي في الملصقة الاوروبية مش هي المعايير الوحيدة لجودة الكاوتش لكنها معايير تختص بمحل الاهتمام الحكومي الاوروبي فيما يخص الاستخدام العادي فقط , اللي هي الفرامل عشان الامان , و استهلاك البنزين طبعا عشان توفير الطاقة , و الاستهلاك و الضوضاء عشان البيئة
اما الاستخدام الرياضي مثلا فمش في الحسبان هنا خالص
مدى ليونة خامة الكاوتش او نشوفيته , و بالتالي راحة العربية في الركوب , مش في الحسبان هنا خالص
تآكل الكاوتش مع الوقت مالوش فيها مقياس خالص

الخلاصة ان المعيار الاوروبي ده مقياس كويس فيما يخص النقط بتاعته , لكنه مش كافي لوحده بالنسبة لحد عايز يشتري كاوتش خصوصا في بلد فيها طرق زي اللي عندنا


المصادر : مواقع دانلوب و بريدجستون و كونتينينتال
ارجو اكون افدتكم :)