إحم إحم .. يا أهل الله ياللى هنا ..
تسمحولى أدخل ؟
أنا عابر سبيل وقريبكم من بعيد .. وبلدياتكم برضه من اليابان بس من الفرع التانى إللى إسمه نيسان
المهم علشان ما أطولش عليكم .. قولوا طول
وعلشان أبقى ضيف خفيف حأحكى لكم بسرعة حكاية صغيرة عن قريبتى كرولا بنت تويوتا إللى من الفرع الغنى إللى فى بلدنا "الهاى لاين" عقبالكم كلكم لما تناسبوها
الحكاية من حوالى - شهر أو أكثر - بدأت فى الشركة إللى بشتغل فيها لما جه طلب بشراء سيارتين تويوتا كرولا 2014 full option لزوم أحد المشروعات .. وبعد الإجراءات والمناقصات والذى منه جاء دور زميلى المسئول عن تنفيذ عملية الشراء لمعاينة فئة السيارة على الطبيعة لدى التوكيل وعمل تست درايف لها
توجه فى صباح أحد الأيام المشرقة إلى توكيل تويوتا بالعباسية وقابل المهندس المسئول الذى إصطحبه فى جولة حرة بالتوكيل إنتهت بعرض تقديمى للتويوتا كرولا 2014 full option ختمه المهندس بدعوة زميلى لعمل تست درايف للسيارة باليارد المخصص لذلك .
طبعا بعد الرغى ده بتقولوا هى فين إفتكاسات التويوتا إللى وهمنا بيها الراجل ده فى عنوان الموضوع ؟؟!!
ماتستعجلوش .. الإفتكاسات حضرت .. حين هم زميلى بالرحيل وتقدم من المهندس مودعا وشاكرا له حسن الضيافة .. فما كان من المهندس إلا أن قال لزميلى : إنتظر .. تعالى افرجك على حاجه حتعجبك
أخذ زميلى من يده صوب إحدى السيارات فاتحا الباب له وقال له : إركب ..
رد زميلى بإستغراب : تااانى ؟؟ ما أنا لسه نازل من أختها دلوقتى !!
رد المهندس : لأ .. دى بقى الهاى لاين
بدأ زميلى يحكى لى عن مميزات وخصائص الهاى لاين إلى أن لمعت عينه بالإعجاب : حاقولك على ميزة فى الهاى لاين يا هشام أول مرة أشوفها فى سيارة يابانى .. هى فعلا موجودة ومن فترة فى سيارات ألمانى من فئة أعلى بكثير من التويوتا وكذلك موجودة فى سيارات إنجليزية عريقة ولكننى كنت أشاهدها فقط على اليوتيوب ولكننى يومها جلست على مقعد السائق لأجرب بنفسى خاصية "الأوتو بارك" .. إييييه ده ولا حكايات السندباد وبساطه الطائر .. رددت عليه مقاطعا : تااااااانى ؟! قديمة !!
رد متعجبا : قديمة ؟! إزاى ؟!
قلت له أخونا محمد هانى ورجالته فى قسم تويوتا فى نايل موتورز هرونا ليل ونهار أوتو بارك و ESP هههههههههه .. تحب أفرجك على فيديو كليب لأول شرح بالعربى للأوتو بارك ؟
رد زميلى بغيظ وتحدى .. طيب خد دى عندك بقى وإوعى تقولى قديمة .. المهندس طلب منى أسوق السيارة بين عامودين المسافة بينهم ضيقة جدا .. وكان الحوار التالى :-
قلت له بإستغراب شكلك مش عايز مرايات الجنب .. لأنه حتما العامودين حيخبطوا فى المرايتين وتدفعنى ثمنهم قبل ما أروح !
نظر لى المهندس مبتسما نصف إبتسامة لاتخلو من إستهزاء قائلا : مش بتعرف تسوق ؟ فرجنى وعدى بالسيارة بين العامودين .
أغلقت على باب السيارة وبدأت أتحرك بمنتهى الهدوء بين العامودين وأنا أحاول أن أخفى قلقى متخيلا نفسى أحمل الجردل والفوطة وشغال غسيل فى سيارات التوكيل (مصاريف .. حق المرايتين إللى حادشدشهم)
وفجأة .. وعلى حين غرة وقبل أن تصطدم المرايتين بالعامودين إذا بالمرايتين تنطويان آليا متفاديتان الإصطدام بالعامودين لتعودان بعد المرور بهما إلى وضعهما الطبيعى مرة أخرى
وقفت مندهشا وأنا أنظر إلى المهندس وهو يضحك من تأثير رد فعلى ويسألنى : ها .. عجبتك ؟
رددت بلا تفكير : تسلم إيييدك ياخواجه تويوتاااااااا
الهاى لاين فيها حساسات ضم مرايات ياهشاااااام
تمت الإفتكاسات وتقبلوا تحياتى ،،،
سؤال إعتراضى للأخ محمد هانى .. فى خضم التفصيصات إللى حضرتك فصصتها للهاى لاين لم يرد ذكر تلك الخاصية الإفتكاسية الخزعبلية .. هو فيه هاى لاين بعد الهاى لاين ؟ وللا السيارة دى كانت حاجه سبيشيال ؟
المفضلات