هل شراء سيارة جديدة من التوكيل افضل ام من المعارض ؟؟؟؟

**Abu Reem** · 05-04-2014 02:52 PM

اخواني الكرام...هل شراء سيارة جديدة يكون افضل من التوكيل نفسه ام من معارض السيارات ؟؟

وما الفارق في الحالتين..؟؟

- واذا كان الشراء من الوكيل..فانا اسمع الاخوة في المنتدى يقولوا..انا حاجز السيارة الفلانية من كام شهر ؟؟؟؟

فهل لابد ان اقوم بحجز السيارة اولا ؟؟ يعني هل السيارات لاتكون متوفرة اساسا عند الوكيل ...؟؟

- السؤال الاهم..هل عند الحجز بياخذ مني فلوس او اوراق معينة بيطلبها مني ....؟؟؟ وكما نسبة هذا المبلغ من ثمن السيارة عادة...؟؟
واذا دفعت فلوس الحجز..وبعدين لقيت السيارة اللي جابها لي ...ناقصة مثلا بعض الاشياء او الكماليات اللي انا عاوزها..فايه الحل في الموقف ده ؟؟؟

ياريت لو حد يفيدني لاني انا باعمل خارج مصر...والتفاصيل دي مش عارفها ؟؟؟

**abohend** · 05-04-2014 03:27 PM

وكيل أفضل بشرط تكون معاك عربية لحد متستلم

الوقت حتى الإستلام بيختلف حسب العربية و الضغط عليها

وكيل أفضل لأن بعض المعارض

بتلعب في العداد
بتجيب العربية من الميناء قيادة مش على كساحة
بعض العربيات بتبقى مرشوشة (لو إتحكت أو حتى إتخبطت فالطريق)
المعارض أغلى من الوكيل (أوفر برايس)

لو هتحجز عربية من عند الوكيل هتدفع مقدم حجز (بيختلف من سيارة لأخرى)
مثلا ال301 بتدفع 10.000 الكورورلا بتدفع 50.000

مش مطلوب غير صورة البطاقة عشان الفاتورة تطلع باسمك

المعارض أفضل لو بتجيب عربية "خليجي" بدون ضمان بس أبشن أكتر و سعر أقل لأن الخليجي مش موجود بالتوكيل

تحياتي

**abohend** · 05-04-2014 03:30 PM

المشاركة الأصلية كتبت بواسطة abu reem

واذا دفعت فلوس الحجز..وبعدين لقيت السيارة اللي جابها لي ...ناقصة مثلا بعض الاشياء او الكماليات اللي انا عاوزها..فايه الحل في الموقف ده ؟؟؟

المشاركة الأصلية كتبت بواسطة abu reem

ياريت لو حد يفيدني لاني انا باعمل خارج مصر...والتفاصيل دي مش عارفها ؟؟؟

في الوكيل مفيش حاجة إسمها كده
اللي هتتفق عليه هتستلمه مفيهاش كلام

و المعارض على حسب المعرض (في معارض سمعتها كويسة مثل سمير ريان و معارض سمعتها سيئة زي المصرية)

**insurancebroke** · 05-04-2014 03:31 PM

لازم تاخد حد معاك بيفهم
عشان ممكن التوكيل يطلع عربية رشه حته برضو

**Batman372** · 05-04-2014 03:34 PM

مفيش اى فرق تقريبا ...
الفكره بأختصار ان التوكيل كل شحناته بتبقه للحاجزين الافراد مثلك و الباقى كله للموزعين المعتمدين ...
المعارض العاديه بتاخد من الموزعين مباشره او بتبقى حاجزه مع التوكيل زى الافراد باسامى العاملين بها ..
التوكيل بيبيع بالسعر الرسمى فقط و لا يعمل اى خصم او يعطى هدايا مثل الدواسات الاصل و الغطاء مثلا ..
لكن ميزه الموزعين و المعارض بيعملو خصم للمنافسه و سرعه البيع ...
فى حاله تأخرالحجوزات مع التوكيل بال ٤ شهور ... الموجود فى المعارض لو الاعداد قليله بيبقى فيه اوفر برايس و دى بقت موضه اليومين دول و سبوبه ...
مفيش حاجه اسمها العربيه ناقصه لان ببساطه عند الاستلام لو حضرتك مش عايز تستلم براحتك و تشوف عربيه تانيه او لون تانى او فى النهايه تسترد فلوسك عادى ...
مبلغ الحجز بيختلف من توكيل لاخر و يبدء من ٥ الاف حتى ٥٠ الف و لا يتطلب اى مستندات ...
تحياتى ...

**Abu Reem** · 05-04-2014 04:48 PM

بصراحة....انا مش عارف اشكركم جميعا ازاي...بصراحة انا متوقعتش سرعة الرد ..كده.

وده يدل على ان اعضاء هذا المنتدى....بيحبوا الخير لإخوانهم....وناس فعلا محترمة

بارك الله فيكم جميعا

- يعني خلاصة كلامكم اني احجز من الوكيل نفسه افضل...

- طيب سؤالي بقى الاخر...بالنسبة لترخيص السيارة لما اشتريها من الوكيل......فانا عندي سؤال..

- انا بطاقتي فيها السكن في فيصل ....(يعني هل معنى كده ان لازم ارخص السيارة تبع مرور فيصل ) اللي زي الزفت .....لكن انا اخدت شقة في اكتوبر ...وسكنت فيها في الصيف الماضي..بس لسه طبعا البطاقة فيها العنوان القديم.....وانا طبعا عاوز الترخيص يطلع ليها في أي مرور اخر غير مرور فيصل (الزفت ) فهل ينفع يطلع ترخيصها على ( مدينة اكتوبر ).....وده لوحصل هيبقى ازاي...(وانا معنديش وقت لاني في الخارج ان استنى موضوع تغيير العنوان في البطاقة )....

هل فيه حلول سهلة

**Hmatchy** · 05-04-2014 04:55 PM

لا لازم تغير البطاقه
انا مرور السلام وحاولت وسالت بس مفيش فايده

**sersawy** · 09-03-2017 09:45 AM

السلام عليكم

ان شاء الله أنوي شراء دايهاتسو تيريوس 2016 ناقل اوتماتيك g أود الاستفسار عن سعرها لدى الوكيل ولدى المعرض ... ورأيكم فيها؟ وشكرا على تعاونكم