ساعدونى فى الاختيار ربنا يكرمكم

**Eng.ma7moud** · 07-04-2014 02:42 AM

السلام عليكم و رحمة الله و بركاتة

يا جماعة عايزكوا تساعدونى فى الاختيار بقالى كتير اوى و مش عارف اخد القرار

الحكاية اية بقى انا كان نفسى فى جولف 4 من زمان و بعد كدة دورت كتير اوى لحد ما لقيت الحالة الى عايزها لاقيت واحدة موديل 2001 ستوك 1400 فابريكة بالكامل حالة فوق الممتازة بس غالية سعرها اخرة خاااالص 74 الف بس جنوط اصلى و فرش جلد اصلى و تحفة بصراحة.

دلوقتى بأة بعد ما العربية موجودة و الفلوس بردوا الحمد لله موجودة كل ما اخد رأى واحد من صحابى يقولى بلاش هتجيب عربية موديل 2001 و مانيول ب 74 الف هتلاك حاجة عادية لانوس او كريستالة مثلآ تكون كاملة و حالة حلوة بردوا و كل قطع غيارها موجودة و صيانة سهلة و اوبشنز و فى نفس الوقت هتوفرلك بتاع 25 الف جنية

انا بصراحة متردد جدآ و مش عارف اعمل اية خصوصآ ان الجولف دية بقالها اكتر من شهر بتتباع بس غالية و مبتتبعش و انا من النوع الى بغيير يعنى ممكن سنتين ولا حاجة و اغير فقلولى رأيكم علشان انا عمرى ما ركبت المانى و مش عارف يعنى هل الفرق بينهم يستاهل فرق الفلوس ولا اية و شكرآ جزيلا

**khaled_rafea** · 07-04-2014 02:51 AM

صحابك معاهم حق, اولا فكر فى الاوتوماتيك, 75 ممكن يجيبولك بورا اوتو 1600 لو عاوز او حاجة كورى فوق ال 2007 و ممكن كمان يابانى بس تحت ال 2007, و كله اوتو

**mostafa magdy** · 07-04-2014 02:56 AM

في رأيي الشخصي فعلا طالما وصلت للرقم ده .. تجيب حاجه افضل من الجولف ..
بس بعد أكثر من تجربه .. إمشي ورا اللي حضرتك مرتاح له .. لإنك هتركب العربيه لواحده .. محدش راح يركب معاك ..
تحياتي ..