الموضوع: مشاكل البيجو405

موضوع ممتاز - متابع باهتمام وحوش البيجو

موضوع ممتاز جدا
ياريت ينجح

http://www.nilemotors.net/Nile/90554-405.html
الموضوع ده أكثر من رائع

بيجو 405 قطع الغيار بأجيبها من شارع دمشق و من مكتب فى مدينة نصر ورا التوحيد و النور
الصيانة كنت بأعملها فى شل شارع بورسعيد
بعد كده بقيت أعملها فى صيانة بيجو القطامية

شكرا يا جماعة على استجابتكم
انا من ساعة ما جبت العربية (405 موديل 2002) كان فيها مشاكل خفيفة اوى....
1-التكييف كان ضعيف... شحنتة و مكمل معايا طول الصيف من غير مشاكل. اى واحد بتاع تكييف.
2- بعد ما جبت العربية بشهر... و انا مسافر رايح الشغل لا قيت لمبة الستوب عمالة ترعش و بعدين لمبة الزيت و لمبة الحرارة و لمبة الاحتياطى بتاعة التانك عمالين يرعشو و بعدين كلهم نورا... كنت وصلت المصنع بتاعى ووقفت و شفت العربية و فتحت الموتور لاقيت الموتور و الحوض غرقانيين زيت... فكيت المصفحة و شفت لاقيت الكارتيرة سليمة ... حطيت لتر زيت موش نظيف و شغلت العربية لا قيت الزيت بينزل بين الفتيس و الموتور... اترعبت و خفت ان يكون حصل شرخ او كسر مكان الكرنك لان الزيت كان بيقع بسرعة مهولة.
المهم شديت العربية للميكانيكى فى بنها و دى اول مرة اروحلة... عرفتة عن طريق صديق فى بنها.
الراجل دة شاطر جدا و محترم و امين. المهم فى حتة صاجة بتاعة تراب بتغطى جنب الفتيس من تحت فكها لاقينا فى حتة طبة صاج وقعت... الراجل قالى خد نفسك الموضوع سهل.
فى طبات صاج بتغطى فتحات الموتور وراء الفلام ... المهم فكينا الفتيس و الدسك و الفلام و ركبناها لاقيناها موش قد كدة و ممكن تقع تانى, رحنا عملنا طبة المونيوم وكبسناها و لازقناها بدفكون (لازق 2x1).
اخد يومها مصنعية 125ج.
3- بعد ما استلمت العربية لاقيت فيها مشكلة ان التالت لو ضغط علية بيزعق... و اساسى لو جبت التالت من الرابع لازم يزعق. غيرت زيت و الصوت زى ما هو بس مافيش نحرة فى المشى....
الكل قالى الفتيس لازم يتغير.... تصليحة ممكن يكلفك و بعدين موش لازم تغيرة دلوقتى.
المهم انا ناوى اغيرة لما اغير طقم الدبرياج علشان فك الفتيس فى العربية دى صعب و رخم.
4- بعد ثلاثة اشهر غيرت بيضة و تيش اسكاترة شمال .... اللى انا شلتهم كانوا الاصلى بتوع العربية.
5-بعد ثلاثة اشهر تانية غيرت جلبة مقص شمال الكبيرة بس كانت موش اصلى اتقطعت بعد شهر و كمان غيرت كوبلن شمال الطويل بواحد صينى جديد من التوكيل عندنا (ميت غمر - دقهلية) و مساعد مالوش اصل اتضح انة زى الزفت و بيخبط و بيضة مقص شمال و تيش و بيضة اسكاترة.
الكوبلن الصينى بوش بعد شهرين و زى ماقولت الجلبة اتقطعت..... و المساعد بيخبط.... كان يوم اخبر يوم ما فكرت افك الجانب دة.

انا ماكنتش باسترخص... بس انا مالقيتش الاصلى.... انا كنت موصى التوكيل يجيبلى الاصلى, بس لما لما لاقيت ان سعرهم موش غالى قلت اركبهم لحد مالاقى الاصلى اجيبهم و اركبهم بعدين.
الكوبلن 400ج-البيضة و التيش 120ج - الجلبة 35ج - المساعد 200ج

و بعد كدة لاقيت طقم جلب UF اتحاد اوروبى جبتهم و عنتهم

يتبع

بعد كدة رحت مع ابن خالى على مصر (مدينة السلام) هو عندة 405 موديل 2000 مشكاتها انها كانت بتسرب زيت كتير من كل حتة.
كنت انا جبت نمرة الدكتور ايهاب من على النت و كلمناة و روحنا هناك.
بصراحة انت كنت حاطط امل كبير ان الشكل العام هايكون اقرب لمراكز الخدمة... بس روحت لاقيت المحل صغير على الطريق قدام مدرسة ال bbc و بنزينة وطنية.... يعنى انت لو داخل مدينة السلام من طريق مصر الاسماعيلية , هاتلاقى الاول مدرسة bbc على شمالك هاتكمل شوية هاتلاقى الدكتور ايهاب على يمينك(محل صغير) و جانبة فى حوار (شارع صغير) هايدخلك على حتة تحس انك دخلت على مقصلة عربيات بيجو.
كمية عربيات بيجو 405 مفكوكة ز ساعات بتلاقى 406 و 607,605 ...
هما الناس هناك فاهمة كويس فى الفك و التركيب... يعنى المواضيع سهلة... و عندهم قطع غيار استيراد و جديد.

بس تخلو بالكم من الواد بتاع العفشة... شماط شوية و لازم تتفقوا معاة قبل الفك علشان ممكن يقعد يكرهك فى العربية علشان يبيعلك قطع الغيار.
بس الاستاذ ايهاب وقف فى صفى كذا مرة.

غيرنا فى العربية يومها رداخ بنزين(كان بيبخ زيت) كان ب 200 ج, جوان غطاء تاكيات ب 50ج, 2 جلدة كوباية للمساعدين الى قام ب 50ج (مايجبوش 10ج اصلا).

بعد حوالى 3 اشهر من ما جبت العربية جت عربية نقل تريلا و راحت خبطت العربية من الجانب اليمين... المهم بعد كدة لاقيت العربية بتغربل فى الفرامل من ناحيى اليمين قدام... فكيت العجلة و لفيت الطنبورة لاقيتها موش عدلة (فيها رفة) رحت بيها المخرطة قالى فى رفة (و اتضح ان كلامة موش صح بعد كدة) و رفها و اكل منها يجى 5 مم و بقت رقيقة جدا و الفرامل ماعديتش مضبوطة.... استنيت بيها شوية لحد ما التيل خلص و رحت جبت طقم طنابير من التوكيل عندى ب 200ج و طقم تيل بيجو اصلى (بندكس مطبوع علية علامة اسد بيجو بتاع التسعينات) ب 100ج و طبعا نزلت معاة علشان المساعد و الكوبلن اللى ادهملى و طلعوا زى الزفت.

و ركبتهم و بعدين لاقيت المشكلة رجعت تانى ( غربلة لما ادوس فرامل من ناحية اليمين قدام).... كنت تانى يوم مسافر الغردقة بيها و بعد مارجعت رحت عند الميكانيكى فى بنها (الاسطى حسن علام فى البر الشرقى) و قلتلة شوف البلية و الصرة بتاعة العجلة.... قالى البلبة بايظة... جبت بلية من واحد اسمة طنطاوى فى ميدان المحطة ب 160 جنية فرنساوى اصلى و ركباها لاقينا الرفة مازالت موجودة .... قالى تبقى الصرة و دة مافيش منها جديد كلة استيراد....
كان فى عندى حلين واحد انى اروح بلبيس و هناك شون 405 ماهاش اول من اخر او اروح عند الكتور ايهاب فى السلام.... رحت هناك عند الدكتور ايهاب. و حكيت لبتاع العفشة على الموضوع و انى عاوز اغير صرة (لازم تحكى للصنايعى على كل اللى انت عملتة علشان دة ممكن يسهلة كتير) جرب العربية و انا معاة و بعدين رفعها و لما و قعد يفتحلى على البحرى ان العربية عاوزة و عاوزة لما لقى ان شكلى صغير و هايضحك على و يعملى البحر طحينة و كان عاوز يبيعلى الركبة اللى بيركب فيها الصرة و البلية ب 350ج و ياخد 100ج مصنعية.
و انا قبلها بيوم كنت كلمت الاستاذ ايهاب و قالى انها تعملها 225ج و تركيبها 30ج و انا اصلا مهندس و شغال فى مصنع و اعرف يعنى اية فك و تركيب و اد اية مجهود و قد اية مصنعية. فشديت معاة فقالى ان انا مقاس البيضة عندة 21 و اللى عندهم 18 و طبعا لاقيتة بيركب تانى و عاوز مصنعيتة.... ماكان منى اللا فرجت علية كل الصنايعية و حاول يسكتنى ماعرفش.... دة انا باشغل مصنع فية 30 صنايعى اصيع منة.... لحد ما جة الاستاذ ايهاب و زعقلة و بقدرة قادر جت الصرة اللى مقاسها 21 من المخزن و غيرت كوبلن يمين الصينى اللى انا كنت جبيتة (بواحد استيراد الاكس بتاعة محمل جدا) ب 450ج (الواد كان عاوز يبيعة ب 550ج) و جلدة موتور سفلية ب 70ج (نسيو يحاسبونى عليها, بس اول فرصة هاروح ليهم هاحاسبهم عليها)... بس المشكلة زى ماهية ماراحتش.....

المهم انى باعرف اتعامل مع العربيات ... دة انا كنت سايق فيات 124 لمدة 20 سنة.

حبة اكسسوار جبتهم
2 مرايات جنب (ربنا يخلى التكاتك) الواحدة ب 90ج من التوكيل فى ميت غمر
جريدة glx بتاعة باب راكب ب 75ج من بلبيس
جنط ب 100ج من بلبيس
فاكيوم بتاع التكييف (اللى بيعلى الموتور لما التكييف يشتغل) ب 50ج من بلبيس
طقم تيل خلقى (لسة ماركبتهوش بس احتياطى علشان حاجات العربية دة موش موجودة فى ميت غمر الا عند التوكيل وممكن يخلص و مالقهوش) ب 110ج
سلك دبرياج بندكس اصلى من التوكيل فى ميت غمر ب 175ج
و المفاجئة عترت على فانوس خلفى فاليو اصلى جديد زيرو فى كارتونتة ب 150ج يمين بس.

و شكرا على المتابعة و اى حاجة تستجد هاقولهالكم اول باول.

باشمهندس فيكتور...
شكرا على موضوعك المميز اللي فتحلنا فرصة تبادل الخبرات حول ال405
هل حضرتك قدرت توصل لحل فيما يخص الكاربيراتير و استهلاك البنزين العالي؟؟؟

المشاركة الأصلية كتبت بواسطة ahmedoof

باشمهندس فيكتور...
شكرا على موضوعك المميز اللي فتحلنا فرصة تبادل الخبرات حول ال405
هل حضرتك قدرت توصل لحل فيما يخص الكاربيراتير و استهلاك البنزين العالي؟؟؟

انا كلمت مركز احمد عمارة و حكيت لة على ان العربية بتهبب هباب اسود و استهلاكها عامل من 150ك/20لتر فى اسوء الظروف و ان انا باحط زيت توتال كوارتز 10.000ك و بيسود بعد حوالى 3000ك بس ..... قالى ان دة امرة سهل هايفك الكربراتير و ينضفة و طبعا هايغير البوجيهات لان الدخنة السودة دة معناها ان البوجيهات هببت هى كمان..... الموضوع هايتكلف مصنعية + ثمن البوجيهات حوالى 200ج.... الموضوع مغرى و هاروحلهم... بس لازم تكون هناك من 9ص طول الاسبوع ماعدا الاحد..... هاحاول اضبط وقت علشان انا من الدقهلية و شغال فى المنوفية.... ربنا يسهل.