حادثة بالنيو صني و محتاج أجيب اكصدام خلفي . الحمد لله

**Dr M.Noaman** · 09-04-2014 12:35 AM

بسم الله ,,

النهاردة الفجر ربنا قدرلي وقوع حادثة في المنصورة جوه البلد بعربيتي النيو صني 2014 .. كنت مهدي عشان بأعدي مطب كبير وغبي وأنا مدي انتظار كمان , بعدين فوجئت بعربية بتنط من ع المطب وجايه بكامل سرعتها من على شمالي ودخلت فيا من الخلف شالتلي الاكصدام من اليمين وخبطت الشاسيه والشوكمان وعوجه ف الرفرف فوق الكاوتش والحمد لله الفانوس اليمين اتحرك فقط لكن ما اتكسرش ..

كنت لسه ماشي وبدأ صوت العربية يخبط فركنت جمب الرصيف وبطلت العربية وقفلتها ونزلت أشوف المحترم اللي خبطني بالشكل دا , فلقيت نمرة العربية بتاعته مش الدقهلية فطلع من الغربية وكان معاه زوجته وطفل لسه رضيع وأخت زوجته صغيرة , بصراحة كان مخضوض جدا وفاجئني بإعترافه أنه غلطان ومتحمل غلطه كامل وهيدفع أي فلوس للتصليح ,, فقلتله الحمد لله على كل حال المهم ان الكل بخير بس العربية لسه جديدة بقالها شهرين فقط وأنا مأمن عليها وعايز أصلحها تبع التوكيل فلازم أعمل محضر فقالي هدفعلك أي حاجة إلا المحضر وطلع مهندس وزوجته دكتورة وكانوا أخلاق , وعرفت بعدها إن العربية اللي كان سايقها - اللي اتبهدلت برده جامد وماتورها اتبهدل خالص - ماكنتش عربيته ولا هو معاه رخص أصلا ,,,

المهم كنت بلغت 122 بمكاان الحادثة وبعدين قلتله أني هبلغ ضد مجهول رغم أني كنت صورت كل حاجة -عربيتي وعربيته ومكان الحادثة- صور و فيديو .. والحمد لله كنا مشينا قبل وصول المرور لأن الساعة كانت حوالي واحدة بالليل .. وكنت جبت محامي صاحبي أخد منه مبلغ بحيث لو احتاجت حاجة آخد منه بما أن الغلط كامل منه ولو التأمين شالها كله هرجعله المبلغ كامل بأمر الله ..

ورحت الظهر النهاردة عملت محضر ضد مجهول فعلا ف القسم وأخدت رقم المحضر عشان التأمين .. وبعدين كلمت مركز الخدمة بتاع السبع ف المحلة قالي أنه ماعندهمش سمكرة ولازم آخدها وأروح القاهرة . فكلمت التوكيل اللي شاري منه بعتني لسمكري ما استريحتش ليه بصراحة .. وفيه ناس قالولنا ع سمكرية تانيين بس مالقيناش هنا اكصدام فضي استيراد وقالوا انه موجود ف الحرفيين ب1500ج

---

الحمد لله على كل حال بس محتاج نصايحكم لأني عايز أصلحها تصليح نضيف لأن العربية فعلا اتخبطت جامد من ورا وتعبان فعلا بسبب اللي حصل دا

**kar!m** · 09-04-2014 12:47 AM

قدر الله و ما شاء فعل .. اللهم أجرك في مصيبتك و أخلفك خيرا منها

**Msanad** · 09-04-2014 04:49 AM

اتعب شويه وروح توكيل فى القاهرة علشان تعمل شغل كويس فى عربيتك خصوصا انها جديدة لسه وما تقلقشى التوكيل غصب عنه هيطلعلك الشغل مضبوط وهيستبدل القطع التالفه

**ibrahimsaad** · 09-04-2014 08:17 AM

نفس اللى حصل لى بالضبط

بس كنت واقف ودى انتظار ولقيت واحد حمار داخلى فى الهربيه من ورا خبط الاكصدام الخلفى والشنطه بس للاسف ماكانتش الخبطه ظاهره قوى من برا فسبت الراجل بعد مااعتذر واعترف بغلطته لكن بعد ماروحت لقيت الشنطه مش بتفتح فاضطررت انى اروح لسمكرى رد العوجه اللى فى الشنطه من ورا على البارد

وطبعا بتبقى حاجه وحشه لما تبقى العربيه لسه زيرو ويحصل فيها كده والواحد مش غلطان وغيره هو الغلطان

ربنا يكون فى عونك طبعا ويسترها مع الجميع

**Dr M.Noaman** · 09-04-2014 12:11 PM

المشاركة الأصلية كتبت بواسطة kar!m

قدر الله و ما شاء فعل .. اللهم أجرك في مصيبتك و أخلفك خيرا منها

اللهم آمين آمين يا رب .. جزاكم الله خيرا

**Dr M.Noaman** · 09-04-2014 12:13 PM

المشاركة الأصلية كتبت بواسطة msanad

اتعب شويه وروح توكيل فى القاهرة علشان تعمل شغل كويس فى عربيتك خصوصا انها جديدة لسه وما تقلقشى التوكيل غصب عنه هيطلعلك الشغل مضبوط وهيستبدل القطع التالفه

أنا والله شفت نصيحتك بعد ما كنت خلاص رايح لسمكري من المنصورة فطلعت كلمت التوكيل ف القاهرة وادوني رقم الاتحاد الوطني ف طنطا لقيت عندهم سمكرة الحمد لله يعني وهروحلهم دلوقتي خلاص بأمر الله

**Dr M.Noaman** · 09-04-2014 12:15 PM

المشاركة الأصلية كتبت بواسطة ibrahimsaad

نفس اللى حصل لى بالضبط

بس كنت واقف ودى انتظار ولقيت واحد حمار داخلى فى الهربيه من ورا خبط الاكصدام الخلفى والشنطه بس للاسف ماكانتش الخبطه ظاهره قوى من برا فسبت الراجل بعد مااعتذر واعترف بغلطته لكن بعد ماروحت لقيت الشنطه مش بتفتح فاضطررت انى اروح لسمكرى رد العوجه اللى فى الشنطه من ورا على البارد

وطبعا بتبقى حاجه وحشه لما تبقى العربيه لسه زيرو ويحصل فيها كده والواحد مش غلطان وغيره هو الغلطان

ربنا يكون فى عونك طبعا ويسترها مع الجميع

الحمد لله على كل حال ... أنا عندي الشنطة سليمة الحمد لله لأن العربية طويلة فالخبطة كلها جات ف الاكصدام والشاسيه والشوكمان .. كلمت دلوقتي صيانة طنطا وقالوا ان عندهم سمكرة وأنا فاكر أنك كنت رحت ليهم عشان الصيانة فعملت ايه معاهم وايه انطباعك عنهم لأني كنت عاملها عند السبع

**ibrahimsaad** · 09-04-2014 04:22 PM

المشاركة الأصلية كتبت بواسطة dr m.noaman

الحمد لله على كل حال ... أنا عندي الشنطة سليمة الحمد لله لأن العربية طويلة فالخبطة كلها جات ف الاكصدام والشاسيه والشوكمان .. كلمت دلوقتي صيانة طنطا وقالوا ان عندهم سمكرة وأنا فاكر أنك كنت رحت ليهم عشان الصيانة فعملت ايه معاهم وايه انطباعك عنهم لأني كنت عاملها عند السبع

بص يادكتور محمد هم فعلا عندهم سمكره لانى لما كنت بعمل صيانه ال 1000 كان فيه عربيات هناك بتعمل سمكره

هو مركز كبير وواسع على طريق مصر اسكندريه الزراعى بعد طنطا بحوالى 10 ك فى حته اسمها شبرا النمله
وانت رايح اتجاه اسكندريه على اليمين

ناس محترمين جدا ومكان كويس وابقى طمنا عليك عملت ايه وماتنساش تبقى تبص برده على الشاسيه للاطمئنان فقط

**Dr M.Noaman** · 09-04-2014 05:14 PM

المشاركة الأصلية كتبت بواسطة ibrahimsaad

بص يادكتور محمد هم فعلا عندهم سمكره لانى لما كنت بعمل صيانه ال 1000 كان فيه عربيات هناك بتعمل سمكره

هو مركز كبير وواسع على طريق مصر اسكندريه الزراعى بعد طنطا بحوالى 10 ك فى حته اسمها شبرا النمله
وانت رايح اتجاه اسكندريه على اليمين

ناس محترمين جدا ومكان كويس وابقى طمنا عليك عملت ايه وماتنساش تبقى تبص برده على الشاسيه للاطمئنان فقط

الحمد لله يا دكتور إبراهيم رحنا سلمناها خلاص للمهندس محمود هناك وأخدوا صور البطاقة ورخصة العربية ورخصتي ورقم المحضر ومكان الحادثة . وكلموا التأمين عشان يكملوا الاجراءات معاه .. وقال هنستلمها بعد أسبوعين بأمر الله

هو الشاسيه مخبوط فعلا للأسف من الناحية اليمين .. متني شويه كدا