الموضوع: خلاصة مشاكل فرامل الصنى الجديدة

من ساعة ما العربية دى نزلت و فيه مشاكل كتير فى الفرامل و ناس اكتر بتشتكى بس الموضوع فيه لبس كبيرعشان المشاكل مختلفه
اول مشكلة ظهرت فى الدفعات الأولى هى مشكلة صاجة التيل الخلفى و دى كانت بتعمل صوت مزعج مع الفرامل و تم علاج المشكلة فى الدفعات اللى بعدها و فيه ناس كتير اعرفهم كلموهم و تم تغيير الصاجه مجانا مع العلم ان لسة فيه ناس محطوطين على لائحة الانتظار عشان القطع مش متوفرة حاليا
المشكله التانية هى مشكله عيب فى ماستر الفرامل فى الدفعات بين 8\2012 و 4\2013 و دة برده تم علاجه فى الدفعات المقبله و على كلام حماية المستهلك انهم تقريبا 8500 و تم استدعاء معظمهم و تم تغيير الماستر و لسة الباقى و على كلامهم ان الجهاز احال نيسان مصر عشان بلغوا الجهاز بالمشكله بعد 9 شهور من معرفتهم بيها. الغريب ان انا اعرف اتنين صحابى تم استدعاء سياراتهم لتغيير الماستر مع العلم انهم ماشتاكوش من الفرامل خالص , مش عارف العيب ده عبارة عن ايه و ايه اعراضه و ممكن حد من الاعضاء كان عنده المشكله يقدر يفيدنا
اما المشكله التالتة هى المشكله الازليه بتاعه ردائة خامات التيل و ده كان بيسبب ضعف سريع فى اداء الفرامل و تاكل سريع للتيل و اصوات نحر و صفافير و بوظان للطنابير اللى يبدو ان خاماتها ليست بأفضل من التيل و هتلاقى ملاك كتير مغيرين التيل و الطنابير اكتر من مرة فى كيلومترات قليله
هو بصراحه يحسب للتوكيل انه بيغيرهم مجانا فى معظم الحالات لكن بيغيرهم بنفس النوع عشان مسترخصين يستوردوا نوع محترم و بتكون النتيجه انه يتاكل تانى بسرعه
الغريب ان فيه عربيات كتير عندهم المشكلة بتاعه التيل دى و اشهرهم البيجو 301 و لو دخلتوا المنتدى بتاعهم هتلاقى ناس كتير غيروا التيل اكتر من مرة مش عارف ليه و بيدفعوا تمنها

الكلام المهم اننا لازم يكون لينا وقفة مع التوكيل عشان يجيب نوع تيل و طنابير محترم و فى نفس الوقت ندور على نوع تانى محترم ممكن يركب عليها عشان فيما يبدو انهم مش هيعبرونا و هيفضلوا يجيبوا النوع المعفن ده و اذا كنا بنغيروا دلوقتى على حسابهم عشان الضمان بكرة نلبسه على حسابنا

انا عن نفسى عامل بالعربية 7000 و بسمع صفارة مع السرعات الهادية و حاجز بكرة فى السبع و هقولهم على مشكله التيل دى و هوافيكم بالاخبار