الموضوع: انطباعات بسيطه عن كورولا الجنوب افريقي واستفسارات ايضا .

الحمد لله وبعد عناء عن البحث عن سياره كرولا 2008- 2009 تكون حاله كويسه ومش راشه الحمد لله ربنا رزقنى بواحده 2008 ماشيه 100 الف بالظبط ومالكها من الزيرو واخر صيانه (100 الف) معموله من اقل من شهر بالظبط
على كلام مالكها العربيه مغيرتش حاجه غير طنابير وتعديل الفتيس والباقى زى ما هوه .
الحاله العامه
-العربيه معملتش خبطات او حوادث كبيره الحمد لله بس عايزه رش نضافه لان خرابيشها كتير والاكصدامات فيها الكحتات اللى بتبقى موجوده عند المعظم من بوس كل عربيه لاختها ف الركن . بس علشان لونها اسود فالخرابيسش والكحتات باينه اوى .
-الصالون برده علشان لونه فاتح وللاسف الراجل مكشهوش فشكله كده عايز غسله كيماوى علشان يرجع جديد تانى
-التابلوه بحاله الزيرو تقريبا والطاره وعصايه الفتيس جلدهم زى ما هوه مش مقشر ولا حاجه
-الموتور حالته ممتازه وصوته جميل
-العفشه ناعمه ومتماسكه ومفيش منها اصوات الا لو نقره سخيفه كعاده مفاجات شوارعنا الجميله
-التكييف كويس اوى وتوزيع الهوا من مخارجه مظبوط وقوى جدا . بس مش عارف انبارح ف الحر الشديد (التابلوه كان قارى 36 ) التكييف اداءة قل شويه مكنتش سقعان بالمعنى الحرفى بس الجو جوه ظل لطيف جدا ومفيش احساس بالصهد او الكتمه مش عارف دة الطبيعى بتاعه ولا يمكن يكون محتاج شحن فريون . علة كل تقييمى للتكييف مرضى جدااا
-العربيه كبيره لكن سواقتها سهله مش مقلقه رغم انى كنت خايف جدا لانى نازل من جين2 اصغر واسهل ف زوايا الرؤيه لكن بفضل الباور الجميل السلس الناعم جدا والتقيل ف نفس الوقت على السرعات حسيت كانى بسوقها من زمان .
-الفرامل اكتر من ممتازه ومبسوط منها جدا لانها مش بعيده عن فرامل الجبن2 ف فكره العمل لكن التطبيق نفسه احسن والاستجابه اسرع.
التابلوه شيك جدا والازرار منظمه وواضحه ونور العدادات تحفه وتقدؤ تتحكم ف الاضاءه بتاعته .
العربيه ف المجمل انا مبسوط منها اوى نيجى باه للفتيس .....!
من خبرتى البسيطه اوى اوى يومين مثلا اقدر اقول بكل ثقه الفتيس دة تسوق بالمانوال مود على الطرق الفاضيه الواسعه ( السفر او المدن الجديده) حتحس بمتعه رهيبه مع راحتك من دوسه الدبرياج وانت بتنقل كمان سواء من الشيفتات او من العصايه نفسها لحظه النقل لو شيلت رجلك من على الاكسراتير مستحيل تحس بالنقله او تسمعها حتى ..
وانت جوه البلد او الزحمه انت ممكن تسوق على ال E هوه مش ممتع وساعات بيغير نسب النقل على مزاجه بس ف الزحمه هوه دة احسن حل ومتنساش تمور كل ما تقف ف اشاره ..
-الفتيس ف المجمل مش وحش ومش حلو هوه فتيس مانوال عادى جدا عامل فيهل اوتو ( بيستعبط يعنى ) :)
-العربيه تقفيلها ممتاز وعزلها كمان ممتاز
-مريحه جدا
نيجى باه للاستفسارات واتمنى انكوا تساعدونى لان خبرتى في العربيه صفر .
1- لما بشغل التكييف لازم ادوس على auto الاول علشان لمبه ال ac تنور وبعدين ااقل سرعه المروحه علشان الاوتو يفصل . مفيس طريقه تخلينى اشغل من زرار الac دايركت ويبقي اخر ظبطه انا عاملها للحرارة وسرعه المروحه معموله ؟
2-هل اقدر اركب سينسور بارك ولا لاء ؟ بره ولا ف التوكيل؟ انا مش محتاج غير صوت مش مهم خالص الشاشه . ولو اقدر اقصد بيها ان هل فى خطوره على ضفيره الكهرباء ؟؟؟ لان العربيه متلعبش ف كهربتها خالص قبل كدة ويمكن دة سبب بهدله الاكصدامين لان الركنه صعبه شويه لارتفاع الشنطه وطول الكبوت .
3- لما ببطل العربيه بسمع صوت طق طق مش مقلق بس غريب جاى من تحت العصايه بتاعه الفتيس . الصوت دة نورمال ولا !!! ببتهيالى من الفتيس نفسه (العربيه ستارت ستوب انجن) .
4-دى تقريبا المشكله الوحيده اللى قابلتنى وفعلا محتاج تفسير من الخبراء
لما بشغل التكييف وانا على ال e او حتى على الm وماشى سلنسيه خالص ( تقريبا مش ماشى تاتا زحمه جدا ) مع الفرامل العربيه كانها حتتطفي والار بي ام ينزل تحت اوي ويطلع تانى !!! ايه دة باه !!! لكن مبتطفيش .
5-الفرش الفبريكه بيج وقماش طبعا وعايز يتغسل لانه مبقع . ليه حل ولا كسوه...! ( مش عايز احط كسوه علشان الفرش فيه ايرباجات .
6- المرايا اللى ناحيتى الكفر البلاستيك مكسور *( على كلامه موتوسيكل ابن حلال لطشهوله) المرايا بكام علما بان المرايا نفسها سليمه والكهربا شغال وزى الفل . (بفكر اسيبها عشان العين بس اعرف السعر تحسبا )
7-في كلبسين من كلبسات اللى ماسكه الوش البلاستك اللى مغطى الردياتير ف الاول دة مش موجودين اجيبهم منين ؟
8-حساسات النور والمطر مش عارف اشغلهم ( الكتالوج كبير ومش فاهم الظبطه بتاعتهم)
9- لو في نصايح محدش يبخل انا عارف انى طولت :) وشاكرين مقدماااااااا .
اللى العربيه محتاجاه علشان ترجع جديده زى الاول
1- رشه نضافه معدا السقف علشان لمعتها ترجع تانى من غير معجون حتى لو في نقر خفيفه .
2-الفرش يتنضف من بقع البيبسي او الشاى اللى فيه او كسوه جلد .