الموضوع: تقرير: تغيير نظام الفرامل للنيو صني 2013

السلام عليكم ورحمة الله وبركاته

ليكوا وحشة يا نيساناوية.

النهاردة حأحكيلكم عن تجربتي مع توكيل السبع في عملية تغيير نظام الفرامل.

لكن قبل كل شئ بأحمد ربنا اللي بيستجيب لعباده لما بيدعوه ( دعيته انه يصلحلي العربية وبعدها بساعة كنت خارج بالعربية وهيا زي الجديدة وأحسن)

لو تفتكروا من الموضوع اللي فات ان صوت الصفارة في التيل ما اختفاش برغم الصيانة والصنفرة.

اللي مش فاكر آدي لينك الموضوع اللي فات http://www.nilemotors.net/Nile/40241...00-2013-a.html

خدمة العملاء بتاعت السبع كلموني وقولتلهم ان المشكلة بتاعت التيل ما اتحلتش فطلبوا مني اني أزورهم تاني علشان يحاولوا يحلوهالي.

للاسف ماعرفتش أروحلهم غير بعد الصيانة بحوالي شهر ونص.

المهم جيت في يوم كنت فاضي في الشغل قولت أروح لهم النهاردة.

اتصلت بيهم الساعة 11 حجزولي ميعاد على الساعة 1 ( وديه ميزة عن أوتو ايجيبت بصراحة).

روحت استلموا العربية مني وقولتلهم على المشكلة والمهندس قالي انهم حيشوفوها ويحاولوا يحلوا المشكلة.

طلعت الكافيتيريا وكان على حظي صيانة العربية قدامي فكنت متابع اللي بيحصل.
روحت صليت العصر في المسجد الكويتي اللي جنب السبع ودعيت ربنا وانا ساجد انه يصلح لي العربية لاني كنت خايف جدا ان المشكلة ما تتصلحش واضطر آجي تاني.

بعد الصلاة رجعت السبع تاني ولقيت الفني بيصنفر التيل وبينفخ الطنابير وبعدين قام مركبهم تاني ونزل العربية.

طبعا انا قولت ماهما عملوا كده قبل كده والمشكلة ما اتحلتش فالظاهر اني حأضطر أرجع تاني وتالت وكنت متضايق أوي.

شوية لقيت المهندس بيكلم الفني والفني شكله بيشد معاه ( الساعة كانت 4:30 ).

تقريبا كان عايز يروح والمهندس كان بيكلفه بحاجة.

المهم لقيت العربية بعد كده اترفعت تاني ولقيت الفني بيركبلها طنابير لسه بلمعتها ..... بصراحة فرحت جدا وقولت يا رب يكونوا اكتشفوا المشكلة وبيغيروا الجزء اللي فيه العيب.

شوية نزلوا العربية وعملولها تيست وبعدين خرجوها.

شوية لقيت المهندس جالي وقالي انهم غيروا:-
1- التيل
2- الطنابير
3- كاليبر الفرامل ( واللي أظن انه ماستر الفرامل)

قولتله طيب والتكاليف قالي كله في الضمان (مادفعتش حتى تمن الكشف على العربية).

قولتله طيب ممكن اعرف ايه اللي ممكن يكون سبب في اللي حصل ده مني علشان اتفاداه قالي انت مفيش عليك اي غلط المشكلة في السيستم نفسه.

استلمت العربية ومشيت بيها ولحد دلوقتي الحمد لله المشكلة اختفت تماما.

تعليقاتي على الصيانة:-

1- السهولة الشديدة للحجز مع السبع.
2- اهتمام السبع بالعملاء بتوعه من خلال متابعتهم بالتليفون بعد الصيانة.
3- التعامل المحترم للسبع ( ماكانش فيه لف ودوران وغيروا السيستم على طول من غير طلب مني حتى).

أخيرا الحمد لله اللي كرمني بالعربية وبيكرمني دايما في كل مشكلة معاها وبيحلهالي من غير حول مني ولا قوة.

له الحمد في الأولى والآخرة وله الحكم واليه ترجعون.

ألف مبروووك ياباشا .. ده السبع اللى فى المعادى ؟؟