كيفية تقوية شاسيه 128

**ِAhmed n** · 16-04-2014 12:28 PM

اصدقائي الاعزاء
السلام عليكم ورحمة الله وبركاته .
ارجو منكم سعة صدركم في هذا الموضوع
انا مبتدئ وليس لدي خبرة كافية في ما يخص السيارات انا املك سيارة 128 موديل 80 نصر ولدي بعض الاستفسارات حول مشاكل هذة السيارة العجيبة .
انا لسة شادد السيارة من حوالي 6 أشهر وكنت شاريها رشة دواخل وكان بالسيارة بارومة جامدة في الدواسات الامامية والكارتيرات الخلفية والرفارف الامامية والسمكري الله يسمحوا معملش الشغل بضمير لما بنزل تحت العربية بلاقي زي ميكون حاطط اجزاء صاج بشكل عشوائي جدا مبوظ شكل العربية من تحت وابتديت دلوقتي الاقي شرخ في فرد الشاسيه اليمين من عند الدنمو واخر في الفردة الشمال من قبل الركبة الشمال وبسمع صوت طقة مع الفرامل وفي اول الطلعة وبالذات في المطبات الصناعية .
معلش انا اسف جدا على الاطالة بس جوايا كلام كتير قوي نفسي افهمه !؟
1- ايه هو موضوع تقوية الشاسيه دة وهل لو عملت تلبيسة للشاسيه او خوصة في الزوايا بتاعة الشاسيه بيأثر بعد كدة على متانة العربية ومين الي يعمله حداد شاسيه ولا سمكري ؟
2- هل الدواسات الامامية بتتباع صاج جاهز على التركيب زي الرفارف كدة واجيبه منين ولما بيركب بيبان ولا لأ ؟
معلش يا جماعة اسف جدا على الاطالة بس العربية دي هتجنني والصنايعية مبقوش فهمين علشان يفهمونا اسف جدا على الاطالة مرة تانية .

**Gelgel2004** · 16-04-2014 06:07 PM

بعها احسن لو الظروف سمحت

هتصرف كتير و موش هترجع زى الاول
تحياتى

**ِAhmed n** · 23-04-2014 06:40 PM

ايه يا جماعة انتوا مش بتردوا عليا ليه والله محتار وتعبان وعاوز افهم ممكن اعمل ايه ؟

**ِAhmed n** · 27-04-2014 11:11 AM

105 مشاهدة ومحدش بيرد انتوا فين يا جماعة .....

**Gelgel2004** · 27-04-2014 11:18 AM

الاحسن تتباع يا استاذ احمد
هتصرف كتير و موش هترجع احسن من الاول

**ابو لؤى** · 27-04-2014 06:45 PM

حضرتك لو خسرت الف دلوقتى هتخسر 5 وبرده مش هتجيب سعر بعد كده بيع دلوقتى وخساره قريبه افضل

**ِAhmed n** · 28-04-2014 11:06 AM

المشاركة الأصلية كتبت بواسطة ابو لؤى

حضرتك لو خسرت الف دلوقتى هتخسر 5 وبرده مش هتجيب سعر بعد كده بيع دلوقتى وخساره قريبه افضل

اولا : مشكور جدا على مرورك واهتمام ردك

ثانيا : انت كلامك صح بس انا عملت حاجة تانية
انا اشتريت العربية ب (12,500) اول حاجة غيرت
ديسك - اسطوانة - بلية - وير دبرياج - كاوتش كوبلن داخلي - ماستر فرامل - تيل فرامل - بطارية - قاعدة موتور - قاعدة فتيس - كبالن - ترس اسبلاتير - مساعدين اماميين وبطاحات وفلاتر وزيت وطقم كهرباء والحجات دي

وبعد كدة بحوالي سبع شهور عملت
طقم شنبر للموتور وجوانات وسمكرة ودوكو وضفيرة كهرباء جديدة وسروجي جديد كله وغيرت لون العربية وورقة سوستة ومقصات خلفية وامامية وجلب ميزان ومقصات
وطبعا التجديد والفحص يعني انا صرفت على العربية كلها صرفت حوالي (9000) العربية بقالها معايا بالضبط اقل من سنتان

نيجي بقى للجانب السيئ

العربية كان فيها بارومة في الكرتيرات الخلفية والدواسة الشمال وتحت الرفرف الامامي الشمال والعتب من قدام وسمكرة من برة
السمكري طلب مني عتب استثماري وقطع صاج للدواسة الشمال ورمم البارومة الي كانت في الكرتيرات الخلفية بس السمكري مكنش عنده ضمير لما بنزل تحت العربية بحس انها اسف جدا في التعبير مرقعة صاج مش ظريف المنظر من عند الدواسة الشمال والدواسة بتلب تحت رجلي لما اضغط عليها ولقيت
شرخ في فردة الشاسيه اليمين اول مرة يتشرخ وعند الركبة الشمال برده اول مرة تتشرخ وطقة مع الفرامل من الناحية اليمين
فمش عارف اعمل ايه بعد المصاريف دي كلها مع العلم ان حركتي بالعربية قليلة جدا جدا جدا
ومعلش اسف انا طولت عليك قوي واخدت من وقتك كل دة واسف مرة تانية ...