أنا محتار بين الإنسجنيا التوب لاين و المرسيدس سي 180 موديل 2012 كلاسيك مستعملة بمبلغ لا يتعدى 300000 جنية لأنى مش هقدر أدفع أكتر من كدة
مع كامل الإحترام لجميع أنواع السيارات و بالأخص بي إم دابليو بس الفكرة إنى كان عندى بي إم قبل كدة و عاوز أجرب حاجة جديدة كما أنى غير مقتنع بالمرسيدس cla علشان جر أمامى و كدة فقدت أهم ميزة فيها بالنسبالى بالإضافة إن ground clearance أقل من 10 سنتى ودى مشكلة بالنسبالى علشان بسافر كتير و فى طرق بيكون فيها مطبات عالية
سبب حيرتى إنى بحب العربية تكون مدلعة أوبشن و حركات و تكون هاى كوالتى علشان أنا بزهق بسرعة من العربيات و دة متوفر فى الإنسجنيا بس خايف من إعادة البيع مش عاوز أخسر كتير
و بالنسبة للسي 180 مكانيكا أحسن حتى لو بفرق مش كبير لأن الأوبل كويسة بردو و برستيج عالى و طبعا إعادة البيع فيها أفضل بس المشكلة إنى مستحرم أدفع المبلغ ده فى عربية من غير فتحة سقف و حساسات و الأوبشن بتاعها قليل غير إنها هتغير شكل كمان كام شهر و هبقى old shape بس فلوسها محفوظة فيها
مش عارف أعمل أه عاوز مخسرش كتير و فى نفس الوقت عاوزها مدلعة مع العلم إن العربيتين حجمهم مناسب و أن عمرى فى أوائل الثلاثينات و أن ظروف شغلى بتخلينى أسافر إسبوعيا بالعربية ( و المنظر بيفرق فى الشغل عندى بنا و بين بعض )
بعتذر لكل إلى رد على الموضوع فى قسم أوبل إنى عملت موضوع تانى بس ده لأنى عاوز رأى الجميع فى المنتدى و شكرا السلام عليكم
المفضلات