الموضوع: ارتفاع بيجو 301 و Aerodynamics

السلام عليكم
قرات قبل كده ان ارتفاع الـ 301 عن الارض هو 16.6 سم

ولقيت عكس الكلام ده من خلال هذا الرابط

Jordan Times

مكتوب Ground clearance: 139mm

يعني 13.9 سم

عاوزين نعرف انهي ارتفاع صح ؟ خاصة ان موقع بيجو مش موضح ده

النقطة التانية Aerodynamics

مكتوب 0.32 هل ده كويس ؟

منتظر الخبراء للإفادة..

المشاركة الأصلية كتبت بواسطة ahmed amin

أرتفاع العربية عن الأرض في مصر 16.6 سم, ودا الرسمي.


وعلي ما أتذكر إن ال 508 كدا برضه هيا وال 3008 وال 308
واللي من ملاك البيجو 301 ممكن يجرب يشوف الأرتفاع كام بالظبط بمسطرة.
والأرتفاع دا ممتاز جداً, ومشوفتهاش بتحك في أي مطب وكل الملاك أجمعو علي دا.

أبقي راجع ردي في الموضوع دا,
http://www.nilemotors.net/nile/379551-301-2013-a.html


والأرقام اللي حضرتك شوفتها علي مواقع تانية دي بتفرق من بلد لبلد,
يعني علو المرسيدس c class زي ال c180 مثلاً أرتفاعها في دول بيوصل ل 10 سم بس زي أمريكا عشان عندهم طرق مفتوحة أكتر وعرض الشوارع أكبر ومفيش مطبات.
أما علو المرسيدس في الهند 13, وهنا في مصر علي ما أتذكر 14 أو 15 ودا معقول في المطبات الناعمة أو المطب العريض اللي بتطلع عليه العجلات الخلفية قبل ما تنزل العجلات الأمامية علي الأرض.

أما المطبات العالية في أرتفاعها والعجلات الأمامية بتنزل علي الأرض قبل ما الخلفية تطلع علي المطب دي بتحك حكة بسيطة بس اللي بيسمعها بيبقي متأزم طبعاً من الأحساس وهوا المطب عمال يحك له في شاسية العربية.



فيه بقي bmw 525 e60 معانا في الشغل,
دي أرتفاعها عن الأرض 13 بس,

المشكلة الأكبر مش في الأرتفاع, المشكلة إن المسافة ما بين العجل الأمامي والخلفي كبيرة, 2888mm
ودي بتحك بينا في كل المطبات تقريباً وحتي المطبات الهايفه,
عشان كدا دايماً الكاوتش الأمامي بينزل علي الأرض قبل ما الخلفي يطلع علي المطب وبكدا بتحك في كل المطبات,

الباسات والجيتا حوالي 12 سم, وبرضه بيحكو في المطبات, ولازم تعرض بالعربية علي المطب عشان متحكش بيك.

فيه عربيات تانية ممكن تكون أرتفاعها 13 سم برضه, بس ال wheelbase بتاعتها قصيرة زي العربيات الهاتش باك, عشان كدا مش هتحك في كل المطبات علي الرغم من أنها في نفس أرتفاع ال bmw e60

المشاركة الأصلية كتبت بواسطة ahmed amin

بالنسبة للأيرودينامكس أنا فالرقم اللي حضرتك قريته هوا مظبوط وكويس جداً,
وعشان تعرف هوا كويس ليه لازم تعرف معني الرقم الأول,

دلوقتي لو أحنا جبنا طبق أكل من بتوع السفرة وطلعته من شباك العربية وأنت ماشي علي سرعة, بيكون الدراج بتاعه 1.1

لأنه بيكون سطح غير أنسيابي ومقاومته للهواء عالية, فبيكون صعب عليه أختراق الهواء وتجميع سرعة عالية فهتحتاج قوة أكبر عشان تقدر تجمع بيه سرعة بسهولة وتوفر في الطاقة اللي هيا البنزين.

العربيات النقل بيكون 0.90 لأن تصميم الكابينه من فوق أنسيابي نوعاً ما, مش زي الطبق.!
ولكن برضه العربيات النقل كل وشها رأسي وكبير ومش أنسيابي بالمرة,,
ودا هيبقي شكل وش أو مقدمة العربيات النقل في المستقبل عشان تقدر تخترق الهواء بسهولة من غير ما تحتاج تحرق بنزين كتير, وعشان برضه تجمع سرعة بسهولة وتفضل ثابته علي السرعة دي من غير ما تعمل حمل علي الموتور من مقاومة الهواء العالية زي اللي بيحصل مع الطبق.



-----------------------------------------------------------------------------------------------------


الأشكال الأنسيابية للعربيات الصالون العادية بيكون الطبيعي بتاعها من 0.45 ل 0.35
والرقم دا بيفضل يقل كل ما وش العربية بيكون أنسيابي أكتر أو الجزء اللي بيقابل الهواء بيكون أصغر,,

وكل ما الرقم يقل, كل ما العربية تكون أنسيابية أكتر في تجميع سرعة عالية.
والسرعات بقصد بيها من 180 وأنت طالع لحد 300 كيلومتر في الساعة.

أما لو هتتكلم في سرعات لحد 100 كيلو متر أو لحد 140 و 160 حتي.
فأي عربية في السوق هتجيب الرقم دا بسهوله, حتي اللادا بتجيب من 0-100 و 120 في وقت معقول مقارنة بتصميمها اللي هوا مفهوش أي أيرودينامكس,,
وأي شغل في التصميم لعربية بعد ما طلعت من مصنعها مش هيفرق برقم كبير ولا حتي برقم يعدي جزء من الثانية.
اللي بيفرق في تجميع السرعة وتوفير البنزين في السرعات الأقل من 100 هوا حاجتين
عزم الموتور, ووزن العربية اللي كل ما يخف بيساعد علي تجميع السرعة بشكل أسرع.

النيسان ال gtr عامل 0.26 ودا من أقل وأفضل الدراج لأيرودينامكس لعربية في السوق.
فا ممكن تقيس علي رقم النيسان gtr لو عايز,,


لكن الموضوع مش بيتحسب بالطريقة دي بالنسبة للعربيات الأقتصادية.
وكل العربيات الجديدة تصميمها أنسيابي ومفهاش أي مشكلة من ناحية الأيرودينامكس.


-----------------------------------------------------------------------------------------------------


وفي الختام الدراج الخاص بالأيرودينامكس بتاع ال porsche 911 gt2 عامل 0.32 !!!
ودا بالمناسبة نفس رقم الدراج للأيرودينامكس الخاص بالبيجو 301.




تحياتي ليك.

انا مش عارف اشكرك ازاي بصراحة
مهما قولت مش هوفيك حقك
تسلم ايدك يا استاذ احمد علي الشراح الوافي والتوضيح الاكثر من مميز
الحقيقة استفدت كتير وكل مدي احترامي للعربية دي بيزيد
تحياتي لحضرتك