الموضوع: مقارنة ( أليجانس vs جينز كار ) لفرش السيارات

أنا رحت الاثنين فى نفس اليوم ولسه هركب بكره ورأيى :-
المعاملة :محترمين ولكن حسيت اليجانس أفضل وأصدق أما جينز فاحترام مصطنع شويه
الخامات : اليجانس بيشتغل بخامة واحدة ألمانى وجينز كار عنده خامات واختيارات لكن ما تقدر تفرق بينهم وأرخص خامة فيهم أغلى من خامة أليجانس علشان كده أهم فرق بينهم السعر
السعر : لصالح أليجانس أرخص حوالى 500 جنيه وطبعا شغل أليجانس معروف إنه كويس وأنا شوفت كراسى خلصت قبل التركيب وكانت جميلة وفخمة
الغرز الدبل : أليجانس متكلمش فى زيادة عن السعر لو عملتها دبل يعنى اعتبرها من ضمن السعر المتفق عليها ولما شفتها هناك معمولة بحرفيه الصراحة على قدر خبرتى البسيطة , أما جينز قالى إنه بيضيف 200 جنيه لو الغرز دبل .
الذوق وإختيار الألوان : أليجانس وافقنى فى الذوق وساعدنى علشان أوصل لشكل فرش كنت عايز زيه والمفروض إنه مجهزلى الخامات واشتراها بالذوق واللون بناءً على طلبى علشان أركب بكرة , يعنى لم يحاول إنه يفرض الخامات اللى عنده علىَّ , وعلى العكس تمامااااااا فى جينز قلى لأ على اختيارى وفى آخر الحوار فهمت إن اللون مشموجود عنده واتحجج إنه قديم والغرز الدبل لونها فاقع وإنه بينصحنى أعمل من غير غرز دبل والله أعلم بصدقه بس أنا مرتاحتش لكلامه بصراحه رغم أدبه فى الحوار .
الحجز : جينز بعد أليجانس بإسبوع طبعا علشان سيطه وسمعته اللى أنا مش بنكرها ولكن أسعارهم مبالغ فيها .

إن شاء الله هقولكم الكلام النهائى بعد بكره - بعد التركيب بس مبدئيا أليجانس فى رأئى أحسن كتيييييير وحتى لو فيه فرق فى الخامة ما يستاهل فرق السعر الكبير بينهم , يعنى زيادة السعر مرتبطة أكتر بإسم جينز وسمعته ولأنه شغال من زمان قبل أليجانس اللى لسه بقاله سنوات قليلة فاتح .

والسلام عليكم ورحمة الله وبركاته .

المشاركة الأصلية كتبت بواسطة mohab.nabil

الفرش ده فى الـ c4 ?

أيوه يا باشمهندس مهاب الفرش للسى 4 , ويا رب تكون بخير وموفق فى شغلك بره مصر وترجع بألف سلامة , خالص تحياتى لك .