محتاره اشتري ايه

**Emy Saad** · 24-04-2014 04:48 PM

السلام عليكم ورحمه الله وبركاته
انا سجلت لان المنتدي ماشاء الله ممتاز وواضح جدا خبره الكثيرين
من فضلكم انا عاوزه اشتري سياره وطبعا مستعمله وفي حدود 25 الي 27 الف
انا لفيت كتير جدا بس للاسف الي علي مواقع سيارات كلها سيارات مليانه مشاكل
وعلشان انا بنت ودي اول تجربه في شراء السيارات بيضحك عليا
بهتم بحاجات بشوفها مهمه بالنسبالي و واضح انها مش الاولويه
زي التكييف وزجاج كهرباء وهاتشباك والاهم اوووووووووي
تكون باور لاني لما كنت بتعلم اتعلمت علي 28 وكنت هعيط وانا بركن درعاتي وجعتني جدااااااااا وكرهت ال 28 بسبب كدا
فلازم طبعا عربيه فيها باور
لاقيت عربيات نظيفه جداااااا زي الفور فيسيتا و شارد 92 نظاف جدا ومفهمش الهوا
بس الميكانيكي ومحلات قطع الغيار قالولي هتغلبي علشان تجيبي قطع الغيار
وانا اصلا معنديش اخوات ولاد يلفو علي قطع غيار كمان مش علشان اجيب عربيه هبهدل بابا
ومش عاوزه عربيه تكون مشاكلها كتير علشان مش ينفع كل يوم والثاني عند الميكانيكيين وطبعا معروفه السخافات علي البنات
عجباني البرايد بس مش لاقيه بالسعر الي معايه
لاقيت اونو بس سمعت ان تكييف مش كويس وكمان انها 1000 C C يعني مش بتاعت سفر اوي
وعجبني شكل السكودا بس عرفت ان مفهاش باور وطبعا دي مصيبه بالنسبالي
والشارد كنت بدور فيها بس قالو لازم حديثه علشان تتوافر قطع الغيار
وشلت من دماغي فكره الفورد طبعا
والبولو غير مناسبه تماما للي معايه
ياريت بخبرتكم تفيدوني بالانسب ليا في حدود المبلغ الي معايه
وميكنش فيها مشاكل كتير
ومحدش يجبلي سيره ماروتي لانها عامله زي علبه الكبريت بكررررها
وشكرا جزيلا ليكم جميعا وعلي مجهدكم الرائع في المنتدي

**eng.m7md.ali** · 24-04-2014 04:57 PM

قدام حضرتك اختيارات زي الابيزا 94 .. بيجو 205 .. ديهاتسوا ميرا زي ماحضرتك قولتي .. العربيات دي قطع غيارها رخيصة وموجودة كتير .. ولولى ان حضرتك بنت كنت قولتلك لادا نيفا عربية كوويسة بس معرفش باور ولالا

**ENG.MaRk** · 24-04-2014 05:10 PM

علي فكرة انا بسافر عادي بالأونو و تقريبا هي الوحيدة اللي هتلاقي حالتها معقولة بالسعر ده و قطع غيارها متوافرة

**Emy Saad** · 24-04-2014 05:13 PM

المشاركة الأصلية كتبت بواسطة eng f3lix

قدام حضرتك اختيارات زي الابيزا 94 .. بيجو 205 .. ديهاتسوا ميرا زي ماحضرتك قولتي .. العربيات دي قطع غيارها رخيصة وموجودة كتير .. ولولى ان حضرتك بنت كنت قولتلك لادا نيفا عربية كوويسة بس معرفش باور ولالا

لالالالا نيفا لا هي دي عربيه اساسا
الابيزا جميله برضو بس لقيت في حدود الفلوس الي معايه 92 سيستم بورش
ملقتش 94 خالص
وسيستم بورش سمعت ان ليه عيوب
دا فعلا ولا لا وايه هي الهعيوب

**Emy Saad** · 24-04-2014 05:20 PM

المشاركة الأصلية كتبت بواسطة eng.mark

علي فكرة انا بسافر عادي بالأونو و تقريبا هي الوحيدة اللي هتلاقي حالتها معقولة بالسعر ده و قطع غيارها متوافرة

الي محضرتك موديل كام واخبار التكييف ايه لاني قريت ان التكييف فيها ملهوش لازمه
ومتوسط السعر كام
لاني لاقيت واحده ايطالي اصلي 93 فربيكا بره وجوه وحالتها فوق الوصف بس كان ماسك في 28500 مش راضي ينزل ولا شلن وطبعا شيلت الفكره من دماغي

**eng.m7md.ali** · 24-04-2014 05:26 PM

المشاركة الأصلية كتبت بواسطة emy saad

لالالالا نيفا لا هي دي عربيه اساسا
الابيزا جميله برضو بس لقيت في حدود الفلوس الي معايه 92 سيستم بورش
ملقتش 94 خالص
وسيستم بورش سمعت ان ليه عيوب
دا فعلا ولا لا وايه هي الهعيوب

السيستم بورش بعيدة تماماً عن الابيزا اللي اقصدها وكمان مش حلوة خاااااالص

دوري حضرتك ممكن تلاقي وبصي كمان عالبيجو 205 حلوة

**mahmoud_ali** · 24-04-2014 05:28 PM

هواندا اكورد 87 او سفيك او شارد او ابيزا او فيلشيا

**J A G U A R** · 24-04-2014 05:38 PM

اعتقد افضل اختيار جيلى فروته

**aw2100** · 24-04-2014 05:44 PM

افضل عربية ليكى فى حدود ال27 الف
جولف او ابيزا وفية الاسكودا فورمان عربيات المانى مصفحة وقطع غيارها معقولة بس اهم حاجة تدورى قبل ماتشترى على ميكانيكى معرفة امين ومحترم يشترى ليكى العربية بعد مايفصصها ويلتزم بصيانتها بعد كده اهم حاجة حاله العربية و 1000 مبروك على العربية الجديدة !!