35,000 الف كيلو مع c elysee

**back2life** · 26-04-2014 06:21 AM

السلام عليكم
انا من ملاك ستروين سى اليزيه واشتريتها ب 135 الف فورى من اسواء معرض ومركز صيانه ماجد اوتو ودلوقتى تميت 35,000 كيلو بيها ودا ملخص سريع عنها

1- ماتور العربيه شديد وعزمه قوى حتى لو كان فيها وزن كبير
2- بالنسبه للفتيس عربيتى اتوماتيك وفعلا فى نتشه فى الفتيس تضايق الواحد لكن زى ماقريت وسمعت وسالت ان دا تصميم العربيه وفى عربيات اوروبى بنفس الشكل لكن فى مصر الوضع يختلف

3- التكييف بيضعف سحب العربيه زى كتير من العربيات لكن دا فى الزحمه بس وللاسف دا مش مناسب للطرق المصريه
4- ارتفاع العربيه مناسب لو مافيش وزن والعربيه عفشتها سبور طريه لو فى وزن بتهبط جامد وبتحك فى المطبات
5- بودى العربيه محترم جدا وامن جدا جدا وحصل اكتر من خبطه بس الحمدلله بتكون حاجات بسيطه عكس لو عربيات الكورى الورق

الصيانه

اول وتانى صيانه ليا كانت عند ماجد اوتو فى جسر السويس وللاسف اسواء المراكز اللى ممكن تشوفه والله لو ميكانيكى برا كان ارحم منهم ومن نصبهم فى الاسعار تغير زيت عندهم 340+الضريبه ..تغيرالتيل 480+الضريبه فلتر زيت 57+ضريبه المصنعيه 288+ضريبه!!

تالت صيانه فى عز العرب

زيت ب 310+ضريبه فلترزيت51+ضريبه تيل فرامل 380+ضريبه زيت310+ضريبه بيجوهات مش متذكر بس 127 او157 مصنعيات 440+ضريبه !! المهم واتعملى تحديث اللى كان المفروض يتعمل على العربيه فى 1000 كيلو والعربيه محتاجه يتغير الطنابير بتعتها وتكلفتها 840جنيه+ضريبه ومصنعيات لانها اتكلت لانى كنت ماشى بتيل فاضى

وعموما مشكلة التوكيل موجوده فى كل انواع العربيات مش عز العرب بس الاستغلال اسلوب حياة بنسبالهم

تحياتى للجميع

**civilpharaoh** · 26-04-2014 06:38 AM

مشكور علي التقرير

**ahmed azaizy** · 26-04-2014 06:56 AM

يعنى العربيه فيها عيوب قويه اوى !!
الفتيس والنتشه دى مشكله
سحب العربيه مع التكيف !! انا معايا جولف 5 اوروبى طبعا والحمد لله مفيش تأثير مع التكيف .. يبقى دى مش مشكله اوروبى !!
اما موضوع المطبات مع تحميل العربيه ده طبيعى فى شوارعنا واعتقد انها مش زى الجيتا مثلا فى المطبات
ياريت كمان تقولنا ارتفاعها كام عن الارض ؟؟
والتوكيل كمان تقريبا مفيش حد بيشكر فى التوكيل بتاع اى عربيه فى مصر وبالذات عز العرب مع ان عندى معلومه انهم بيتعاملوا مع الستروين افضل من البروتون

عموما ياريت توضح اكتر مشكله النتشه فى الفتيس : بتحصل امتى؟ هل مستمره؟ سألت عنها فى التوكيل؟
وكمان بالنسبه لسحب العربيه : ياريت توضح حضرتك اول مره تركب اوروبى؟ او كان معاك كورى قبلها ؟
عشان لو اول مره تركب اوروبى مش هتبقى متعود على السحب الضعيف للأوروبى فى بدايه الطلعه وبعدها التجميع بيبقى ممتاز

**back2life** · 26-04-2014 07:28 PM

انا اعتبرها عيب لو دا مكنش معروف لدى الشركه لكن دا تصميم نتشة الفتيس لو مبضرش ولا بياثر على الفتيس خلاص تعود والنتشة دى بتحصل امتى لما تكون ماشى بسرعه وتهدى مره وحده او لما تعمل كيكات باعربيه (بنزين مره وحده ثم تفرمل ) دا عيب فى السواقه والعربيه مواصفات ومقايس اوروبيه 100%والعربيه مش رياضيه ..... انا عندى لانسر شارك وجيب شيروكى ك ك 2008 مفهمش الموضوع دا وفى اول ماجبت دى حسيت انى اتنصب عليا والعربيه زباله الخ لكن الحقيقه مش كد وللعلم ان العربيه دى ماشاء الله استهلكها للبنزين ممتاز موفر جدا جداجدا يعنى مابتحرقش ولا تشرب فى البنزين على الفاضى وخزنها 50 لتر تقريبا ..مقارنة الجولف ب الاليزيه متنفعش فى فرق سعر هنا 130 الف مش هيجيبولك العربيه المثاليه الكامله......وبخصوص قطع الغيار الاوروبى معمر جدا وبيستحمل على عكس كورى اللى منتشر وفيه من مضروب كتير ودراجات او اليابانى واحنا فى مصر هنا بنحب نتسرق جنيه جنيه عشان ماتحسش

**J A G U A R** · 26-04-2014 07:45 PM

الف مبرووك الصيانه

**back2life** · 29-04-2014 12:59 AM

اول تيل اتغير على 13 الف تقريبا روحت اشتكى من تصفير التيل غيروه من نفسهم مع انه مكنش خلصان ولا حاجه (ماجد اوتو) تانى تيل اتغير على 16 تقريبا وكان متاكل حديد