شراء بيجو 301 مانيوال

**midostarmody** · 27-04-2014 02:08 AM

الحمد لله ايها الاعضاء الكرام بعد مشوفت الجيلى والافيو قررت بين حاجتين هما الاول بيجو 301 والثانى نيسان صنى بس مش عارف لية انا مايل اكتر للبيجو 301 عشان ان صنى تقفيل مصرى ومشاكل الفرامل المهم انا هشترى البيجو مانيوال السؤال هو هل السيارة المانيوال مش موجودة فى المعارض ولو مش موجودة اجيبها منين وهل المانيوال جيدة ولا الصنى احسن انا اقصد الصنى الى مش صوبر صالون

**Ahmed_Ta21** · 27-04-2014 02:32 AM

301 تكسب بمراحل
بخصوص العربية 301 مانيوال .. هتلاقيها في فرع المهندسين 4 ش وادي النيل (توكيل بيجو)

**georgedada82** · 27-04-2014 05:23 AM

بيجو عربية محترمة جدا ... بس انصحك تروح تتفرج علي اللوجان الجديدة شكل جديد خالص عن القديمة وممكن تشتري الهاي لاين ب 96 او 97 بس هيبقي فيها الاتي
اتنين ايرباج ... كمبيوتر رحلات ... abs ... ebd ... جنوط سبور ... سينسور بارك ... مثبت سرعة ... محدد سرعة ... دي في دي بشاشة وبلوتوث ... دراع مالتي فانكشن ... تكييف ديجيتال مش واير ... وحاليا تلافوا موضوع اماكن ازرار الزجاج الكهربا وبقيت في الباب زي العربيات العادية ... عفشة اللوجان اللقديمة وموتور اللوجان القديم ودول مجربين في القديمة واثبتوا كفاءة ... توكيل رينو افضل من توكيل البيجو ... بس لو حضرتك ميال للبيجو عربية محترمة طبعا والوكيل بيحاول ينجحها في الخدمة والصيانة ... انا مش بسوق للوجان بس انا بقترح علي حضرتك حاجة كسعر مقابل قيمة ولحضرتك القرار ...

**simon659** · 27-04-2014 07:04 AM

استاز ميدو ستار ليك كل التحيه
بس انا عايز انصحك نصيحه لوجه الله
ماتشتريش عربيه في رنج 100 الف واكتر مانول اطلاقا مطلقا وده لاحساسك بالندم الشديد بعد شرائها وللاسف لو فكرت تبيعها هتخسر كتتتتتتتتتتتتتتتتتتتتتتتت تتتتتتير جدا مع كامل احترامي للبيجو والستروين لانهم نفس الفئه وطبعا الراي المحطرم الرينو اللوجن
النقطه التانيه ابعد عن الصني لانها في نظري حرام فيها الفلوس في نظري كل حاجه فيها وحشه ماعدا ماتور وفتيس وراحه داخليه فقط انما بقيت النقات انا بديها صفر من تصميم لثبات لفرامل لمتانه لتقفيل انا مش معاها
انما انا رأي لو انت زودت حاجه بسيطه وجيبت بيجو اوتو او ستروين اوتو اعتقد في فرق علي المبلغ الي معاك حوالي 15 الف هؤلك قسطهم بس هتفرق الدنيا معاك كتير من راحه لاعاده بيع لشعور نفسي انك تقني العربيه فتره اطول لان متطلبات العربيه مش هتتغير فا هيبقي الموضوع صفقه مربحه فعلا
وفي النهايه اتمنالك كل توفيق وليك كامل الحريه

**midostarmody** · 27-04-2014 08:35 AM

شكرا لرد الاعضاء المحترمين المشكلة انى بجد مبحبش سواقة الاتوماتيك ولما سوقت عربية زميلى الاتوماتيك كنت هخبطها بس انا عايز اعرف هو البيجو المانيوال مفيهاش فوانيس شبورة لان الفيديو الى على اليوتيوب لعربية مانيوال فيها الفونيس دى

**shiko85** · 27-04-2014 09:19 AM

المشاركة الأصلية كتبت بواسطة midostarmody

شكرا لرد الاعضاء المحترمين المشكلة انى بجد مبحبش سواقة الاتوماتيك ولما سوقت عربية زميلى الاتوماتيك كنت هخبطها بس انا عايز اعرف هو البيجو المانيوال مفيهاش فوانيس شبورة لان الفيديو الى على اليوتيوب لعربية مانيوال فيها الفونيس دى

حضرتك علشان مش متعود على الأوتوماتيك بس بالتعود هتلاقى السواقه سهله و مريحه جدا
اول عربيه اوتوماتيك سقتها كانت a5 بتاعت صديق و كنت خايف جدا و متلخبط علشان مش متعود على الأوتوماتيك و لا متعود على العربيه و كانت لسه جديده بس بعد كده الحمد لله ربنا اكرمنى و اشتريت عربيه اوتوماتيك و السواقه مريحه جدا عن المانيوال
نصيحه بلاش تحكم على الأوتوماتيك علشان تجربه واحده مش ناجحه
و عايز افكر حضرتك ان اى حد بيتعلم السواقه اكيد كان فيه خوف و قلق و لو قال مش هسوق علشان الخوف ده محدش كان ساق عربيات اصلا
على العموم لو حضرتك عايز 301 مانيوال و مش عايز تنتظر كان فيه عضو هنا عايز عنده عربيه للبيع ماشيه 2000 كم تقريبا

**dodz** · 28-04-2014 01:11 PM

المشاركة الأصلية كتبت بواسطة shiko85

حضرتك علشان مش متعود على الأوتوماتيك بس بالتعود هتلاقى السواقه سهله و مريحه جدا
اول عربيه اوتوماتيك سقتها كانت a5 بتاعت صديق و كنت خايف جدا و متلخبط علشان مش متعود على الأوتوماتيك و لا متعود على العربيه و كانت لسه جديده بس بعد كده الحمد لله ربنا اكرمنى و اشتريت عربيه اوتوماتيك و السواقه مريحه جدا عن المانيوال
نصيحه بلاش تحكم على الأوتوماتيك علشان تجربه واحده مش ناجحه
و عايز افكر حضرتك ان اى حد بيتعلم السواقه اكيد كان فيه خوف و قلق و لو قال مش هسوق علشان الخوف ده محدش كان ساق عربيات اصلا
على العموم لو حضرتك عايز 301 مانيوال و مش عايز تنتظر كان فيه عضو هنا عايز عنده عربيه للبيع ماشيه 2000 كم تقريبا

ايوة دة انا, بس لسة مخدتش هذا القرار. في قدامي فرصة سفر و إن قررت أسافر إنشاء اللة في إحتمالية كبيرة أبيع. في خلال شهر هتكون الدنيا وضحت بأذن اللة.

بالنسبة للسؤال الأصلي, أنا قررت برضو أشتري المانيوال لعدم حبي لسواقة الأوتوماتيك (بالرغم من الراحة) بس لحد هذة اللحظة مش ندمان على قراري خالص و فتيس العربية ممتع جدا في النقل (أحسن بكتير من فتيس اللانسر بومة في رأي).

بالنسبة للصني فهي مع واحد من أعز أصدقائي (أوتوماتيك) و أشتراها قبلي بشهرين و برضو كان بيفكر في ال 301 بس جاب النيسان لخوفة إن البيجو جديدة. و هو العربية مش عجباة قوي بس مش كارها, و أما ركب معايا عجبتو جداً ال301 و كان أكتر حاجة علق عليها هي إن العربية فخمة و تحس إنها أغلى من سعرها.

و أنا عن نفسي شايف إن في الفئة دي يا ال 301 يا ال ريو أفضل الإختيارات. و لو رجع بيا الوقت هجيب ال 301 برضو.

و دة طبعاً لا يمنع وجود بعض التعليقات على العربية بس التعليقات كلها تفاصيل بتفرق من شخص لشخص و محدش بياخد بالو منها أصلاً

**ihabsamir** · 28-04-2014 01:54 PM

الحمد لله أخي الكريم انا معايا نيو صني جبتها ب110 الف اوتوماتيك و الحمد لله و لي فيها اكتر من اربعة اشهر و مفيش اي مشكله واجهتها مما قاله اﻻخوة اﻻعضاء . و قد سئلت الضمان قالوا النسخة الجديدة من نيسان اصلحوا فيها المشاكل . و بالنسبة للثبات انت معاك لغايت 140 ثبات 100 100. اتمني لك التوفيق و حسن اﻻختيار .