يحدث في كوكب دبي الشقيق (جدد رخصة سيارتك فى 50 ثانية !!)

**Elawany13** · 29-04-2014 01:46 PM

يحدث في كوكب دبي الشقيق
جدد رخصة سيارتك فى 50 ثانية !!

بقلم : Ebaid Mohamed

من كام شهر الشيخ محمد بن راشد حاكم دبي اجتمع مع كل مسؤولين الحكومة من المدراء المتوسطين للكبار ومنع اي أسئلة مترتبة وطلب من الناس تسأله وتقوله افكارها واقترحاتها لتطوير البلد...ايه بيعملوه يكملوه....ايه ما بيعملوهوش يبدأوا يعملوه...وايه حاجة بتتعمل يبطلوا يعملوها...زي think tank حكومي برعاية حاكم الامارة بدون خطوط حمراء

احد النقط الي خرجوا بيها من المؤتمر ان في خلال 3 سنين لازم كل خدمة في دبي تبقى ليها ذراع اليكتروني...ومش موقع عالانترنت بس والكلام بتاع 2001 ده..انما بمبدأ كله بـ applications

النهاردة روحت لثالث مرة اجدد رخصة العربية في دبي والمرتين الي فاتوا خلصت العملية في حوالي عشر دقائق وتقريبا الحكومة حست ان ده وقت للمواطنين يمكن توفيره. دخلت لقيت المكنة الي تحت دي. حطيت رقم العربية وتاريخ ميلادي طلعلي شاشة بتقولي ادفع فلوس كام حطيت الفلوس نزلتلي منها رخصة العربية الجديدة بتاريخ جديد كل ده في 50 ثانية ..بصيت يمين وشمال ..ايه يا جدعان ...اعمل ايه بعد كدة...ماهو اه تطور وكل حاجة بس مش نص دقيقة برضه..لقيت سيدة بتقولي أخي خلاص كدة الرخصة الجديدة...تحب مساعدة تاني؟ بصيتلها باستغراب وقلت لا شكرا ومشيت..

كمية الاغتصاب العصبي والنفسي والوقت المهدر والملايين الي بتترمي في الزبالة في مصر وبتقص من عمر الناس الي ياخدوا ملف من الطيران ويطلعوا بيه على الدراسة ويختموه من العاشر وينزلوا بيه السادس في العتبة ويعملوا فحص في رابعة ويستلموا الرخصة من مرور مدينة نصر فس منظومة اخطبوطية بشعة هدفها توظيف عشر عاطلين ممكن يقوم بوظيفتهم شخص واحد على حساب صحة ومجهود واعصاب ملايين هي فكرة سادية بكل المقاييس..

واذا كان الهدف من العشرين موظف الموزعين باختامهم على اطراف القاهرة هو توفير فرص عمل...طيب قولوا مرتباتهم كام وهاتوا المكنة دي وخلوا الناس تخلص حاجتها في دقيقة بنفس سعر مصاريف وقعدة ورشاوي ومواصلات العشرين مشوار و قللوا الزحمة والاكتئاب والإحباط