صوت في الفتيس و محدش عارف يحله !!

**Aelgahawy** · 29-04-2014 03:52 PM

أنا معايا نيسان صني 2013 الشكل القديم اوتوماتيك عامله دلوقتي ٤٢٠٠٠ كم

في بدايه ال20000 بدأ يظهر صوت ونه قصيره و الفتيس بينقل من التاني للتالت

رحت السبع في صيانة ال 25000 ( فرع زهراء المعادي ) و قولتله علي الصوت ده فقالي احتمال تبقي سوسته في الفتيس و هتقعد العربيه يومين عشان يكشفوا عليها، و تاني يوم كلمني المهندس و قالي ان الصوت ده عادي و موجود في كل الصني و مقتنعتش !

و عند ال ٣٥٠٠٠ بدأ يظهر صفاره و انا بهدي من ١٠٠ ل ٨٠ ! ، فقلت اروح صيانه ال ٤٠ ف اوتو ايجيبت يمكن يلاقوا حل ، و رحت و المهندس طلع جرب معايا و قالي الصفاره ماشي هنكشف عليها ، لكن الونه دي مش عارف !!!

المهم عملت صيانه ال ٤٠ و في الصيانه دي بيتغير زيت الفتيس ، و اما اتغير الونه راحت !! ، بس الصفاره لسه ! ، و المهندس قالي دي بلية شداد و هنطلبهالك من المصنع و تيجي تغيرها اما نكلمك

كلموني بعدها ب ٣ اسابيع و قالي ان البليه جت ، و رحت ركبتها و طلعنا جربنا لقينا الصوت لسه موجود !!!

دخلها تاني الورشه و كل شويه يطلع يجربها مع حد و بعد ٣ ساعات من التجارب قالي مش عارفيين الصوت ده جي منين ! ، بص عليها مهندس الميكانيكا و قال انها مش حاجه في الميكانيكا عشان بيمور العربيه علي السرعه دي و يبطل و الصوت بيفضل موجود ! ، و مهندس السمكره و الدهان راجع علي كل الكاوتشات علي اساس ان ممكن يكون هواء و برضه مفيش حاجه ! ، فقالي كده العربيه سليمه بس مش عارفيين الصوت جي منين !

و استلمت العربيه و جربت حوار اني امور في الوقت اللي بيظهر فيه الصفاره لقيت اني اول ما امور الصفاره بتروح !!! و أول ما ارجعها تاني علي ال D قبل ما تقل السرعه عن ٨٠ الصفاره بترجع !!!!!!

ف انا مش عارف اعمل ايه ؟!! ، ارجع اوتو ايجيبت تاني ؟؟ ، ولا اروح السبع ؟!! ولا اعمل ايه !!
و خايف ان ده يبقي حوار كبير في الجير بوكس مثلا و العربيه تتطلع من الضمان و البس العيب ده انا !! ، افيدوني

**aldesha989** · 29-04-2014 04:11 PM

ده مركز اى كلام شوف توكيل تانى

**hemaa_82** · 29-04-2014 04:32 PM

لو كانت مانوال كنت قلتلك بلية .... انما انا في الاوتوماتيك ولا اعرف حتي اسوقه :) ربنا يهديك للحل ان شاء الله

**hamisa08** · 29-04-2014 04:51 PM

دة لو مانويل يبقى اكيد ومفيش كلام تانى الفتيس خشن او مشكله فية وبنتاكد اكتر بنجيب الغيار الخامس علشان اصغر ترس بيجى بصعوبة والصوت علية بيزيد

**Aelgahawy** · 29-04-2014 06:35 PM

المشاركة الأصلية كتبت بواسطة aldesha989

ده مركز اى كلام شوف توكيل تانى

انا رحت السبع فرع زهراء المعادي و اوتو ايجيبت ابو رواش ، و سمعت ان يونايتد جروب اي كلام ! ، اروح فين تاني ؟!

**Aelgahawy** · 29-04-2014 06:36 PM

المشاركة الأصلية كتبت بواسطة hemaa_82

لو كانت مانوال كنت قلتلك بلية .... انما انا في الاوتوماتيك ولا اعرف حتي اسوقه :) ربنا يهديك للحل ان شاء الله

هما فعلا قالوا بلية شداد و غيروها و برضه مفيش فايده

**Aelgahawy** · 29-04-2014 06:40 PM

المشاركة الأصلية كتبت بواسطة hamisa08

دة لو مانويل يبقى اكيد ومفيش كلام تانى الفتيس خشن او مشكله فية وبنتاكد اكتر بنجيب الغيار الخامس علشان اصغر ترس بيجى بصعوبة والصوت علية بيزيد

هي اوتوماتيك ، بس حوار خشونة الفتيس اعتقد بيبقي طول مانت ماشي علي الغيار ، لكن عندي و انا بهدي مش وانا دايس بنزين ، يعني و انا علي ١٠٠ اول ما اشيل رجلي من علي البنزين تظهر الصفاره و تفضل مستمره لحد اما السرعه تقل عن ٨٠ و تسكت !

**3ateef** · 29-04-2014 07:47 PM

عندى نفس صوت الصفارة وانا بهدى, اوقات بيختفى خالص واوقات بيفضل موجود.
عربيتى نوبيرا اتوماتيك.

**m_love4me** · 29-04-2014 10:55 PM

عندي صوت نفسه من ال 80 ال 100

علشان اكون دقيق اكتر , لاني بلاحظ كل حاجه ف العربيه
على الار بي ام 2.1
يعني على نفس المنوال عند السرعه تقريبا من 60 ال 70
وبتختفي
وتظهر من 80 ال 90
وبعد كدا بتختفي تمام
وبجيب بالعربيه 200
والدنيا زي الفل

صوت خشونه او حاجه بتحك
السبع قالولي مره فالف بودي
او حاجات تانيه
وهنفك ونعمل ونبيت العربيه

حوارات فكسانه , واتعايشت مع الموضوع
قشطه

**Aelgahawy** · 30-04-2014 01:30 AM

المشاركة الأصلية كتبت بواسطة 3ateef

عندى نفس صوت الصفارة وانا بهدى, اوقات بيختفى خالص واوقات بيفضل موجود.
عربيتى نوبيرا اتوماتيك.

و عرفت ايه سببه ؟؟

الموضوع: صوت في الفتيس و محدش عارف يحله !!

LinkBack

أدوات الموضوع

عرض

-

-

المواضيع المتشابهه

عايزة مكان كويس لصيانة الدورية واصلاح عيب محدش عارف يحله في ميني فبيا 2009

يعنى محدش عارف

عيب محدش عارف يصلحه

محدش عارف اية السبب

الكلمات الدلالية لهذا الموضوع

المفضلات

المفضلات

ضوابط المشاركة