استشارة ورجاء المساعدة

**Ahmed_Mega** · 02-05-2014 03:43 AM

بسم الله الرحمن الرحيم
دلوقت يا جماعة انا شاري عربية من شهر 11 ولما اشتريتها من صاحبها طلبت منه شهادة مخالفات وكمان بيانات وبالفعل جابهملي وماكنش ع العربية ولا مخالفة وكمان دخلت ع النت مالقتش مخالفات وبالفعل اشتريت ومن يومين قولت ادخل اشوف المخالفات لقيت مفيش لكن الغريب اني دخلت اول امبارح لقيت عليا مخالفة بالف جنيه قالي عشان تعرف التفاصيل لازم رقم البطاقة دخلت رقم الراجل اللي اشتريت منه العربية لقيت المخالفة عكس الاتجاة ومتسجلة بنمرة العربية اللي قبل النمرة اللي اشتريت بيها واللي كمان داخل اكشف بنمرها والمخالفة يوم 1/8/2010 اتصلت ع الراجل اللي اشتريت منه تهرب مني وقالي دي مخالفة الراجل اللي قابلي وهكلمه بس ماعتقدش انه هيدفع او هيعمل حاجة وكمان هو بيتهرب
مكتوب انها تعمد السير عكس الاتجاة وكمان مكتوب سحب الرخصة وتحتها رقم مثلا (ص63854) الحد الادنى 1000 جنيه والاصى 3000 ورسوم ضريبية 5 الاجمالي 1005
انا دلوقت مش فاهم ازاي ازاي العربية غيرت مالك ونمر وبعدين جة عليها المخالفة
ثانيا المخالفة جاية بعد 3 سنين ونص وانا شكلي اللي هتحملها
لو رحت ولقيتها اية اللي هيحصل وانا بنقل مع العلم انا اشتريت بعقد مسجل وفاضل اربع شهور ع الرخصة على اما تخلص وانقل
انا مش عارف هعمل اية واللي كان معاه العربية قبلي بيتهرب من انه يكلم الراجل او حتى يحاول معايا بمدا انا بعت خلاص ماليش دعوة بيك!!!
حسبي الله ونعم الوكيل ف الحكومة والمرور يارب نجينا من البلد دي ونهرب منها على خير
مع العلم انا لسة مضرب عليا نار وهربت ورحت ابلغ الشرطة مارضيوش يعمله محضر او اثبات اللي حصل بحجة ان المنطقة اللي انضرب عليا نار فيها مش تبعهم وحتى ماتحركوش كل حاجة بتخلي الواحد يتمنى الهروب من البلد
قولولي اعمل اية ف المخالفة دي ارجوكم
وشكرا

**SYD** · 02-05-2014 04:21 AM

ربنا يعوض عليك
اغلب الظن انك هتدفعها
لو عرفت تدخل لوكيل النيابة تشرحله الموقف يمكن يعملك تظلم ومصالحة ويخفضلك المبلغ

والله المستعان
،
،

**mahmoud_ali** · 02-05-2014 03:39 PM

ربنا يعوض عليك هوا سيستم متخلف واداره متخلفه

**abofandy** · 02-05-2014 03:54 PM

هو دة النظام فى مصر
نظام عقيم يطبقة اشخاص عقيمه ينطبق على افراد لا حول لهم ولا قوة
طبعا بالمنظر العام كدة انت الى هتدفعهم
بس ممكن تدخل للمرور الى تابع ليه السياره وتشوف الى ماسك المخلفات وتقدر تسويها معاه
ودة حصلت مع احد الاقارب ليا كان شارى عربية وشهادة البيانات طلعت مزورة مع انها مختومه وكل حاجة بس اتعملت زى محبه كدة بان العربية مكنش عليها مخلفات وطلع عليها مخلفات ب 700 جنيه ومن هنا لهنا قدرنا نوصل مع الراجل الى بيكتب المخلفات واخد 200 جنيه وعمل ليها محو (( طبعا دة غلط الى احنا عملناه بس هو دة الحال فى مصر اهو 200 جنيه يشرب شاى بالياسمين اهون من 700 فى جيب الحكومه )) وياريت كمان المخالفه احنا الى كنا مرتكبيها بس غيرنا الى عملها واتهرب واحنا الى لبسنا

يله ربنا بيعوض برضة