الموضوع: ادامي فانتازيا وعايز رأيكم

السلام عليكم

من حوالي اسبوع كده تاجر معرفه جابلي عربية اعلي فئة خليجي 2011 وماشية 37 الف كيلو وخد بالك من 37 دي :d هي بتاعة زبون مش بتاعته هو المهم شوفتها ويارتني ماشوفتها :D

العربية شكلها مقرف جدا مبينضفهاش نهااائي لا من بره ولا من جوا السقف بتاعها من جوا تحس ان اي حد ايده مش نضيفة كان بيمسحها في السقف بتاعها اه والله اه والله :d بس الصالون نضيف كـ حالة مفيهوش مشكلة غير الطين اللى فيه بس والطارة متقشرة :d

العربية من بره بقي فيها حكة حلوة في الرفرف والاكصدام اللى ورا ومردودة علي البارد ومعمولة بقطنة كده وفي باب منهم في حكة حلوة برضه .. الشنطة واخدة بوكس :d الاكصدام اللى ادام متخرشم مفيهوش حتة سليمة والخرابيش معمولة بقطنة برضه بس شكلها وحش جدا ده غير النقر اللى في باقي العربية والكاوتش بتاعها متغير وقرب يتغير تاني مش عارف ازاى وهي ماشية 37 الف بس !

قولتله هي تعمل كام قالي متكلمتش معاه في سعر لسه .. قولتله طب انت شايف انها تعمل كام ؟ قالي نظرتي كـ تاجر تختلف عن نظرتك المهم قالي تعمل 175 سكت ومردتش طبعا فـ والدي قاله خلاص شوفه كده بيتكلم في كام وكلمني .. ومشينا ولحد دلوقتي متكلمش قولنا احسن برضه :d

في تاجر تاني برضه وده صديق خالي وكان جايبله عربيه كلمناه امبارح قالنا عندي 3 عربيات فانتازيا عربيات زباين برضه

روحنا امبارح قالنا في وحدة 2012 اعلي فئة توكيل بيتكلم في 210 و2013 زيها بس بيتكلم في 230 :d طبعا مفكرتش اشوفهم

نيجي للتالتة بقي اول فئة لونها فضي 2012 ماشية 48 الف وكل الصيانات في التوكيل وفعلا شوفت الفواتير بتاعتهم .. العربية بتاعة تاجر روحنا شوفناها ماشاء الله جديدة فعلا بس للاسف الزجاج الامامي فيه خبطة من طوبة صغيرة كده والفانوس الامامي فيه كسر بسيط من تحت خالص كده زي شروخ بس الفانوس مفيهوش مشكلة ولا مغير لون ولا حاجة خالص والاكصدام فيه حكة بسيطة كده لان تقريبا كانت وخدة خبطة بسيطة في الجزء ده غير كده العربية مافيهاش خدش واحد وكان طالب 175 بس حسيت انه كتير شوية المهم وصلت لـ173 وتقريبا ده اخرها يعني .. مش عارف حاسس انها محتاجة تنزل 3 او 4 تلاف كمان .. اية رأيكم؟