الموضوع: نصابين الكاوتش فى بنزينة موبيل

المشاركة الأصلية كتبت بواسطة ali tmam

حبيت انقل لكم تجربتى مع نصابين الكاوتش فى بنزينة موبيل اللى على البحر بعد فندق رمادا وده للاستفادة وعدم الوقوع مع هؤلاء النصابين
المهم دخلت البنزينة للتفويل وطلعلى الاخ بتاع نظافة الازاز ونظفة وبعدين قالى خلى بالك يا باشا الفردة اللى قدام من ناحيتى مريحة قلتلة ماشى سيبها بعد شويه قالى على فكرةالفردة ممكن تريح اكتر من كدة وانت ماشى بيها انا ممكن اكشف لك عليها وانت واقف دلوقتى اهو تطمن عليها طبعا الكلمتين دول قلقونى
المهم قولتله اكشف عليها لما نشوف راح جاب ازازة فيها ميه بصابون ورفع الفردة بالكوريك وحط الميه وقالى بص يا باشا فى خرم اهو لقيت فى هو اء وفقاقيع بسيطة خارجة من الفردة قولتله طيب قيس الفردة وشوفها كام دلوقتى راح قايسها وقالى ضغطها 10 راح قالقنى اكتر المهم قالى انا ممكن اركبلك خابور للخرم والخابور دة بيسيح جوة الكاوتش وحاجة ممتازة يعنى طبعا عشان اخوكم غشيم واول مرة اركب عربية قولتله ركب يا سيدى بعد ما ركب الخابور وانا قلبى بيتقطع على الفردة راح عامل اختبار تانى على الفردة قالى بص فى خرم تانى وواحد ثالث وكان تنفيسهم اقل من الاول وقالى الظاهر انت مشيت على ازاز وهو اللى خرملك الفردة طبعا مع تركيب الخابور الاول كانت صدمة التركيب راحت وقولتله ركب واخلص المهم ركبهم وكشف تانى قالى بعد ما ضبط المقاس على 31 على فكرة فى خرم رابع من زهقى قولتله سيبه انا عايزها كدة بس شوف مقاس الفردة اللى ورا راح قايس وقالى ضغطها 10 برضة قولتله هو مقاسك مضبط على عشرة المهم قالى اكشفلك عليها قولتله ابعد عنها الله يكرمك ضبط ضغطها على 31 وسيبها .
نسيت اقولكم انى كنت طالع من وردية ليلية 12ساعة وكان مغمى على
بعديومين قولت يابنى روح عند fit&fix اللى فى لوران وشوف ايه الاخبار............ الصدمةبقى لما الراجل جاب المقاس وبدا يكشف على الفرد الاربعة ويقيس ضغطهم لقى الفردتين اللى من الناحية التانية مقاسهم31 زى ما كنت مضبطهم من شهرين ونصف بعد الاستلام ولما كشف على الفردة اللى اتعمل فيها خوابير وقاسها لقى مقاسها 51 وقاس الفردة اللى انا قولتله زودها لقى ضغطها 52
وطبعا هما دول الفردتين اللى نصاب بنزينة موبيل قالى مقاسهم 10 وزودهم راح الراجل مضبطهم تانى على 31 وبالمرة سألته هو بعد تركيب خوابير فى الفردة محتاج ارصص قالى المفروض ترصص بس لما تحس باهتزاز فى الدريكسيون جامد وطالما مفيش اهتزاز يبقى مفيش داعى دلوقتى .



انا اسف للاطالة بس حبيت انقل ليكم تجربتى يمكن حد تانى يتعرض لنفس الموقف فيستفيد منها وفى النهاية حسبنا الله ونعم الوكيل فى كل واحد ينتهز جهل الناس بشئ وينصب عليهم

معلش قدر الله و ما شاء فعل يا استاذ على انا لو منك اروح ابهدل كرامة الراجل ده وا فضحهم فى البنزينة كلها و دى لعبة اغلب بتوع الكاوتش بيعملوها انا اى حد بيقولى فى اى بنزينة ان الكاوتشه مريحه ازودهاللك اقوله لاء سيبها انا عايزها كده وبشوفها بعد كده مريحه و لا لاء اصل لو الكاوتشه مريحة لحد 10 حاتبقى باينة اوى يعنى اسف لو دوست على الكاوتشة بجزمتك حاتحس انها بتنزل معاك يعنى مريحة شوية و معلشى الحمد لله على كل شئ و بعدين حضرتك لو مزنوق فى اى حاجة كلمنى و انا اكيد حاساعدك و افيدك على قدر المستطاع

الموضوع ده حصل مع ناس كتير لدرجة ان الواحد حفظه و شكرا على التحذير

الحمد لله انها جت على قد كده و مفيش حد بيتعلم ببلاش :)
ديما اتعامل مع fit and fix او اى مكان انت تعرفه و ناس واثقه فيه و مقاس الجهاز عنده مظبوط .. و حاول ديما تظبط عنده