الموضوع: طوارئ ( العربية مفيهاش كهرباء)

لو جيت في وقت حطيت المفتاح في الكونتاك وجيت تدور لقيت التابلوه مفيهوش كهربا والعربية ميتة تعمل إيه؟؟؟؟
أول حاجة تعملها تشغل الاضاءة الليلية
هنا رقم 1
لو اشتغلت الاضاءة الليلية هيكون العيب من الكونتاك او الفيوز بتاعه
إختبار الفيوزات ( للقطع)
هتجيب لمبة الصالون اللي فيها السلكين وتوصل المشبك بالارضي وتدور على الفيوزات بالمسمار
هتلاقي في ظهر الفيوز نقطتين معدن أبيض
تحط المسمار على واحدة وبعدين على التانية هتلاقي اللمبة بتنور
هيقابلك فيوز اللمبة بتنور على جنب منه والتاني لأ ---- دا بقا فيوز فاصل ---- هات فيوز من كارتة الفيوزات بنفس اللون وحطه مكانه
إختبار الفيوزات ( للقفلة)
لو ما لقيتش فيوز بينور اللمبة على جنب واحد وصل المشبك بطرف البطارية الموجب وكرر العملية
طيب لو ما عرفتش توصل للفيوز إيه الحل؟
عارف البوجيهات هتمشي مع سلك البوجيهات هتلاقيهم واصلين لقطعة خارج منها سلك زي سلوك البوجيه (الاسبيراتير) هتمشي مع السلك ده هتلاقيه واصل في حاجة كده معدنية في شكل علبة الكانز دي بقى اسمها الموبينة وهتلاقي فيها سلكين مربوطين فيها بمسمارين واحد رايح تاني للأسبيراتير والتاني واصل لصدر العربية ( وده اللي يهمنا)
هتجيب اللمبة اللي فيها سلكين بمشبكين وتوصل مشبك بطرف البطارية الموجب
والطرف التاني بمسمار الموبينة اللي فيها السلك اللي رايح لصدر العربية
وتفتح الكونتاك لو لمبات التابلوه نورت ضعيف واللمبة اللي فيها السلكين برضه نورت ضعيف كده يبقى تمام (فيه فصل في الدايرة)
ساعتها هتجيب السلك اللي فيه مسمار من ناحية واحدة
هوصل طرف السلك مع السلك اللي خارج من الموبينة ورايح لصدر العربية والمسمار هتغرزه في شعيرات الكابل الموجد اللي واصل للبطارية
هتلاقي لمبات الكونتاك نورت حتى وإنت شايل المفتاح
طيب لو العربية مفيهاش موبينة نعمل إيه؟؟؟؟
هنبص في صدر العربية قدام الراكب اللي جنب السواق
هنلاقي خرطومين خارجين من الصاج وواصلين للموتور من فوق
هنلاقي جنبهم سلكين واصلين بفيشة
هنلاقي فيها سلكين ( أحمر وأسود)
هنجيب السلك اللي فيه مسمار وهنوصل السلك في السلك الأحمر ونوصل المسمار بمشبك من بتوع اللمبة اللي فيها مشبكين هتنور اللمبة
هنوصل اللمبة بتاع الصالون اللي فيها مشبك ومسمار هتوصل المشبك بالبطارية
وتفتح الكونتاك
هنا رقم 2
لو لمبات التابلوه نورت ضعيف واللمبة اللي فيها السلكين برضه نورت ضعيف كده يبقى تمام (فيه فصل في الدايرة)
هتدور العربية
لو دارت يبقى الكونتاك غالبا سليم والعيب إما فيوز وإما سلك فاصل ( بس طبعا دارت العربية مش هنستنى ندور ------ طبعا على البيت وساعتها تفرج)
لو العربية ما دارتش إيه العمل؟؟؟ طبعا فبرة الكونتاك بايظة
هتنجيب السلك اللي فيه مشبك من ناحية ومسمار من الناحية التانية ونوصل المشبك بالطرف الموجب للبطارية
هتجيب دواسة تفرشها قدام العربية وتتأكد إن العربية مش واخدة غيار وإن فرامل اليد مشدودة كويس
هتنام قدام العربية هتلاقي سلك بكليبس واصل بقطعة بارزة في الموتور من تحت ( دي المارش) هتشد السلك اللي واصل للموتور وتحط المسمار مكانه هتلاقي المارش بيدور ويشغل العربية
أول ما العربية تدور شد المسمار وافصل المشبك وتوكل على الله
عودة إلى رقم 2
لو لمبات التابلوه منورتش واللمبة اللي فيها السلكين نورت شديدة كده يبقى فيه قفلة في العربية
القفلة هتبان في اختبار الفيوزات للقفلة هتلاقي فيوز بينور اللمبة على جنب واحد والتاني لأ ولو غيرته أو شعرته هيبوظ تاني يبقة القفلة تبع الفيوز ده
بس طالما العربية مش بتدور يبقى القفلة في الكونتاك ( ده هيبقى ليه موضوع لوحده)
عودة إلى رقم 1
لو الإضاءة الليلية ما نورتش هتتأكد من كابلات البطارية ترفعهم وتصنفرهم وتركبهم كويس
لو الحال لسة زي ما هوا والعربية كلها ميتة كهرباء
هيكون العيب من الفيوز العام في علبة الفيوزات وده بيكون 100 أمبير
هتلاقيه في جنب لوحده وممكن تتعرف عليه باختبار الفيوزات للقطع
ممكن تحط مكانه الفيوز 40 امبير من كارتة الفيوزات ( الفيوز الأزرق المخضر) بس ما تشغلش النور ولا التكييف
أو ممكن تشعره بحتة سلك 3 مم تقطعها من السلك اللي معاك وتوصلها بين طرفيه
وتدور وتمشي وتوصل بالف سلامة