الموضوع: إصلاح موتور مروحة تبريد الشيرى a11

تجربتى بالصور مع موتور مروحة التبريد
ومحاولة اصلاحها

بعد توقف احدى مراوح التبريد عن العمل تم استبدال الموتور بآخر مستعمل لكن يعمل.
فكرت انى افك الموتور واشركم معايا فى كيفية اصلاحة و بالصور.
- فك ريش المروحة من الموتور مع ملاحظة ان السن شمال يعنى ح نفك فى اتجاه الرباط العادى.
- فك الموتور من القميص ثلاثة صواميل مفتاح 10 اسبشيال او بيبة او لقمة لانهم غطسانين فى القميص مع قص السلك من بعيد عن الموتور قدر المستطاع.

- فك الغطاء الخلفى للموتور بوضع مفك بين جسم الموتور والغطاء والدق بالشاكوش برفق وح نكرر موضوع المفك ده فى كل الدير بتاع الموتور الى ان نخلص الغطاء من جسم الموتور مع ملاحظة ان فيه وردة سوسته خلف الرولمان بلى.




- بعد تخليص الغطاء يوجد وش الشربون كما هو موضح بالصورة.

- نسحب وش حامل الشربونات للخارج وح يطلع بالسلك بتاع الموتور.
وجد ان الشربونات قافشة فى داخل جرابها زى ما هو واضح فى الصورة وغير موصلة للكولكتور بتاع البوبينة وهو ده سر توقف الموتور عن العمل والموتور مليان تراب وهبو الشربون زى ما هو موضح بالصورة.



- ثم سحب البوبينة للخارج.


- بدء عملية النظافة وتحريك الشربون فى جرابه مع الرش بالمنظف الكهربائى (الاكاى) واستعمال صنفرة ناعمة جدا للشربون حتى يكون سهل فى الدخول والخروج من جرابه بفعل السوستة الموجودة خلف كل شربون الى ان يصبح سهل الدخول والخروج كما هو مبين بالصورة.

- تنطيف البوبينة وصنفرة الكولكتور بصنفرة ناعمة جدا.
- وده الشكل النهائى بعد التنظيف.

- اعادة التركيب ... البوبينه وبعديها وش الشربون برفق الى ان يقعد الشربون على الكولكتور وهو ليه اتجاه ما يركبش غلط الشربون للداخل والسلك ليه مكان بيركب فيه فى جسم الموتور
- تركيب الغطاء الخارجى فى مكانه مع مراعاة انه اتعوج اثناء الخلع حيث انه من الحديد الطرى ويتم استعداله بالدق الخفيف على الاماكن المعووجة.
- تركيب الموتور فى القميص ب الثلاث صواميل 10.
- تركيب ريش المروحة مكانها مع العلم انها ما تركبش غلط لوجود بطح فى العمود وفى الريشة لازم يركبوا على بعض ورباط الصامولة الحاكمة عليها اللى هيه سن شمال ما ننساش.....
ولكم منى كل التحية والاحترام.