الموضوع: صيانه 120 لجراند بونتو 2009

فى مركز فى جسر السويس اسمه ريكامبى فيات بيشتغل فيه مهندسين كويسيين جدآآ فى الفيات وليهم جروب على الفيس ادخل عليه واتواصل معاهم وشوف الدنيا وبالنسبة لقطع الغيار هم بيتعاملوا مع الكيلانى وبيجيبوا قطع الغيار الاصلية ، وفى ميكانيكى فى شارع دمشق جنب محل الشيخ على بتاع قطع غيار فيات الاصلى بردو ميكانيكى ممتاز دى الميكانيكى بتاعى بيكون موجود يومين الجمعة والاتنين فقط جنب محل الشيخ على من الساعة عشرة الصبح لغاية بليل ، وربنا يوفقك ، واكيد بردو التوكيل كويس بس مشكلة التوكيل اسعاره نار بجد فى كل حاجة المصنيعية وقطع الغيار

متشكر يا باشا بجد ربنا يكرمك
انا شغلى جمب الكيلانى انا سألت على قطع الغيار وعرفت اسعرها
بس انا عاير اعرف هوا في فرق بين قطع غيار التوكيل و الكيلانى ؟
وهل الكشف على الفتيس لازم يكون عند التوكيل ولا ممكن عند حد تانى
والبطاحه الي في التوكيل افضل ولا الي عند الكيلانى (المانى)وهل لازم اغير الجوز ولا ممكن وحده بس

السلام عليكم

تقريبا عندك شبه المشاكل الليي عندي وممكن الحقك قبل ما تعمل اللي عملتوا :)
الزيت اللي بينزل من الفتيس لونه ايه ؟ لو احمر خفيف او وردي يبقى زيت بوور الفتيس وده المفروض متوصل بمضخه لما الضغط يزيد جوه الترومبه (البلاستيك) ساعات بتضخ الزيت الزياده ..... يبقى ماننقص ولا نزود فيها الا لما تروح عند حد يكشفلك عليها في وجود اساسي للجهاز .....
طيب لو لونه مش زي ما قولت يبقى ممكن يكون زيت الفتيس نفسه (زي الميه المسفره تقريبا) او غيره المهم لازم يكشف عليها بالجهاز بردو ......
طيب تكشف فين !!! ؟ انا متحيز ضد توكيل اوماترا جدا لان المشكله لما ظهرت عندي بتاعت زيت الوردي اللي بينزل من الفتيس وروحت لؤماترا سوحوني تسويحت السنين .... كان اسهل حاجه عندهم تغير طقم ديبرياج كامل وشوية حجات في العفشه عرفت مسبقا انهم بينئو المشاكل في العفشه عشوائي بالبركه يا تخيب يا تصيب ..... المهم النصيحه الاوله ابعد عن اوماترا في تصليح او كشف ممكن لما تتزنق في قطعة غيار مش موجوده بره تجبها من عندهم وده غالبا بردو ما بيحصلش :)
تكشف فين .... اضافه للي قالو m.tito في اكتر من مركز صيانه على طريق مصر اسكندريه الصحراوي وفي واحد سمعت عنه بس لسه ماروحتوش موجود في صقر قريش المعادي ده غير انك ممكن تلاقي واحد ميكانيكي وعنده الجهاز والبرنامج بتاع الفيات جراند بونتو 2009 يكشفلك على العربيه من وجه تخصصه
ويكون قريب منك
اللي على طريق مصر اسكندريه في مركز النيل الهندسية للسيارات الكيلوا 28 ودي احتمال تمسك توكيل الفيات من اوماترا (السيئة السمعه) السنه الجيه ان شاء الله
وفي مركز انا كشفت العربية عنده عند داندي مول كده الصحراوي اسمه البرقان برده كويس مركز جديد بس اكيد في احسن منه

انا بس فاضل عندي مشكله مأرقاني في العربيه وكنت هسألك لو كانت وجهت .. صوت زي الصفاره بتاع مضخت سحب الزيت للفتيس اللي هيه بتسمعها اول ماتيجي تفتح باب العربيه !!!!!
الصوت ده مابيبطلش عندي اول ما بشغل العربيه ويشتغل ويطفي ورا بعض تقريبا بيبقى الفاصل 10 ثواني وساعات 20 ثانيه :/
اظن انه ليه علاقه بالفتيس او بوحدة الديبرياج بالاخص ؟؟؟؟؟

متشكر جدا يا باشا على المعلومات دي
انا في مكانيكي عند جامعه الازهر وده قريب جدا مني عشان انا ساكن في م .نصر وقالى ان دا زيت باور بس انا مش متأكد منه برضه اوي. ولون الزيت غامئ بس مش واضح اذا كان احمر ولا مصفر شويه
بس هوا قالى عادي العربيه دي كده اما الديس بينشف بيجيب زيت ودا عادي وهتطر بعدها تغير اسطوانه ودسيك
اما صوت الصفاره دا انا مش بسمعو غير اول اما بفتح باب بتاعي اما بتكون العربية فتره مدرتش بس بيروح بعد كده على طول بعد 5 ثواني ومش بسمعو تانى (انا كنت فاكر انه صوت الكمبيوتر) واحد صحبي قالى كده.
انا دلوقتي قدامي عند الكيلانى قطع غيار (المانى) وفي واحد في مصر الجديده عنده (ايطالى) تقريبا نفس السعر اجيب ايه في طقم السرفيس ؟
مع العلم انا لسه شاري العربية من شهر فامعلوماتى مش كبيره اوي فيها بصراحه

العفو يا باشا
انا نسيت اقولك ان الديسك والاسطوانه والفرك الداخلي والخارجي والبليه اللي هما طقم الديبرياج كامل لازم يتغيرو كل 35000 كم هما المفروض 40000 بس عشان انت في مصر المحروسه غيرو على 35000 كم والزيت البور بتاعه كل 10000كم فلو عرفت تسأل اللي شاريها منه اخر مره غيرهم امتى ؟ هتعرق المشكله منين ... ولو ماعرفتش غيرهم اضمن
اظن ابن البلد افضل ايطالي كل مكان افضل بس المهم جديد
انا شاريها من تلات شهور بس لما تتسحل معها شويه هتعرف عنها حجات كتير :p

بسم الله الرحمن الرحيم
بص بقي يا باشا انا اتسحلت امبارح
انا روحت شارع دمشق وسألت على قطع الغيار وجبتها من هناك
وهقولك لى مجبتش من الكيلانى لاقيت الاسعار هيه هيه ونفس الحاجه بس انا ديما بتعامل مع الى فى شارع دمشق عشان كان معاية اونو97 وهوا عارفنى وانا واثق منه وخفضلى فى الاسعار فا قلت اجيب من هناك ولو في حاجه برجعاله عادى الى غيرته كالتلى :
- زيت باور موبيل 320 (55 جنية)
- سير كاتينة (بوش) (160جنية) كان فيه الاصلى اخو الكان طالع من العربيه ب (250 جنية) ومفيش اختلاف
- سير مجموعه (بوش) (70جنية)
- بلية كاتية اصلى يابانى (275 جنية) كان فى واحد برضه بي 300 اصلى بس اختلاف العلبة بس
- طقم بوجيهات (nkj) يابانى (100 جنية) وعند الكيلانى ب130
- فلتر هواء (60 جنية) بولاندى بس مش ذي الى كان راكب الى كان راكب احسن منه
- شداد فتيس (175 جنية) تركى عشان كان عندي دبة فى الغيار وخصوصا على الاول لما فك القديمة لقيت الكوتشه مقطوعه بالفعل
- بطاحتين امامى (350 جنية) تركى (البطاحات فرقت معايه اوى الاصوات صراحت اما غيرتها الحمدالله)
بس الحاجه التركى مش حلوه اوي بس هوا دا الى موجود بقى

المصعنيه كلفتنى 300 بالبطحتين انا نزلت معاه ل 250 عشان اكرم الصنايعية
وسألت عند واحد فى مصر الجديده قالى المصنعية 400
انا روحت عند محمود الى عند جامعه الازهر عاجبنى شغله وفاهم ومش غالى اوى بصراحه

وبعد الشغل اكتشفت انى عياز اغير
1- صوبعين ميزان ( 200 تركى - 300 ايطالى )
2- طبقين بطاحات امامى (100 تقريبا لسه هسأل)
3- تيل فرامل امامى (لسه مش عارف اجيب نوع ايه)

ان شاء الله هغير زيت الماتور كمان 2000 كيلو لانى معملتش غير 6000 كيلو بس هغيرو على 8000
وجبت فلتر زيت ب 30 جنيه بولاندي
وهغير زيت شيل 10000 ان شاء الله بى 300 جنية

وبعد كل ده هظبط زوايه واربط عفشه و ارصص ان شاء الله


يعنى الحسبه دي عملت بتاع 3000 جنية بالكتير
والحمد الله

عايز اجيب البلاستكه الكافر الاسود الى تحت المرايه الشمال عشان ضايعه
مش لاقيها بصراحه

تمام اوي الاسعار ده جامده جدا
ريحت بالك من حجات كتير وكده اضمن ....
والاسعار ده هاتفدني في الفتره الجيه ... تسلم
ابقى غير بعد ال10000كم زيت بور فتيس موبيل 330 هو بحوالي (85 حنيه ) بس احسن للنوع ده من الفتيس
تمام انت كده يعتبر عملت صيانة 120 وابقى ما تساش زيت الفتيس الاساسي نفسه اسال اتغير امتى

انا بقى اخر حاجه بركن العربيه تحت البيت وقفلتها وبعدين بفتح تاني عشان اقدم العربيه سنه قدام وبدي غيار العربيه محلك سر طيب ادي ريوس بردو محلك سر ماتحركتش ربنا يستر
شكلها جابت دسك واسطوانه :)) الحمد لله

انا هسأل على نوع الزيت ده احسن ولا ايه نظامه ان شاء الله (موبيل 330)
اما زيت الفتيس فانا معرفش عنه حاجه انا فى الاونو اعدت سنتين ولا فكرت اغيره بس كنت ببص عليه كل فتره

اما انت فربنا يستر عليك بقي ان شاء الله وتبقي حاجه خفيفه
بس الناس الى اتعملت معاهم كويسن لو حبيت ترحلهم