الموضوع: طريقة زيادة كفاءة تكييف دايو لانوس بتكلفة 25 جنية فقط....بالشرح التفصيلى بالفيديو

بسم الله الرحمن الرحيم

الموضوع دة عبارة عن ملف فيديو بيوضح ازاى ترفع كفاءة التكييف فى عربيتك الدايو لانوس

وفى الواقع هو ينفع مع عربيات كتير جدا مش شرط دايو لانوس فقط
لأن الحاجات اللى انا بشتغل عليها موجودة على الاقل فى 80 % من السيارات

وللعلم انا مرفعتش ملف الفيديو دة الا بعد ما جربت الفكرة ونجحت معايا وشغال بيها بقالى 3 اسابيع حتى لحظة كتابة هذة السطور

تكلفة الفكرة بسيطة جدا ومتوفرة وتمنها اقل من 25ج والنتيجة بتاعتها كانت ممتازة

وبدون الدخول فى تفاصيل معقدة ومقارنات هقولك ببساطة ان العربيات اليابانى معروف عنها ان التكييف بتاعها تلاجة وبعض العربيات العالية
لكن اللى زى الدايو وما شابهها من السيارات التكييف بتاعها بيكون كويس ومعقول لكنة مش تلاجة

بمعنى ابسط وواضح:
اختبار التكييف بيكون انك تشغلة على اقصى سرعة فى ظهيرة يوم حار يعنى من الساعة 11 الضهر لحد الساعة 3 العصر وفى الوقت دة تقدر تعرف كفاءة تكييفك الحقيقية

لكن غير كدة بيكون الجو لطيف اصلا وبيساعد التكييف

بعد ما نفذت الفكرة دى فى عربيتى انا بقيت بسقع بجد من تكييف الانوس فى الوقت السالف ذكرة وبضطر انزل التكييف لسرعة 3 او 2 عشان اتحمل درجة البرودة ويبقى الجو لطيف جوة العربية


قبل ما تتفرج على الفيديو اختار من الضبط اعلى نقاء او اعملة دونلود لو السرعة عندك بطيئة



ملف الفيديو

https://www.youtube.com/watch?v=IRvJ...ature=youtu.be





الموضوع دة واحد من ضمن 9 مواضيع انا شغال عليها

1 - (لاول مرة) طريقة اصلاح طرمبة الباور لدايو لانوس ........بالتفاصيل والصور

2 - طريقة اصلاح قلب طرمبة البنزين لدايو لانوس ............بالفيديو

3 - طريقة عمل اضاءة لحوض السيارة ( الموتور ) ........بالتفاصيل والفيديو او الصور

4 - طريقة فك فرش سقف السيارة وغسلة واعادة تركيبة بنفسك........بالتفاصيل والصور

5 - طريقة اصلاح ذراع النور فى دايو لانوس ليرتد فى كلا الاتجاهين .........بالتفاصيل والصور

6 - طريقة تحويل كراسى الانوس من كراسى ثابتة الى كراسى على مساعدين او سوست ..بين الفكرة والتنفيذ

7 - طريقة تبسيط وشرح علبة الفيوز الداخلية والخارجية لدايو لانوس.....بالتفاصيل والصور

8- - طريقة جذرية لعلاج مشاكل نقص مياة الريداتير والقربة .......بالتفاصيل والصور

10 - طريقة بسيطة لاطال عمر البطارية فى السيارة .......بالشرح والفيديو
ــ ـــــــــ ـــــــــ ـ

فى الموضوع اللى فات حطيت المواضيع دى تقريبا وقولت انى مش عارف اية اللى الناس محتاجاة الاول عشان انزلة فغالبية الاراء كانت على موضوع تحسين كفاءة التكييف فنزلتة

بردو هلتزم بنفس الكلام هنا وهقول للناس اية فى المواضيع التسعة دى انزلها الاول او تكون الناس محتاجاة ........والموضوع اللى هيبقى علية اجماع هوة اللى هينزل الاول

ــــــــــــــــــــ
كدة خلصنا الشغل والشرح

نيجى بقة للمهم وهو انى عملت الموضوع دة بحيث يكون صدقة جارية او علم ينتفع بة لوالد زميلنا محمد ممدوح الله يرحمة لان الراجل دة (محمد ممدوح) خدم طوب الارض بدون مقابل وعلى الاقل خالص 7 او 10 % من كل اللى راكبين لانوس فى مصر استفاد منة ولو معلومة واحدة لوجة الله فاقل حاجة انك لما تنفذ الموضوع فى عربيتك وتلاقى النتيجة الممتازة انك تقرأ الفاتحة لوالدة الله يرحمة