الموضوع: تجربة مع تكييف الأسكورت

مساء الورد ياركيبة الفورد
انتو عارفين اني معايا اسكورت 1300 cc موديل 1998 ، هحكيلكم على تجربتين عملتهم في العربية بس هحكي على كل تجربة في موضوع منفصل
التجربة الأولى :
الصيف اللي فات وانا مسافر كنت مشغل التكييف وكان زي الفل ، لما قربت من نهاية طريق الساحل حسيت ان فيه صوت شخللة طالع من الهوايات ، ماحطيتش في بالي وكملت لغاية ماوصلت الشاليه وركنت العربية ونزلت الشنط وقضيت اليوم عادي جدا ، تاني يوم بشغل التكييف لقيت الكومبريسور بيقوم عادي والـ rpm بيعلى كالمعتاد لكن مفيش هوا خارج من الهوايات نهائياً واكتشفت ان المراوح مش شغالة. كملت الأجازة عادي ورجعت من السفر فاتح الشبابيك ومستحمل الصهد والحمد لله على كده. روحت عند سليمان الأطير والناس فكوا الكويل وطلعوا المروحة لقوها قافشة ....
زيتوها ورشوا عليها wd40 وركبوها والدنيا مشيت كويس. الصيف ده بشغلها لقيت صوتها عالي قوي وزي مايكون فيه رجرجة طالعة منها !!! روحت عند واحد بتاع تكييف عندنا في عين شمس الحقيقة هو شاطر وصنايعي نضيف ، فكها برضه لقى ان الجلبة بتاعة المروحة بتلف مع الـ axe وده الللي عامل الرجرجة ، المهم صلحها بلدي وشحنت لكنه لفت نظري لأن حالة المروحة مش ولابد والكويل نفسه تعبان ومكسور وملحوم بسليكون وده بيعمل تسريب للهوا البارد بره وبيدخل هوا سخن جوا.
روحت ركنت العربية وبعد كام يوم كنت خارج بيها يوم جمعة مع الأسرة وبشغل التكييف اللي صارف عليه دم قلبي لقيت صور وابور الطحين طالع من الهوايات تاااااااني. بصراحة دمي اتحرق على الفلوس اللي عمال اصرفها على الفاضي دي وقررت اني مش هصلحها تاني وهشتري مروحة استيراد وخلاص !
نزلت عند مصطفى بطاح في الوكالة (بصراحة شاب محترم جدا وخلوق وامين ومهاود في اسعاره) علشان اشوف المروحة ، قاللي المروحة هفكهالك من كويل وهديهالك غالية لأن الكويل هيبوظ لأن فيه ضوافر عاشق ومعشوق هتتكسر... هديهالك ب 250 لكن لو خدت الكويل على بعضه هديهولك ب 500 جنيه وده كويل الأسكورت الـ 1600 المكيفة هيفرق معاك جدا في التبريد لأن السربنتينة الداخلية اكبر من اللي في الكويل بتاعك (عموما الكويل نفسه كان اكبر من اللي راكب في العربيةوانا اتأكدت من كبر السربنتينة لما فكيت الكويل القديم) وكان فيه فلاتر جوه بتتفك وتتغسل وتركب وحاجة لوكس اوي.
المهم علشان مااطولش عليكم وبعد الفصال خدت منه الكويل كامل ب 300 جنيه بس. بعتبرها صفقة رابحة جدا والحمد لله وقابلت ساعتها عنده عوني بتاع التكييف وكهرباء الفورد واتفقت معاه انه هو اللي هيركبه بس كنت مستصعب مشوار صقر قريش بس الحمد لله طلع ساب صقر قريش وفتح في السيدة زينب واتفقت مع عوني على يوم جمعة بعد الصلاة وروحتله فعلا .
بصراحة عوني فاهم اوي في الفورد وعارف بيعمل ايه وطلع عينه علشان يفك الكويل القديم لأن مساميره كانت مصدية وتقرف وركب الجديد وشحنت وتمام التمام وبرضه كان مهاود في مصنعيته دفعتله 350 جنيه شاملين (الفك والتركيب والشحن و2 لاكور علشان يركبوا على الاكسبانشن فالف بتاع الكويل الجديد)
الحمد لله النتيجة مرضية جدا بالنسبالي من حيث كفاءة الكويل الجديد والتبريد وقوة المراوح ولله الحمد