صوت غريب في اللوجان

**mostafabakry** · 11-05-2014 09:43 PM

السلام عليكم و رحمة الله و بركاته

معايا لوجان mcv ٢٠٠٩ و الحمد لله العربية كويسه
طبعا خرجت من الضمان و بعمل صياناتي برا مركز الخدمة المعتمد خصوصا انه مبقاش علي المستوي و بقا زفت خالص

من كأم شهر عملت صيانة ١٢٠ الف كم و غيرت مجموعة الكاتينة و سير الدينامو و التكييف و كمان غيرت طمبورة الكرنك اللي هي بتدور كل حاجة و غيرت كمان مجموعة بلي سير الدينامو و حمالة الموتور اللي تحت و المساعدين الأماميين
المهم صرفت مبلغ محترم و دي طبيعتي مع العربية

بعد دا كله لاحظت صوت بيظهر لما أكون بعدي مطب و طبعا بهدي السرعة و بعد ما أعدي المطب بخلي الفتيس علي النقلة التانية مش الأولي و بتكون العربية سرعتها اقل شوية من ٢٠ كم/س و اول ما ادرس بنزين اسمع و احس بصوت كركبه كأنه حديد بيخبط في حديد !!!

لما قلت للميكانيكي علي الحكاية دي و سمعتها له قاللي دا صوت مصفحة الموتور بتخبط في طبة الزيت اللي في الكارتيرة تحت الموتور لما الموتور بيتهز شويه علشان الغيار مش شبعان !!!
و طبعا أنا اقتنعت بكلامه

أنا في مره جربت العربية بدون المصفحة و الصوت زي ما هو !!!!! إذن الموضوع مش مصفحة زي ما الميكانيكي قال ؟؟

الصوت ممكن يختفي لو أنا اخرت دوسة البنزين بعد المطب لثواني لغاية ما الار بي ام يرفع فوق ال ١٠٠٠ لفة ساعتها بس الصوت يختفي و ميظهرش !!

لاحظت كمان ان الزنة دي بتظهر الصبح بدري اول ما أدور العربية و هي لسه بارده بيظهر لمده ثواني او دقيقة بالكثير و يختفي مجرد ان العربية تسخن و الآر بي ام ينزل لمستواه الطبيعي ٦٠٠ لفه

العربية زي الفل عالطوالي و سحبها كويس و معقول و الصوت مبيظهرش خالص علي اي سرعات

تتوقعوا الصوت دا ممكن يكون سببه إيه ؟؟؟

هل شكمان مثلا ؟؟ هل حاجة في الموتور نفسه ؟؟ هل الفتيس فيه حاجه ؟؟ هل الديسك و الأسطوانة ؟؟؟

الصوت دا هيجنني بصراحة و بيغيظني جدا و نفسي اعرف له سبب

**ahmedkaseeb** · 12-05-2014 12:09 AM

أ / مصطفى
أنا معايا لوجان 2009 ونفس الصوت واللى حكيته بالظبط بيحصل معايا . جنبى ميكانيكى خليته يبص على الشكمان لان الصوت كان يا اما من الكساحة و ربطها كويس وفضل الصوت زى ماهو وبص على الشكمان ولقى الصوت منه وبيقول ان ده القلب اللى جواه اعتقد علبة البيئة وان شاء الله ناوى اروح لبتاعة شكمانات يكشف عليها واتاكد واشوف الحل .

**mostafabakry** · 12-05-2014 09:23 PM

معقولة الشكمان يعمل الصوت دا

علي فكرة الزنة اللي أنا بتكلم عليها بحسها في جسم العربية من تحت و بحسها جااااامد لو أنا ماسك عصاية الفتيس بتكون مسمعة جداً فيها

طيب لو افترضنا ان الصوت من علبة البيئة ازاي ممكن تتعالج و لا ساعتها لازم تتغير !! أنا اعرف انها غالية

**gebreel** · 12-05-2014 09:36 PM

مش عارف ليه عندي احساس انها قاعدة الموتور اللي حضرتك غيرتها و هقلك ليه

انت قلت انها بتظهر في حالتين الحالة الاولى و هي الصبح بدري و ده بتبقى العربية باردة و الrpm عالي و اهتزاز الموتور بيبقى جامد + انك قلت انها بتهز العربية كلها و مسمعة في الفتيس بشكل ملحوظ

الحالة الثانية بعد المطب و دي لو الغيار فعلا مش مظبوط بيبقى في هوة في الموتور جامدة القواعد هي اللي بتمتها فمبتحسش بيها قوي

فانت كدة ممكن يبقى حاجة من 2
ياما القعدة اللي راكبة دي مش كويسة او راكبة غلط
ياما عندك قاعدة ثانية بايظة و لما ركبت واحدة جديدة من ال3 قواعد بقى في عندك ناحية اعلى من ال2 الثانيين اللي متاكلين (لأن القعدة عبارة عن كاوتش قاعد على حديد)

نصيحتي ليك روح لميكانيكي شاطر يبصلك على القواعد او التوكيل لو قريب منك

**mostafabakry** · 15-05-2014 12:19 AM

المشاركة الأصلية كتبت بواسطة gebreel

مش عارف ليه عندي احساس انها قاعدة الموتور اللي حضرتك غيرتها و هقلك ليه

انت قلت انها بتظهر في حالتين الحالة الاولى و هي الصبح بدري و ده بتبقى العربية باردة و الrpm عالي و اهتزاز الموتور بيبقى جامد + انك قلت انها بتهز العربية كلها و مسمعة في الفتيس بشكل ملحوظ

الحالة الثانية بعد المطب و دي لو الغيار فعلا مش مظبوط بيبقى في هوة في الموتور جامدة القواعد هي اللي بتمتها فمبتحسش بيها قوي

فانت كدة ممكن يبقى حاجة من 2
ياما القعدة اللي راكبة دي مش كويسة او راكبة غلط
ياما عندك قاعدة ثانية بايظة و لما ركبت واحدة جديدة من ال3 قواعد بقى في عندك ناحية اعلى من ال2 الثانيين اللي متاكلين (لأن القعدة عبارة عن كاوتش قاعد على حديد)

نصيحتي ليك روح لميكانيكي شاطر يبصلك على القواعد او التوكيل لو قريب منك

شكرًا لحضرتك لاهتمامك و ردك

الصوت ظهر عندي قبل ما أغير شدادة الموتور السفلية

و عموما هخلي الميكانيكي يراجع علي كل القواعد
و لو انه لو فيه مشكلة في قواعد الموتور بتظهر لما تشد فرامل اليد و تحاول تطلع بالعربية وتحمل علي الموتور و انت واقف و تشوف رد فعل الموتور ... لو فيه قاعده مش كويسه بيظهر بسهولة
أنا جربت الحركة دي و الموتور اهتزازه معقول و مفيش حاجة بتقول ان القواعد خلت او باظت

شكرًا مرة اخري لحضرتك

**mostafabakry** · 15-05-2014 12:21 AM

المشاركة الأصلية كتبت بواسطة ahmedkaseeb

أ/ مصطفى
أنا لسة راجع حالا من عند بتاع الشكمانات رفعنا العربية هى بالمناسبة mcvبرضوا سمع الصوت فعلا من الشكمان من تانى علبة والحمد لله انها مش علبة البيئة لانها غالية جدا الراجل ده بتعامل معاه من سنين المهم قالى العلبة بتشخشخ من جوه يعنى قلبها واقع شيلناها وفعلا رجيت العلبة لقيت الصوت اللى كنت بسمعه وركبنا علبه جديدة بتاعة هيونداى تقريبا نفس الحجم كان عايز 150 دفعتله 120 بعد الفصال طبعا كان فيه علبة اللادا ب70 ج وقالى بلاش منها حتكتم العربية فعلا لقيت ماسورتها شبة مسدودة غير اللى عندنا - الحمد لله العربية زى الفل صوت كركبة الحديد راح والعربية صوتها معلاش وسحبها كويس . حبيت اعرفك احتمال تكون نفس المشكلة واتوقع انها كه فعلا قبل ما تدخل ف دوامة الصنايعية وكل واحد يقعد يجرب - وبالتوفيق ان شاء الله وابقى طمنا

شكرًا لحضرتك علي متابعتك و اهتمامك

أنا هحاول اروح للتابع شكمانات كويس و اخليه يفحص الشكمان كويس
و يا رب يقدر يتوصل لسبب المشكلة

تحياتي