بورا 2004 وللا استرا 2005

**Maghraby1987** · 13-05-2014 01:46 PM

رجاله فولكس انا زميل من قسم اوبل و عندي استفسار
باختصار شديد انا قدامي بورا 2004 اوتوماتيك حالتها كويسه و مطلوب فيها 65 الف جنيه
هي احسن وللا استرا 2004-2005 من حيث الثبات و قوه الموتور و التكيف و اسعر قطع الغيار و توافرها و الاعطال الشائعة في العربيتين؟

**abou-yahia** · 13-05-2014 04:22 PM

البورا

**J A G U A R** · 13-05-2014 04:28 PM

البورا وسعرها كمان كويس

**sala7** · 14-05-2014 02:16 PM

ولا بورا ولا استرا
يعني اركب اوكتافيا احسن ولا تركب بورا و خصوصا انها اوتوماتيك
مش عارف سبحان الله مع ان اوتو البورا مشترك مع عربيات كتير في نفس المجموعة لكن العربية دي بالذات لما بتزعل بتبقا حاجه يعني تكره الواحد في عيشته .. ايه السبب !!
مش هقولك غير نصيب .. لكن اللي اقدر اقولهولك ان واحد صاحبي معاه واحده مغلباه .. مغير عقل الفتيس مرتين و بردوا مش ظابط
ده غير قطع ناااااار مش عارف ليه بردوا .. لكن هو البياع تروح تقوله بورا يروح حرقك في فلوسك ميه ميه

و اسف على الاطالة

**ahmed azaizy** · 15-05-2014 05:04 AM

نصيــــــــــحه
انا اولا معنديش فكره خالص عن الاسترا
لكن تعالى اكلمك عن البــــورا
انا كان معايا بورا 2001 وبعتها وحاليا معايا جولف 5
بعت البورا بـ 63 الف ومعايا الجولف سعرها 120 الف
وبكل امانه وصراحه بقول ان قرار انى ابيع البورا كان اسوء قرار اخدته فى حياتى
الجولف جميله ما شاء الله ومبسوط بيها .. لكن ركبت عربيات كتير بعدها ومفيش عربيه تتقارن بيها !!
البورا اجمل العربيات اللى شوفتها (لو نضيفه)
متخافش من الفتيس الاوتوماتيك بتاعها .. مفيش اى مشكله غير حاجتين
1- اتأكد البورا ماشيه كام كيلو ؟؟ عشان لو وصلت 60 الف ومغيرتش زيت فتيس هتقابل بقى مشكله عقل الفتيس وهتكره حياتك وملحوظه الموضوع ده فى اى عربيه مش بس البورا .. يعنى فى الجولف والاوكتافيا والجيتا ..الخ
2- المشكله التانيه هى لما تجيب الفتيس على r عشان ترجع ورا .. البورا بتتأخر شويه فى الاستجابه بس مش كتير يعنى حوالى ثانيه او اتنين
غير كده لو العربيه سليمه هتاخد اداء وثبات وارتفاع عن الارض مميز وفخامه وهقعد اتكلم للصبح عنها ههههههه
استخير الله وتوكل
وبكرر تانى مهم جدا تتأكد من الكيلومتر يكون قليل وتم تغيير زيت الفتيس على 60 الف

**xil_fox_lix** · 19-05-2014 01:13 AM

المشاركة الأصلية كتبت بواسطة ahmed azaizy

نصيــــــــــحه

استخير الله وتوكل

**xil_fox_lix** · 19-05-2014 01:19 AM

طبعا انا مش خبير في الالماني بس انا زي حالاتك محتار ما بين البورا والاوكتافيا
وسوقت الاتنين
وكان الاتي
سبحان الله مع ان العربيتين واحد ف معظم المكونات الا ان البورا ركوبه مختلفه تماما ولو عربيه سليمه ليها سحر خاص بس للاسف اعادة البيع وقطع الغيار والصيانه لصالح الاوكتافيا

عموما كل اللي اقدر انصحك بيه
سواء جبت بورا او استرا العربيتين حلوين لو سلام اهم اهم حاجه حالت العربيه واوعى تعتمد انك هتزبطها بعدين دي عربيات محترمه ومش كتيؤ بيفهم فيها فلو الحاله نص ونص فكك منها