كروس فوكس لما تكون سخنه متدورش

**mohamed4636** · 13-05-2014 06:49 PM

السلام عليكم
عندى سياره فولكس كروس فوكس لما تكون سخنه متدورش ولما تبرد تدور عادى
الكهربائى قاللى البطاريه و جربت بطاريه جديده مدورتش
والميكانيكى قاللى مارش
والمشكله دى رخمه جدا افيدونى

**amrelsaqqa** · 13-05-2014 07:05 PM

ازاى ياباشا بطارية ومارش وهى بتدور كويس وهى باردة اللى هو الاحتياج فيهم للمارش والبطارية اكتر
اول حاجة تعملها غير الميكانيكى والكهربائى دول :d

ثانيا
حسب نوع العربية مش عارف عربيتك فيها موبينة واحدة ولا موبينة لكل بوجيه بس لو فيها موبينة واحدة هتجيب فوطة تبرد الموبينة وتدور ، لو دارت عيب موبينة بتسخن وهتحتاج تتغير

لو مش كدة يبقى اغلب الظن رشاشات بتسيل والموضوع ده يبقى مصحوب باستهلاك عالى ودخنة سودا وتراجع على خط الراجع بتاع البنزين لو مسدود

ان شاء الله المشكلة مش هتخرج عن الحاجات دى مبدأيا

**Ahmed Saad** · 13-05-2014 07:28 PM

وممكن برضه طرمبة البنزين لو العربيه سخنت ماتدورش اكشف على طرمبة البنزين ولو عايز تكشف عليها شوف الراجع بتاع البنزين فكه وجيب جركن 1 لتر ودور العربيه لو ملي الجركن في 30 ثانيه يبقى الطرمبه سليمه لو مش كده اكشف على الرشاشات في جهاز تنضيف الرشاشات ويشوف مقاومتهم مظبوطه ولا لا وانا شويه واجبلك مقاومات الرشاشات وممكن تكشف عليهم بنفسك بالافوميتر وان شاء الله خير

**Ahmed Saad** · 13-05-2014 08:49 PM

بص يا باشا مقاومة الرشاشات من 12-17 ohm هتقيسها بالافوميتر لو أقل من 12 أو أزيد من 17 اوم يبقى محتاجه تتغير وشيك بالمره على دوره وخراطيم الهواء من العمه إلى البوابه وان شاء الله خير

**Omar Mahmoud** · 13-05-2014 08:50 PM

انا فعلا مع رأي انك تغير الميكانيكي و الكهربائي

**alzelafy** · 13-05-2014 11:52 PM

الحركه دى كانت حصلت معايا فى ابيزا 98 كانت ضربت جوان وش سلندر و صلحتها و بعد ما العربيه بتمشى ب 15 دقيقه تبطل و ما تدورش الا لما تبرد سالت الكهربائى قالى حساس الميا و هاتهالى و الله حلفت منا صارف عليها جنيه و بعتها و هى واقفه

**Shido** · 14-05-2014 01:42 PM

كانت حصلت معايا من اسبوع بس و هي سخنه كانت بتعمل تكه بدل صوت المارش. ولما تبرد تدور عادي جدا. الكهربائي غيرلي اوتوماتيك المارش و ماحصلتش تاني من ساعتها الحمد لله
عربيتي كورسا سيدان و التكلفه اوتوماتيك و مصنعيه دفعت 150
و يارب تطلع حاجه بسيطه و ماتدفعش حاجه خالص

**sala7** · 14-05-2014 01:52 PM

المشاركة الأصلية كتبت بواسطة hitmangate

وممكن برضه طرمبة البنزين لو العربيه سخنت ماتدورش اكشف على طرمبة البنزين ولو عايز تكشف عليها شوف الراجع بتاع البنزين فكه وجيب جركن 1 لتر ودور العربيه لو ملي الجركن في 30 ثانيه يبقى الطرمبه سليمه لو مش كده اكشف على الرشاشات في جهاز تنضيف الرشاشات ويشوف مقاومتهم مظبوطه ولا لا وانا شويه واجبلك مقاومات الرشاشات وممكن تكشف عليهم بنفسك بالافوميتر وان شاء الله خير

انا مؤيد لرأي الطرمبه انما موضوع الرشاشات ده لو حتى فيها مشكله هدور و هي بارده او سخنه مش هتأثر بالشكل اللي يخليها ما تدورش و هي سخنة حتى